Zaburi 103

103 ¹Mhimidi Baba yetu, ee nafsi yangu; na vyote vilivyo ndani yangu, lihimidini jina lake takatifu!

²Mhimidi Baba yetu, ee nafsi yangu, wala usisahau fadhili zake zote, ³yeye asamehaye dhambi zako zote, yeye akuponyaye magonjwa yako yote, ⁴yeye aukombolaye uhai wako na kaburi, akuvikaye taji ya upendo wa agano na huruma, ⁵yeye akushibishaye kwa mema siku zote za maisha yako, hata ujana wako ukafanywa mpya kama tai.

⁶Baba yetu hutenda haki na hukumu ya adili kwa wote wanaoonewa.

⁷Alimjulisha Musa njia zake, wana wa Israeli matendo yake. ⁸Baba yetu ni mwenye huruma na neema, si mwepesi wa hasira, tena ni mwingi wa upendo wa agano. ⁹Hatalaumu siku zote, wala hatashika hasira yake milele. ¹⁰Hakututenda sawasawa na dhambi zetu, wala hakutulipa kwa kadiri ya maovu yetu. ¹¹Kwa maana kama mbingu zilivyo juu sana zaidi ya nchi, ndivyo ulivyo mkuu upendo wake wa agano kwa wamchao; ¹²Kama mashariki ilivyo mbali na magharibi, ndivyo Baba yetu alivyoziweka mbali nasi dhambi zetu.

¹³Kama vile moyo wa baba uwaelekeavyo watoto wake kwa huruma, ndivyo moyo wa Baba yetu uwaelekeavyo wamchao. ¹⁴Kwa maana yeye anaijua asili yetu; hukumbuka ya kuwa sisi tu mavumbi. ¹⁵Siku za mwanadamu ni kama majani; husitawi kama ua la porini shambani; ¹⁶kwa maana upepo hupita juu yake, likatoweka, na mahali pake hapalikumbuki tena. ¹⁷Bali upendo wa agano wa Baba yetu ni tangu milele hata milele kwa wale wamchao yeye, na haki yake kwa wana wa wana, ¹⁸kwa wale walishikao agano lake na kukumbuka kuzitenda amri zake.

¹⁹Baba yetu ameukita kiti chake cha enzi mbinguni, na ufalme wake unatawala juu ya vyote.

²⁰Mhimidini Baba yetu, enyi malaika zake, enyi mashujaa mtendao neno lake, mkiitii sauti ya neno lake! ²¹Mhimidini Baba yetu, enyi majeshi yake yote, watumishi wake mtendao mapenzi yake! ²²Mhimidini Baba yetu, enyi kazi zake zote, mahali pote pa ufalme wake. Mhimidi Baba yetu, ee nafsi yangu!