Salmo 103

103 ¹Dayega ang atong Amahan, O akong kalag; ug ang tanan nga ania sa sulod nako, dayega ang iyang balaang ngalan!

²Dayega ang atong Amahan, O akong kalag, ug ayaw hikalimti ang bisan usa sa iyang mga kaayo, ³nga nagpasaylo sa tanan nimong mga sala, nga nag-ayo sa tanan nimong mga balatian, ⁴nga nagtubos sa imong kinabuhi gikan sa lubnganan, nga nagpurongpurong kanimo sa gugma sa kasabotan ug sa kaluoy, ⁵nga nagtagbaw kanimo sa mga maayong butang samtang buhi ka, aron ang imong pagkabatan-on mabag-o sama sa agila.

⁶Ang atong Amahan nagbuhat ug pagkamatarong ug hustisya alang sa tanang gidaugdaug.

⁷Gipaila niya ang iyang mga dalan kang Moises, ang iyang mga buhat ngadto sa katawhan sa Israel. ⁸Ang atong Amahan maluluy-on ug mapuangoron, mahinay sa kasuko ug madagayaon sa gugma sa kasabotan. ⁹Dili siya kanunayng magsumbong, ni huptan niya ang iyang kasuko hangtod sa kahangtoran. ¹⁰Wala niya kita buhati sumala sa atong mga sala, ni balusan kita sumala sa atong mga kalapasan. ¹¹Kay maingon sa gihabog sa kalangitan ibabaw sa yuta, ingon kadako ang iyang gugma sa kasabotan ngadto sa mga nahadlok kaniya; ¹²maingon sa gilay-on sa sidlakan gikan sa kasadpan, ingon kalayo gikuha sa atong Amahan ang atong mga sala gikan kanato.

¹³Maingon nga ang kasingkasing sa usa ka amahan maluoy sa iyang mga anak, mao usab ang kasingkasing sa atong Amahan maluoy sa mga nahadlok kaniya. ¹⁴Kay nasayod siya kon giunsa kita paghulma; nahinumdom siya nga kita abog lamang. ¹⁵Ang mga adlaw sa tawo sama sa balili; molambo sila sama sa ihalas nga bulak sa kapatagan; ¹⁶kay molabay ang hangin sa ibabaw niini, ug mawala kini, ug ang dapit niini dili na mahinumdom niini. ¹⁷Apan ang gugma sa kasabotan sa atong Amahan nagagikan sa kahangtoran ngadto sa kahangtoran alang sa mga nahadlok kaniya, ug ang iyang pagkamatarong ngadto sa mga anak sa mga anak, ¹⁸ngadto sa mga nagabantay sa iyang kasabotan ug nagahinumdom sa pagtuman sa iyang mga sugo.

¹⁹Ang atong Amahan nagtukod sa iyang trono didto sa kalangitan, ug ang iyang gingharian nagamando sa tanan.

²⁰Dayega ang atong Amahan, kamo nga iyang mga anghel, kamo nga mga gamhanan nga nagatuman sa iyang pulong, nga nagasunod sa iyang matag pulong! ²¹Dayega ang atong Amahan, tanan niyang mga panon, mga alagad niya nga nagabuhat sa iyang kabubut-on! ²²Dayega ang atong Amahan, tanan niyang mga binuhat, sa tibuok niyang gingharian. Dayega ang atong Amahan, O akong kalag!