Iwui Shimlungli Ningsā Khangazip
Davidwui laa.
Awungawui amang khangachon. Ana imikli kaphāmana ot mayangmara, khangaran eina kahāngkapha mibingli ngasakhaora, kakhayang mibingli mākhui ot sāngasakra kala shimli khamayāng mili mapamngasakmara da ngashita — kala zingkum kachida keinungli kaphāmana sākabingli horshokra.
101 1Makhangachei leikashi kala mashunwui vang ina laa sāra; nawuili, O iwui Avā, ina nimshimri ngasakra. 2Shāt makā apongli zatkhavai ina ning ngasharra. Karankha nana iwuili rārakhala? Iwui shimlungli ning khangazip eina ina zatra. 3Ina imiktāli makānkhanā ot khipānakha makhaningkāra. Kongluida mibingwui ot ina yangkharinga; chi iwuili mashurmara. 4Masho ngachei wuklung iwui eina thuihaora; ina makaphāli khipānakha matheira. 5Khipānakha ngathumda awui khongnainaoli makhayā tui hānga chili ina ngasām ngasakra; khanganing mikyan eina lāngkaso ning kakā a chili ina makhānrarmara. 6Athumna iwui eina ngasopam khavai, iwui mik chi ngaleiwui shitkasangbingtungli lei; shāt makā apongli kazata a chi ili otram ngatha̱ra. 7Mikhanam ot kasā a chi iwui shimlungli mapampaimara; kakapik tui hānga a chi iwui miktāli manganinglengmara. 8Ngathor kachida ngaleiwui makhayābing saikorali ina ngasām ngasakra; ithumwui Avā keinung chiwui eina makaphā kasā mi saikorali katathaora.
