Chwandon bi Pa om Sung
Paul na ani Pa mikphaang bi, bani lak pi heitia ong bo dinu kakhangga rinne, thumnu chong makka, raaamnu namnu makka khatle chaang zongnu makka. Maanna kamanu bi maan ding nao chup ongnu kamaisa danga, atiga basa rwan le ongnu pa danga pi teh rwe, khatle pakhatchale ding ritnu pi to mak lang maanna zingpha bi chwan to rwe diga pi baningsu thang rwe.
2 1Balangbe au anao rwan ga, anina nani khou hungnu ga bathaang maaknu bi make dinu nani bahakna theiye. 2Atiyeda nani theinu danga, anina Philippi bi riangre dou thangga siaga to thang beida, kanatnu maitwang dou peida, Baom sacham nani khou rin lang ani Pa khou anina sung raang paan rwe. 3Balangbe ani om hweininu ga kakoinu mak tabe bathiang maknu bina hung swaknu make, pakhatchale ding minam lang le anina karam make. 4Atiyeda ani Pa na ani ding sacham paan lang lou thang briakpina, anina hadanga rinne—mi nun pem thang lang make atiyeda ani sung phaangnu ani Pa ding pem thang lang naye. 5Nani theinu danga, anina chong basan ga kani le kabia dam make, ra-aamnu thinlem thang lang le make—ani Pa ga sake gaye. 6Anina mi nun khouna swannu ga zong dam make—nani khouna make, katei rwan khouna le make—Christa om potsin mi danga anina ani om bapu ga rangkaan thang ngam beida. 7Atiyeda anina nani lak pi sung bazaangnu toga ong rwe, nao chup ongnu kamaisana baom sa rwan ding kriangga phaang thangnu danga. 8Atibriakpina, nani ding sung khutka taraan briakpina, nani ani ding heitia lang kriangnu to briakpina, ani Pa om sacham khatchale makka ani baraan ding le nani khou pi bacham lang anina karo ongme. 9Balangbe au anao rwan ga, ani om chwan khatle riangre kanang ga nani baningsuwe: nani pakhatchale ding potrit pi thang lang make, ani Pa om sacham nani khou kasamga, anina zingpha thamlai chwan to ngaake. 10Balumsanu nani khou anina bathiangga, chongchakna khatle koi maaknu toga lung damnu ga, nani le ani Pa le sake gaye. 11Nani theinu danga, pakhat na baom sa rwan ding to danga, anina nani pakhat khat ding to rwe—nani ding kachui thangga, lozaang pi thangga khatle hweiga, 12Baom krwang talei khatle lwat liannu la nani ding kounu ani Pa khou kazak lang nani lung ding ngo.
13Hei lang bina le anina chat makka ani Pa ding swanne: ani khouna nani ngaisunu ani Pa om chong ga nanina lou thangnu kaan bi, haga mi om chong danga make atiyeda batak takka Baom chong—balumsanu nani sung bi chwan to ongnu—ga nanina bacham rwe. 14Au anao rwan ga, Judea bi Christa Jisu khou ongnu ani Pa om rupkathan bing ga nanina kanang lak pi chong rwe, balangbe banina Jihudi rwan khouna riangre dounu danga, nani bahakna le nani om mi nun khouna haba danga riangre dou rwe, 15Pukraangba Jisu khatle chongphu rwan ding athat satluga, ani ding phun swakluga, ani Pa ding pem thang maknu toga, mi bing ding le maitwang ongnu bani, 16Jentail rwan ding kan thang lang anina bani khou chong rin thang mak lang ani ding han thangga, bani om noh chaang ga chat makka pi sip ongme. Atunna bataang la balung pwan ga bani lu chung bi hung tang rwe.
Nani Mu Lat lang Taraannu
17Au anao rwan ga, bakaan toi bi—pum bina naye, sung bina make—nani khouna anina kaimaan thang beida, anina nani mai mu lang taraan taknu ga inkuga daan ongme. 18Anina nani khou hung lang bathai rwe—ei, Paul, kani kani—atiyeda Setan na ani ding han thang rwe. 19Balangbe ani Pukraangba Jisu om hungnu kaan bi, Bameithaan bi ani om baning, karonu, mak tabe lian tonu luthop ka pa-aambo? Haga nani make bo? 20O, nani ga ani om lwat liannu khatle karonu gaye.