1 இராஜாக்கள் 19

19 ¹எலியா செய்த எல்லாவற்றையும், அவன் தீர்க்கதரிசிகள் எல்லாரையும் பட்டயத்தால் கொன்றதையும் ஆகாப் யேசபேலுக்கு அறிவித்தான். ²அப்பொழுது யேசபேல் எலியாவினிடத்தில் ஒரு தூதனை அனுப்பி: “நாளை இந்நேரத்திற்குள் உன் உயிரை அந்தத் தீர்க்கதரிசிகளில் ஒருவனுடைய உயிரைப்போல ஆக்காவிட்டால், தேவர்கள் எனக்கு அதற்குச் சரியாகவும் அதற்கு அதிகமாகவும் செய்யக்கடவர்கள்” என்று சொல்லச்சொன்னாள்.

³அவன் பயந்து, எழுந்து, தன் உயிரைக் காப்பாற்ற ஓடி, யூதாவிலுள்ள பெயெர்செபாவுக்கு வந்து, தன் வேலைக்காரனை அங்கே விட்டுவிட்டான். ⁴அவன் வனாந்தரத்தில் ஒருநாள் பயணம் போய், ஒரு தனி சூரைச்செடியின் நிழலில் உட்கார்ந்து, தான் சாகவேண்டும் என்று வேண்டிக்கொண்டான். “போதும், என் பிதாவே,” என்று அவன் சொன்னான். “என் உயிரை எடுத்துக்கொள்ளும்; நான் என் பிதாக்களைப் பார்க்கிலும் நல்லவன் அல்ல.”

⁵அவன் அந்தச் சூரைச்செடியின் நிழலில் படுத்து நித்திரைபண்ணினான். அப்பொழுது ஒரு தூதன் அவனைத் தட்டி, “எழுந்து சாப்பிடு” என்றான்.

⁶அவன் பார்த்தபோது, இதோ, அவன் தலைமாட்டில் அனல் கற்களில் சுடப்பட்ட ஒரு அப்பமும் ஒரு பாத்திரம் தண்ணீரும் இருந்தது. அவன் சாப்பிட்டுக் குடித்து, திரும்பவும் படுத்துக்கொண்டான். ⁷எங்கள் பிதாவின் தூதன் இரண்டாம்முறை திரும்பிவந்து, அவனைத் தட்டி, “எழுந்து சாப்பிடு; பயணம் உனக்கு மிஞ்சிப்போயிருக்கிறது” என்றான்.

⁸அப்பொழுது அவன் எழுந்து சாப்பிட்டுக் குடித்து, அந்த ஆகாரத்தினால் பெலன்கொண்டு, எங்கள் பிதாவின் பர்வதமாகிய ஓரேப் மட்டும் நாற்பது பகலும் நாற்பது இரவும் நடந்துபோனான்.

பிதாவின் மெல்லிய சத்தம்

⁹அங்கே அவன் ஒரு கெபியில் பிரவேசித்து, அங்கே இராத்தங்கினான். அப்பொழுது எங்கள் பிதாவின் வார்த்தை அவனுக்கு உண்டாகி, “எலியாவே, இங்கே உனக்கு என்ன காரியம்?” என்று கேட்டது.

¹⁰அதற்கு அவன்: “பரலோக சேனைகளின் பிதாவாகிய உமக்காக நான் மிகுந்த பக்திவைராக்கியமாயிருந்தேன். இஸ்ரவேலர் உம்முடைய உடன்படிக்கையைத் தள்ளிவிட்டு, உம்முடைய பலிபீடங்களை இடித்து, உம்முடைய தீர்க்கதரிசிகளைப் பட்டயத்தால் கொன்றுபோட்டார்கள்; நான் ஒருவன்மாத்திரம் மீதியாயிருக்கிறேன்; இப்பொழுது அவர்கள் என் உயிரையும் வாங்கத் தேடுகிறார்கள்” என்றான்.

¹¹அப்பொழுது எங்கள் பிதா: “நீ வெளியே வந்து, பர்வதத்தில் எனக்கு முன்பாக நில்; இதோ, நான் கடந்துபோகிறேன்” என்றார். அப்பொழுது பலத்த பெருங்காற்று எழும்பி, பர்வதங்களைப் பிளந்து, கன்மலைகளை எங்கள் பிதாவுக்கு முன்பாக உடைத்துப்போட்டது; ஆனாலும் எங்கள் பிதா அந்தக் காற்றிலே இருக்கவில்லை. காற்றுக்குப்பின்பு பூமியதிர்ச்சி உண்டாயிற்று; ஆனாலும் எங்கள் பிதா அந்தப் பூமியதிர்ச்சியிலே இருக்கவில்லை.

