Psalms 103

103 ¹Bless our Papa, my soul; and everything wey dey inside me, bless im holy name!

²Bless our Papa, my soul, and no forget any of di good things wey e do for you, ³wey dey forgive all your sins, wey dey heal all your sickness, ⁴wey dey buy back your life from di grave, wey dey put crown for your head with Covenant love and tender mercy wey dey pain belle, ⁵wey dey satisfy you with good things as long as you dey alive, so dat your young days dey fresh again like eagle own.

⁶Our Papa dey do correct-and-holy way and justice for all people wey dem dey oppress.

⁷E make Moses know im ways, e make di people of Israel know di things wey e do. ⁸Our Papa get tender mercy wey dey pain belle and e dey show grace, e no dey quick vex and im Covenant love plenty well well. ⁹E no go always dey accuse person, and e no go hold im vex forever. ¹⁰E no dey treat us according to our sins, and e no dey pay us back according to di wrong wey we do. ¹¹For as di heavens high pass di earth, na so im Covenant love big reach for people wey dey fear am; ¹²as east far from west, na so our Papa don carry our sins comot far from us.

¹³As papa heart dey pain am for im pikin dem, na so our Papa heart dey pain am for people wey dey fear am. ¹⁴For e sabi how e take mold us; e remember say na dust we be. ¹⁵Person days dey like grass; dem dey blossom like flower for bush; ¹⁶for di wind go blow pass am, and e don go, and di place wey e dey no go remember am again. ¹⁷But di Covenant love of our Papa dey from forever reach forever for people wey dey fear am, and im correct-and-holy way dey reach pikin of pikin, ¹⁸for people wey dey keep im Covenant and dey remember to do im commandments.

¹⁹Our Papa don set im throne for di heavens, and im kingdom dey rule over everything.

²⁰Bless our Papa, una im angels, una mighty ones wey dey do im word, wey dey obey every word wey e talk! ²¹Bless our Papa, all im armies, im servants wey dey do wetin e want! ²²Bless our Papa, all im works, for everywhere wey im kingdom dey. Bless our Papa, my soul!