ଗୀତସଂହିତା 101 FHB Father's Heart Bible™

101 ¹ନିୟମର ଦୟା ଓ ନ୍ୟାୟ ବିଷୟରେ ମୁଁ ଗାନ କରିବି; ହେ ମୋହର ପିତା, ତୁମ୍ଭ ଉଦ୍ଦେଶ୍ୟରେ ମୁଁ ସଙ୍ଗୀତ କରିବି। ²ମୁଁ ସାବଧାନ ହୋଇ ସିଦ୍ଧ ପଥ ଅନୁସରଣ କରିବି। ତୁମ୍ଭେ କେବେ ମୋʼ ନିକଟକୁ ଆସିବ? ମୁଁ ଆପଣା ଗୃହ ମଧ୍ୟରେ ଅନ୍ତଃକରଣର ସରଳତାରେ ଚାଲିବି। ³ମୁଁ କୌଣସି ଅସାର ବିଷୟ ଆପଣା ଚକ୍ଷୁ ସମ୍ମୁଖରେ ରଖିବି ନାହିଁ। ଯେଉଁମାନେ ବିପଥଗାମୀ ହୁଅନ୍ତି, ସେମାନଙ୍କ କର୍ମ ମୁଁ ଘୃଣା କରେ; ତାହା ମୋତେ ଲାଗି ରହିବ ନାହିଁ। ⁴କୁଟିଳ ଅନ୍ତଃକରଣ ମୋʼଠାରୁ ଦୂର ହେବ; ମୁଁ କୌଣସି ମନ୍ଦତା ଜାଣିବି ନାହିଁ। ⁵ଯେ ଗୋପନରେ ଆପଣା ପ୍ରତିବାସୀର ନିନ୍ଦା କରେ, ତାହାକୁ ମୁଁ ନୀରବ କରିଦେବି; ଉଦ୍ଧତ ଦୃଷ୍ଟି ଓ ଅହଙ୍କାରୀ ଅନ୍ତଃକରଣବିଶିଷ୍ଟ ଲୋକକୁ ମୁଁ ସହିବି ନାହିଁ। ⁶ଦେଶର ବିଶ୍ଵସ୍ତ ଲୋକଙ୍କ ଉପରେ ମୋହର ଦୃଷ୍ଟି ଅଛି, ଯେପରି ସେମାନେ ମୋʼ ସହିତ ବାସ କରିବେ; ଯେ ସିଦ୍ଧ ପଥରେ ଚାଲେ, ସେ ମୋହର ସେବା କରିବ। ⁷ଯେ ଛଳ ଆଚରଣ କରେ, ସେ ମୋହର ଗୃହ ମଧ୍ୟରେ ବାସ କରିବ ନାହିଁ; ଯେ ମିଥ୍ୟା କହେ, ସେ ମୋʼ ଚକ୍ଷୁ ସମ୍ମୁଖରେ ସ୍ଥିର ହୋଇ ରହିବ ନାହିଁ। ⁸ପ୍ରତି ପ୍ରଭାତରେ ମୁଁ ଦେଶର ସମସ୍ତ ଦୁଷ୍ଟ ଲୋକଙ୍କୁ ନୀରବ କରିଦେବି, ଆମ୍ଭମାନଙ୍କ ପିତାଙ୍କ ନଗରରୁ ପ୍ରତ୍ୟେକ ଦୁଷ୍କର୍ମକାରୀକୁ ଉଚ୍ଛିନ୍ନ କରିବି।