መዝሙር 103

103 ¹ነፍሴ ሆይ፣ አባታችንን ባርኪ፤ በውስጤ ያለውም ሁሉ ቅዱስ ስሙን ይባርክ!

²ነፍሴ ሆይ፣ አባታችንን ባርኪ፤ ውለታዎቹንም ሁሉ አትርሺ፤ ³ኀጢአትሽን ሁሉ ይቅር የሚል፣ ደዌሽንም ሁሉ የሚፈውስ፤ ⁴ሕይወትሽን ከጕድጓድ የሚቤዥ፣ በኪዳን ፍቅርና በርኅራኄ ዘውድ የሚያቀዳጅሽ፤ ⁵በመልካም ነገር የሚያጠግብሽ፣ በሕይወትሽ ዘመን ሁሉ ጕልማስነትሽ እንደ ንስር ይታደሳል።

⁶አባታችን ጽድቅን ያደርጋል፤ ለተጨቈኑትም ሁሉ ፍትሕን ይሰጣል።

⁷መንገዶቹን ለሙሴ፣ ሥራዎቹንም ለእስራኤል ሕዝብ አስታወቀ። ⁸አባታችን መሐሪና ባለ ጸጋ ነው፤ ለቍጣ የዘገየ፣ በኪዳን ፍቅርም የበዛ ነው። ⁹ሁልጊዜ አይከስም፤ ቍጣውንም ለዘላለም አይይዝም። ¹⁰እንደ ኀጢአታችን አያደርግብንም፤ እንደ በደላችንም አይከፍለንም። ¹¹ሰማይ ከምድር በላይ ከፍ እንደሆነ፣ ለሚፈሩት የኪዳን ፍቅሩ እንዲሁ ታላቅ ነው፤ ¹²ምሥራቅ ከምዕራብ እንደሚርቅ፣ አባታችን ኀጢአታችንን ከእኛ እንዲሁ አራቀ።

¹³አባት ለልጆቹ እንደሚራራ፣ አባታችን ለሚፈሩት እንዲሁ ይራራል። ¹⁴እንዴት እንደተፈጠርን ያውቃልና፤ አፈር መሆናችንንም ያስባል። ¹⁵የሰው ዘመን እንደ ሣር ነው፤ በሜዳ እንዳለ የዱር አበባ ያብባል፤ ¹⁶ነፋስ በላዩ ያልፋልና ይጠፋል፤ ስፍራውም ከእንግዲህ አያስታውሰውም። ¹⁷የአባታችን የኪዳን ፍቅር ግን ለሚፈሩት ከዘላለም እስከ ዘላለም ነው፤ ጽድቁም ለልጅ ልጆች ነው፤ ¹⁸ኪዳኑን ለሚጠብቁ፣ ትእዛዛቱንም ለማድረግ ለሚያስቡ ነው።

¹⁹አባታችን ዙፋኑን በሰማያት አጸና፤ መንግሥቱም በሁሉ ላይ ይገዛል።

²⁰እናንተ መላእክቱ፣ ቃሉን የምታደርጉ ኀያላን ሆይ፣ ቃሉንም ሁሉ እየታዘዛችሁ አባታችንን ባርኩ! ²¹እናንተ ሠራዊቱ ሁሉ፣ ፈቃዱን የምታደርጉ አገልጋዮቹ ሆይ፣ አባታችንን ባርኩ! ²²በመንግሥቱ ስፍራ ሁሉ ያሉ ሥራዎቹ ሁሉ፣ አባታችንን ባርኩ፤ ነፍሴ ሆይ፣ አባታችንን ባርኪ!