Saamu 103

103 ¹Fi ìbùkún fún Baba wa, ìwọ ọkàn mi; àti gbogbo ohun tí ń bẹ nínú mi, ẹ fi ìbùkún fún orúkọ mímọ́ rẹ̀!

²Fi ìbùkún fún Baba wa, ìwọ ọkàn mi, kí o má sì gbàgbé ọ̀kankan nínú àwọn oore rẹ̀, ³Ẹni tí ń dárí gbogbo ẹ̀ṣẹ̀ rẹ jì, tí ń wo gbogbo àìsàn rẹ sàn, ⁴Ẹni tí ń ra ẹ̀mí rẹ padà kúrò nínú isà òkú, tí ń fi ìfẹ́ májẹ̀mú àti àánú dé ọ ní adé, ⁵Ẹni tí ń fi ohun rere tẹ́ ọ lọ́rùn níwọ̀n ìgbà tí o bá wà láàyè, tí a sì ń sọ ìgbà èwe rẹ di tuntun bí ti idì.

⁶Baba wa ń ṣe òdodo àti ìdájọ́ òtítọ́ fún gbogbo àwọn tí a ń ni lára.

⁷Ó fi ọ̀nà rẹ̀ hàn fún Mose, ìṣe rẹ̀ fún àwọn ọmọ Israẹli. ⁸Baba wa jẹ́ aláàánú àti olóore ọ̀fẹ́, ó lọ́ra láti bínú, ó sì pọ̀ ní ìfẹ́ májẹ̀mú. ⁹Kì yóò máa bá ni wí nígbà gbogbo, bẹ́ẹ̀ ni kì yóò pa ìbínú rẹ̀ mọ́ títí láé. ¹⁰Kò bá wa lò gẹ́gẹ́ bí ẹ̀ṣẹ̀ wa, bẹ́ẹ̀ ni kò san án fún wa gẹ́gẹ́ bí àìṣedéédéé wa. ¹¹Nítorí bí ọ̀run ti ga tó lórí ayé, bẹ́ẹ̀ ni ìfẹ́ májẹ̀mú rẹ̀ pọ̀ tó sí àwọn tí ó bẹ̀rù rẹ̀; ¹²bí ìlà oòrùn ti jìnnà sí ìwọ̀ oòrùn tó, bẹ́ẹ̀ ni Baba wa ti mú ẹ̀ṣẹ̀ wa kúrò lọ́dọ̀ wa tó.

¹³Bí ọkàn baba ṣe ń yọ́ sí àwọn ọmọ rẹ̀, bẹ́ẹ̀ ni ọkàn Baba wa ń yọ́ sí àwọn tí ó bẹ̀rù rẹ̀. ¹⁴Nítorí ó mọ bí a ṣe dá wa; ó rántí pé erùpẹ̀ ni wá. ¹⁵Ọjọ́ ènìyàn dàbí koríko; ó ń gbilẹ̀ bí ìtànná inú pápá; ¹⁶nítorí afẹ́fẹ́ ń kọjá lórí rẹ̀, ó sì lọ, ibi rẹ̀ kò sì ní rántí rẹ̀ mọ́. ¹⁷Ṣùgbọ́n ìfẹ́ májẹ̀mú Baba wa wà láti ayérayé títí dé ayérayé sí àwọn tí ó bẹ̀rù rẹ̀, àti òdodo rẹ̀ sí àwọn ọmọ ọmọ, ¹⁸sí àwọn tí ń pa májẹ̀mú rẹ̀ mọ́, tí wọ́n sì ń rántí láti ṣe àṣẹ rẹ̀.

¹⁹Baba wa ti fìdí ìtẹ́ rẹ̀ múlẹ̀ ní ọ̀run, ìjọba rẹ̀ sì ń ṣàkóso lórí ohun gbogbo.

²⁰Ẹ fi ìbùkún fún Baba wa, ẹ̀yin angẹli rẹ̀, ẹ̀yin alágbára tí ń ṣe ọ̀rọ̀ rẹ̀, tí ẹ ń gbọ́ràn sí gbogbo ọ̀rọ̀ rẹ̀! ²¹Ẹ fi ìbùkún fún Baba wa, gbogbo ọmọ ogun rẹ̀, ẹ̀yin ìránṣẹ́ rẹ̀ tí ń ṣe ìfẹ́ rẹ̀! ²²Ẹ fi ìbùkún fún Baba wa, gbogbo iṣẹ́ rẹ̀, ní gbogbo ibi ìjọba rẹ̀. Fi ìbùkún fún Baba wa, ìwọ ọkàn mi!