Ithumwui Avāli Solu, O Imanglā
Davidwui.
Ithumwui Avāwui leishikhami mamalaikhavai kachibing: morei pheomi, kazā raimi, khamathi kapam eina huimi. Chiwui kharakhali tui khani ngasokhui: avāwui ning naongarāli kathā thada, awui ningla ithumli chithāda lei. Ithum chifana da ana theia.
103 1Ithumwui Avāli solu, O imanglā; kala iwui alungshong khalei saikorana, awui kathara mingli solu!
2Ithumwui Avāli solu, O imanglā, kala awui kaphā otsak saikora akhala mamalaihaialu, 3nawui morei saikora pheomikashap, nawui kazāt saikora raimikashapa, 4Kathewui ram eina nawui mirin ngatangkhuikashapa, makhangachei leikashi kala lukhamashan pemting eina nali maiyāda yuingasakkashapa, 5khamathā kaphā eina nali chirmikashapa, nawui mirin peichaoda, chieina nawui nganui khalāng thāda dharngasakchingra.
6Ithumwui Avāna rekharek kahai saikorawui vang khamashung khangarong kala mashun sai.
7Ana awui apong Mosesli theingasaka, awui otsak Israelnaobingli theingasaka. 8Ithumwui Avā lukhamashan kala lumashankatha̱a, malung mavātzarmana kala makhangachei leikashi pemting eina lei. 9Ana atam kachida maphenchingmara, kala katang mavaila awui malungkhavāt makaziphaimara. 10Ithumwui morei athishurda ana ithumli masāmana, kala ithumwui khangui athishurda athut makhuimana. 11Kaja kazingram okathuiwui atungli kajuikha thāda, awui makhangachei leikashi ali khangacheebingwui vang hakmahālaka; 12Zingsho zingtunwui eina katāva̱kha thāda, chithāda ithumwui Avāna ithumwui morei ithumwui eina katāva̱ khāmmihaora.
13Avāva̱na awui naongarāli lumashanmi thāda, chithāda ithumwui Avāna ali khangacheebingli lumashanmira. 14Kaja ithumli kathāda sākhui kaji ana thei; ithum chifana da ana phaningungchinga. 15Miwui atam khawo thāda lei; athumna luiwui kaho thāda phorra; 16Kaja masina chiwui atungli rātāhaira, kala chi ja̱tāhaira, kala awui apamna chi maphaningungluimara. 17Kha ithumwui Avāwui makhangachei leikashi ali khangacheebingwui vang katang makhavaiwui eina katang mavaila lei, kala awui khamashung khangarong naongarāwui naongarāli lei, 18awui tuingashit khamayonabing kala awui ningkhami sākhavai phaningungbingli.
19Ithumwui Avāna kazingramli awui wungpamkhong ngarānhaira, kala awui wungramna saikorawuitungli mungra.
20Ithumwui Avāli solu, awui kazingraobing, awui tui kasā pangshap khaleibing, awui tui saikora khanganābing! 21Ithumwui Avāli solu, awui ashangva̱ saikora, awui ningkachāng kasā awui raobing! 22Awui wungram peichaoda awui sākahai ot saikora, ithumwui Avāli solu. Ithumwui Avāli solu, O imanglā!
