ಕೀರ್ತನೆಗಳು 101 FHB Father's Heart Bible™

101 ¹ಅಚಲಪ್ರೀತಿಯನ್ನೂ ನ್ಯಾಯವನ್ನೂ ಕುರಿತು ನಾನು ಹಾಡುವೆನು; ನನ್ನ ತಂದೆಯೇ, ನಿಮಗೆ ನಾನು ಗಾನಮಾಡುವೆನು. ²ನಿಷ್ಕಳಂಕ ಮಾರ್ಗವನ್ನು ಅನುಸರಿಸಲು ನಾನು ಜಾಗರೂಕನಾಗಿರುವೆನು. ನೀವು ನನ್ನ ಬಳಿಗೆ ಯಾವಾಗ ಬರುವಿರಿ? ನನ್ನ ಮನೆಯೊಳಗೆ ಯಥಾರ್ಥಹೃದಯದಿಂದ ನಾನು ನಡೆದುಕೊಳ್ಳುವೆನು. ³ನನ್ನ ಕಣ್ಣುಗಳ ಮುಂದೆ ಯಾವ ನೀಚ ವಿಷಯವನ್ನೂ ನಾನು ಇಡುವುದಿಲ್ಲ. ದಾರಿತಪ್ಪುವವರ ಕೃತ್ಯವನ್ನು ನಾನು ಹಗೆಮಾಡುತ್ತೇನೆ; ಅದು ನನಗೆ ಅಂಟಿಕೊಳ್ಳದು. ⁴ವಕ್ರ ಹೃದಯವು ನನ್ನಿಂದ ದೂರವಾಗುವುದು; ಕೆಡುಕಿನ ಯಾವುದನ್ನೂ ನಾನು ಅರಿಯೆನು. ⁵ಗುಪ್ತವಾಗಿ ತನ್ನ ನೆರೆಯವನನ್ನು ದೂಷಿಸುವವನನ್ನು ನಾನು ಮೌನಗೊಳಿಸುವೆನು; ಗರ್ವದ ಕಣ್ಣೂ ಅಹಂಕಾರದ ಹೃದಯವೂ ಉಳ್ಳವನನ್ನು ನಾನು ಸಹಿಸೆನು. ⁶ನನ್ನ ಕಣ್ಣುಗಳು ದೇಶದ ನಂಬಿಗಸ್ತರ ಮೇಲಿವೆ, ಅವರು ನನ್ನೊಂದಿಗೆ ವಾಸಿಸಲೆಂದೇ; ನಿಷ್ಕಳಂಕ ಮಾರ್ಗದಲ್ಲಿ ನಡೆಯುವವನು ನನ್ನ ಸೇವೆಮಾಡುವನು. ⁷ಮೋಸ ನಡೆಸುವವನು ನನ್ನ ಮನೆಯೊಳಗೆ ವಾಸಿಸನು; ಸುಳ್ಳು ಹೇಳುವವನು ನನ್ನ ಕಣ್ಣುಗಳ ಮುಂದೆ ನಿಲ್ಲನು. ⁸ಪ್ರತಿ ಮುಂಜಾನೆ ದೇಶದ ದುಷ್ಟರೆಲ್ಲರನ್ನೂ ನಾನು ಮೌನಗೊಳಿಸುವೆನು, ಕೆಡುಕುಮಾಡುವ ಪ್ರತಿಯೊಬ್ಬನನ್ನೂ ನಮ್ಮ ತಂದೆಯ ಪಟ್ಟಣದಿಂದ ನಿರ್ಮೂಲಮಾಡುವೆನು.