Chifa Eina Khangakao
Ana vānhaoda awui chapchāt ithumwui Avā mangāli heishok tharan, chotchānga mi akhawui seihā kasā.
Kazākāwui seihāngkhangaya: zimik meikhu thada, ara̱ meili kakhang thada, khamuiwui vang pungrok, khangayā pungramli khangachang ngalāthā akha thada. Kharakhali ana amang pongli hāngkhui chithuda Zion kasākāluiwui pongli, kala kazingram yon thada kahao eina saka khalei Avāwui pongli hānga.
102 1Iwui seihā kasā nganāmilu, O ithumwui Avā; iwui ngachonmi khavai khangakao nawui mangāli kāshungranu. 2Iwui ningkachot atamli namai iwui eina mathumhaialu; nāshungda ili ngareirāmilu, ina ngakao zimiksholi ili thākta ngahānkāmilu.
3Kaja iwui atam meikhut thāda shimānhaira, kala iwui ara̱kui sharkha̱ thāda chuihaira. 4Iwui ning shaotāhaida khawo thāda ngahuihaora; iwui kashakazā zākhavai chila ina malaihaira. 5Iwui ringkhangāwui vang, ina thenga ahui kala ara̱kui khamāng ngasāhaira. 6Ina lamhāngwui utvana̱ kathāna, ja̱ta kahai keinungli khalei pawung kathāna. a a v6 Utvana̱ kala ja̱ta kahai keinungli khalei pawung hi horhaida ramcho kahai pamwui vānao chibingna — ngachakyang katonga kala horhaiwui khangalatnā chitheikhami khavaina. 7Ina kapi maleila leihaira; shimtungli ngachakyang konghinao akha kathā ngasāhaira. 8Langpongda iwui yangkashebingna ili zeiya; ili malungvāta athumna iwui ming khonkashi thāda khuiya. 9Kaja ina hotlā kashakazā thāda shaiya, kala iwui mangkhavai chāra̱ eina manāta, 10nawui malungkhavāt kala nawui malungkathuiwui vang; kaja nana ili khāngkāda horsanghaira. 11Iwui atam zingyinlamwui khaya̱ kathāna, kala ina khawo thāda ngahuihaora.
12Kha nava, O ithumwui Avā, katang mavaila wungpamkhongli pamchingra; nawui aming thot saikorali leichingra. 13Nana ngakarthuida Zionli lumashanmira, kaja ali mayākhami chitheimi atamna; langchin sākahai atam rāhaira. 14Kaja nawui raobingna awui lungguibing ringphāpaira, kala awui chifali lumashanmira. 15Yurbingna ithumwui Avāwui mingli ngacheera, kala okathuiwui awungabing saikorana nawui tekhamateili ngacheera. 16Kaja ithumwui Avāna Zion sākāra; ana awui tekhamatei eina latkharā. 17Ana horkahaibing chiwui seihā kasā nganāra, kala athumwui seihā kasā maningkachaimara.
18Hi rārāda khalei thotwui vang kapisangra, chithāda masāranglakha mibingna ithumwui Avāli sochikatranu: 19ana awui kathara kajuiwui eina ngashānda; kazingram eina ithumwui Avāna okathuili yangtai, 20narkahaiwui ringkhangā shākhavai, thihaokida khalei athumli ningkhān ngasākhavai, 21chithāda ithumwui Avāwui ming Zionli phongmira, kala awui masot Jerusalemli phongmira, 22mibing kala wungrambingna ithumwui Avāli khorum khavai rākazip tharan.
23Ana shongfali iwui yāng sātekmihaira; iwui atam ngacheimihaira. 24Chieina ina hānga, "O iwui Avā, iwui mirin alungthungli ili makhuithuimihaialu; nawui zingkum thot saikorali leichingra. 25Achālakha nana okathuiwui shimphunga sākhui, kala kazingram chi napāngthem otsakna. b b v25 Hebrews 1:10-12 na tui hibing chi Jishuwui pongli chitheimi—ithumwui Proho Jishu, katang makhavai Anaomayara, awui pāngli ithumwui Avāna saikora sākhui kajina. 26Athum shimānhaora, kha nana leichingra; kachon thāda athumna saikora chamserhaora. Kachon thāda nana ngacheikhuihaora, kala athum kānthuihaora. 27Kha nava chichingra, kala nawui zingkum katang mavaimara. 28Nawui raobingwui naongarā reisanglak eina pānra, kala athumwui ara̱-azā nawui mangāli nganingtitta."