¹²பூமியதிர்ச்சிக்குப்பின்பு ஒரு அக்கினி உண்டாயிற்று; ஆனாலும் எங்கள் பிதா அந்த அக்கினியிலே இருக்கவில்லை. அக்கினிக்குப்பின்பு, மெல்லிய மெதுவான சத்தத்தின் ஓசை உண்டாயிற்று.

¹³எலியா அதைக் கேட்டபோது, தன் சால்வையினால் தன் முகத்தை மூடிக்கொண்டு, வெளியே வந்து, கெபியின் வாசலிலே நின்றான். அப்பொழுது ஒரு சத்தம் அவனை நோக்கி: “எலியாவே, இங்கே உனக்கு என்ன காரியம்?” என்றது.

¹⁴அதற்கு அவன்: “பரலோக சேனைகளின் பிதாவாகிய உமக்காக நான் மிகுந்த பக்திவைராக்கியமாயிருந்தேன். இஸ்ரவேல் புத்திரர் உம்முடைய உடன்படிக்கையைத் தள்ளிவிட்டு, உம்முடைய பலிபீடங்களை இடித்து, உம்முடைய தீர்க்கதரிசிகளைப் பட்டயத்தால் கொன்றுபோட்டார்கள்; நான் ஒருவன்மாத்திரம் மீதியாயிருக்கிறேன்; இப்பொழுது அவர்கள் என் உயிரையும் வாங்கத் தேடுகிறார்கள்” என்றான்.

¹⁵அப்பொழுது எங்கள் பிதா அவனை நோக்கி: “நீ வந்த வழியே தமஸ்குவின் வனாந்தரத்திற்குத் திரும்பிப்போ; அங்கே போய், ஆசகேலை ஆராமின்மேல் ராஜாவாக அபிஷேகம்பண்ணு. ¹⁶நிம்சியின் குமாரனாகிய யெகூவை இஸ்ரவேலின்மேல் ராஜாவாகவும், ஆபேல்மேகோலா ஊரானாகிய சாப்பாத்தின் குமாரன் எலிசாவை உனக்குப் பதிலாகத் தீர்க்கதரிசியாகவும் அபிஷேகம்பண்ணு. ¹⁷ஆசகேலின் பட்டயத்திற்குத் தப்புகிறவனை யெகூ கொல்லுவான்; யெகூவின் பட்டயத்திற்குத் தப்புகிறவனை எலிசா கொல்லுவான். ¹⁸ஆனாலும் பாகாலுக்கு முன்பாக முழங்கால்படியிடாத, அவனை முத்தஞ்செய்யாத ஏழாயிரம்பேரை இஸ்ரவேலிலே நான் மீதியாக வைத்திருக்கிறேன்” என்றார்.

பிதாவானவர் எலிசாவை அழைக்கிறார்

¹⁹அப்பொழுது அவன் அவ்விடம்விட்டுப்போய், சாப்பாத்தின் குமாரனாகிய எலிசாவைக் கண்டான்; அவன் பன்னிரண்டு ஏர்மாடுகளை முன்னாக ஓட்டி உழுதுகொண்டிருந்தான்; அவனே பன்னிரண்டாவது ஏருடன் இருந்தான். எலியா அவன் அருகே போய், தன் சால்வையை அவன்மேல் போட்டான். ²⁰அப்பொழுது அவன் மாடுகளை விட்டு, எலியாவுக்குப் பின்னே ஓடி: “நான் என் தகப்பனையும் என் தாயையும் முத்தஞ்செய்து வழியனுப்பிவிட்டு, உம்மைப் பின்பற்றிவருகிறேன்” என்றான். அதற்கு எலியா: “திரும்பிப்போ; நான் உனக்கு என்ன செய்தேன்?” என்றான்.

²¹அப்பொழுது அவன் அவனைவிட்டுத் திரும்பிப்போய், ஒருஜோடி ஏர்மாடுகளைப் பிடித்து அடித்து, ஏர்க்கலப்பைகளை விறகாக்கி, அந்த மாம்சத்தைச் சமைத்து, ஜனங்களுக்குக் கொடுத்தான்; அவர்கள் சாப்பிட்டார்கள். பின்பு அவன் எழுந்து, எலியாவுக்குப் பின்சென்று, அவனுக்குப் பணிவிடை செய்தான்.