Elija Haoeibü Langkei Shanga Laangjung Haukei
Jezebelei kaangbü ngüh che danko Elija yamlamang to meimeikei hoba hao lolo hailabü dogo sukeijakei. Khuthük hangangbü cheei hao to nyibou samkei, hoba Horeba hak, selo nyian, hoba wan phaikei, lausikei khübüa seneibü Bou akitei. Ngühlang hanbü cheei müt saolei saüenla shanga hao ngaitikei.
19 1Hobaje Ahabei Jezebel to Elijaei kümbü pendou, hoba haoei inei thuseibü pendou haitia dogo lenkei. 2Hobaje Jezebelei Elija jungto ngühlang künbou che hautiko laukei, “Ngiet ho longanga ngei kaibü langkei thuseibü shuong ka che langkei tegü akümlonga, mühghaü shuongei ngo to kho tegü kümshi hoba aei shedbou kümshi.”
3Hobaje Elija hatan meimeikei hoba haoeibü langkei shanga laangjung haukei, hoba Jihudabü Beersheba to loukei, hoba khünei haoeibü sambü apyokei. 4Lausikei haoei yamlamang to chalou che wakou hauan alongbü bunyu long phanga setkei, hoba hao lolo hailabü dogo sukeijakei. Hoba haoei laukei, “Souko kia, Abou; kü langkei peashi; ngo kü pisibou shuong toje maibou aying.”
5Hobaje haoei bunyu long phanga leketnyu yepbei. Hobaje khuthük hangangbü cheei hao to jungkei hoba laukei, “Loenashi hoba shauashi.”
6Haoei chühsikei, haoeibü khua nyangko laang kaanga ngoubü wentek che, hoba dei thung che kikei. Haoei shaukei yungkei hoba nyibou leketnyu yepbei. 7Hobaje Bou hangangbüei nyibou sepeinyu loukei hoba hao to jungkei hoba laukei, “Loenashi hoba shauashi; aishanga wakou kho no shanga yongko atshaiakei.”
8Kheijinei haoei meimeian shaukei yungkei, hoba kho shausiyung hau kingaitan chalou saonyi hoba langyang saonyi Boueibü shongh Horeb to wakou haukei.
Boueibü Ngüh Nindeibü
9Khünei haoei laangpob to atjung khünei otkei. Hobaje Boueibü ngüh hao jungto louan laukei, “No hanei ai kümda, Elija?”
10Haoei jongaikei, “Lakjaibü dan Bou shanga ngo aeibou dühko kia. Israelbü shuongei kaibü theyolanyobü abangkei, kaibü lemshang shuong netla yeikei, hoba kaibü thuseibü shuong inei haitikei. Ngo mütpemei ong joukei, hoba tou haoenei kü langkei pean lamda.”
11Bouei laukei, “Kü thedanga shongha satan loashi; ngo tou khüae soujung danlabü.” Hobaje yei yaangbü hau kibüei shongh shuong netla yeikei hoba Bou thedanga laang shuong phetnyinkei, lausikei yei jenyua hao akitei. Yei kian selo kaang nyikei, lausikei selo kaang jenyua hao akitei.
12Selo kaang kian wan che longkei, lausikei wan jenyua Bou akitei. Wan kian, ngüh nindeibü ngüh shisho che kikei.
13Hobaje Elijaei kho ditlaje, haoeibü neisimeia haoeibü thenyek sholepbei, hoba satan apan laangpob koukhüna lokei. Hobaje hao jungto ngüh cheei laukei, “No hanei ai kümda, Elija?”
14Haoei jongaikei, “Lakjaibü dan Bou shanga ngo aeibou dühko kia. Israel shousi shuongei kaibü theyolanyobü abangkei, kaibü lemshang shuong netla yeikei, hoba kaibü thuseibü shuong inei haitikei. Ngo mütpemei ong joukei, hoba tou haoenei kü langkei pean lamda.”
15Hobaje Bouei hao to laukei, “No loubü lamto sepeian Damaska yamlamang to ngaiashi; hoba khünei no Hazael to Aram thüka Choba shanga naangkushi. 16Hobaje aeilaleko Nimshieibü shou Jehu to Israel thüka Choba shanga naangkushi, hoba Abel-Meholabü Shafat shou Elisha to kaibü jeiko thuseibü shanga naangkushi. 17Hazaeleibü in ka satlabü aoei, Jehuei haitilabü; hoba Jehueibü in ka satlabü aoei, Elishaei haitilabü. 18Lausikei ngei Israela Baal to youkük akhüpetbü hoba hao to sembung ashepbü müt hajar nyet phoshanga kutilabü.”
Bouei Elisha Ngada
19Hibü Elija khüka haukei, hoba Shafat shou Elisha masu pongsu anthüknyi yoa sek mou kibü kho hapbei, haoei himshuong anthüknyi boubü to kikei. Hobaje Elijaei hao nyangko louan jembü neisimei hao thüka attikei. 20Hobaje Elishaei masu apyokei, hoba Elija phai to laangjung haukei, hoba laukei, “Ngei kübou si künyu to sembung shepbo, kheijinei ngei no phai semlabü.” Hobaje Elijaei jongaikei, “Ngaiashi, ngei ka to ai kümbei?”
21Hibü Elisha ngaikei, hoba jembü masu pongsu sungkei hoba khübü kho haitikei, hoba sek mou peisilei wa yeitiko phe nyatkei, hoba mütshuong la kukei, hoba haoenei shaukei. Kheijinei haoei Elija phai sembei, hoba hao khangenkei.
