Yabi Ubanmu, ya Raina

Ta Dawuda.

Jerin alherai na Ubanmu ne da ba za a manta da su ba — an gafarta zunubai, an warkar da cututtuka, an fanshi rai daga rami. A tsakiyarsa akwai kwatanci: kamar yadda zuciyar uba take kai wa ga 'ya'yansa, haka tasa take kai wa gare mu. Yana tunawa cewa mu ƙura ne.

Babi na 103.

Yabi Ubanmu, ya raina; dukan abin da yake cikina kuma, yă yabi sunansa mai tsarki!

Yabi Ubanmu, ya raina, kada kuma ka manta da ko ɗaya daga cikin alheransa, wanda yake gafarta dukan zunubanka, wanda yake warkar da dukan cututtukanka, wanda yake fansar ranka daga kabari, wanda yake naɗa maka rawanin madawwamiyar ƙauna da jinƙai, wanda yake ƙosar da kai da abubuwa masu kyau muddin kana da rai, don a sabunta ƙuruciyarka kamar ta gaggafa.

Ubanmu yana aikata adalci da shari'a ta gaskiya domin dukan waɗanda ake zaluntarsu.

Ya sanar wa Musa hanyoyinsa, ayyukansa kuwa ga mutanen Isra'ila. Ubanmu mai jinƙai ne da kuma alheri, mai jinkirin fushi, mai yawan madawwamiyar ƙauna. Ba zai yi zargi kullum ba, ba kuma zai riƙe fushinsa har abada ba. Ba ya yi da mu bisa ga zunubanmu ba, ba ya kuma saka mana bisa ga laifofinmu ba. Gama kamar yadda sammai suke can bisa duniya, haka girman madawwamiyar ƙaunarsa yake ga masu tsoronsa; kamar yadda gabas take da nisa daga yamma, haka Ubanmu ya kawar da zunubanmu daga gare mu.

Kamar yadda uba yake tausaya wa 'ya'yansa, haka Ubanmu yake tausaya wa masu tsoronsa. Gama ya san yadda aka halicce mu; ya tuna cewa mu ƙura ne. Kwanakin mutum kamar ciyawa suke; yana hudawa kamar furen jeji; gama iska ta wuce a kansa, sai ya ƙare, wurinsa kuma ba ya ƙara saninsa ba. Amma madawwamiyar ƙaunar Ubanmu tana nan daga madawwami har madawwami ga masu tsoronsa, adalcinsa kuma ya kai ga 'ya'yan 'ya'ya, ga waɗanda suke kiyaye alkawarinsa, suke kuma tunawa su aikata umarnansa.

Ubanmu ya kafa gadon sarautarsa a sammai, mulkinsa kuma yana mulki a bisa dukan kome.

Ku yabi Ubanmu, ku mala'ikunsa, ku jarumai masu ƙarfi masu aikata maganarsa, kuna biyayya ga kowace kalmarsa! Ku yabi Ubanmu, dukan rundunoninsa, bayinsa masu aikata nufinsa! Ku yabi Ubanmu, dukan ayyukansa, a ko'ina a cikin mulkinsa. Yabi Ubanmu, ya raina!