A Maara Gị Tupu A Mụọ Gị
Juda na-emebi ọgbụgba ndụ ma na-aga n'ala ọzọ dịka ndị a dọọrọ n'agha, ma site na Jeremaya, Nna anyị na-aga n'ihu na-ekwu okwu olileanya n'isi ụmụ Ya—ọdịnihu, ịhụnanya na-enweghị njedebe, na obi ka na-agụsi agụụ ike maka nwa nwoke ahụ wagharịrị.
1 1Okwu Jeremaya nwa Hilkaya, otu nʼime ndị nchụaja nọ nʼAnatot nʼala Benjamin. 2Okwu Nna anyị bịakwutere ya nʼoge Josaya nwa Amon, eze Juda, nʼafọ nke iri na atọ nke ọchịchị ya. 3Ọ bịakwara nʼoge Jehoiakim nwa Josaya, eze Juda, ruo nʼafọ nke iri na otu nke Zedekaya nwa Josaya, eze Juda, ruo mgbe a dọtara ndị Jerusalem nʼagha nʼọnwa nke ise. 4Okwu Nna anyị bịakwutere m, sị:
5“Tupu m akpụọ gị nʼime akpanwa, amaara m gị, tupu a mụpụtakwa gị, edoro m gị nsọ; ahọpụtara m gị ịbụ onye amụma nye mba niile.”
6Asịrị m, “Ah, Nna, Onye kachasị elu! Amaghị m otu esi ekwu okwu, nʼihi na abụ m naanị nwata.”
7Ma Nna anyị sịrị m, “Asịla, ‘Abụ m naanị okorobịa,’ nʼihi na ị ga-aga ebe ọbụla m zigara gị, kwuokwa ihe ọbụla m nyere gị nʼiwu. 8Atụla egwu ha, nʼihi na mụ na gị nọ ị napụta gị, ka Nna kwupụtara.”
9Mgbe ahụ, Nna anyị setịpụrụ aka ya, metụ ọnụ m aka, Nna anyị wee sị m, “Lee, etinyela m okwu m nʼọnụ gị. 10Lee, edoola m gị taa ka ị chịa mba niile na alaeze niile, ka ị hopu ma kwada, ka i bibie ma kwatuo, ka i wuo ma kụọ.”
11Okwu Nna anyị bịakwutere m, sị, “Gịnị ka ị na-ahụ, Jeremaya?” Asịrị m, “Ana m ahụ alaka osisi alụmọnd.”
12Mgbe ahụ, Nna anyị sịrị m, “Ị hụrụ nke ọma, nʼihi na ana m eche okwu m nche ka m mezuo ya.” a a v12 “Osisi alụmọnd” na “ichenche nche” na-ada ụda fọrọ nke nta ka ọ bụrụ otu nʼasụsụ onye amụma ahụ — egwuregwu okwu nke na-egosi na Nna anyị mụ anya nke ọma nʼelu okwu ya ime ka o mezuo.
13Okwu Nna anyị ruru m nke ugboro abụọ, sị, “Gịnị ka ị na-ahụ?” Asịrị m, “Ite na-agbọ ọkụ, nke ihu ya chere site nʼugwu.”
14Nna anyị wee sị m, “Site nʼugwu ka mbibi ga-esi daara ndị niile bi nʼala ahụ. 15Lee, ana m aga ịkpọku ikwu niile nke alaeze dị nʼugwu, ka Nna kwupụtara; ha ga-abịa, onye ọbụla ga-edozi ocheeze ya nʼọnụ ụzọ ama Jerusalem, megide mgbidi niile gbara ya gburugburu na obodo niile nke Juda. 16Aga m ekwupụta ikpe m megide ha nʼihi ajọ omume ha niile, bụ nke ha ji gbakụta m azụ, na-esurere chi ndị ọzọ ihe aja, ma na-akpọ isiala nye arụsị ha ji aka ha mee.”
17“Ugbu a, jikere onwe gị, guzoro ọtọ gwa ha ihe niile m nyere gị nʼiwu. Adala mba nʼihu ha, ma ọ bụghị ya, aga m eme ka ị daa mba nʼihu ha. 18Lee, taa, emeela m gị obodo e wusiri ike, ogidi igwe, na mgbidi bronz megide ala ahụ niile: ndị eze Juda, ndị isi ọchịchị ya, ndị nchụaja ya, na ndị mmadụ ya. 19Ha ga-ebuso gị agha ma ha agaghị emeri gị; nʼihi na mụ na gị nọ ị napụta gị, ka Nna kwupụtara.”
