Aịzik Gọziekwa Jekọb Ọzọ

E zipụrụ Jekọb ka ọ gaa chọta nwunye, ọ rahụ nʼezí na nkume dịka ohiri isi, rọọ nrọ banyere steepụ ndị mmụọ ozi juru. Nna anyị kwughachiri nkwa Ebraham nye onye na-agba ọsọ, kwe nkwa ịkpọghachi ya nʼụlọ. Jekọb tetara na-atụ egwu wee kpaa nkata.

Isi 28.

Mgbe ahụ Aịzik kpọrọ Jekọb, gọzie ya, ma nye ya iwu sị, “Alụla nwunye site nʼụmụ ada Kenan. Gaa Padan-aram, nʼụlọ Betuel, nna nne gị, lụtakwa nwunye nʼebe ahụ site nʼụmụ ada Leban, nwanne nne gị. Ka El-Shadaị—Nna gị Onye pụrụ ime ihe niile—gọzie gị, mee ka ị mịa mkpụrụ, mee ka ị baa ụba, ka ị ghọọ ọgbakọ nke ọtụtụ mba. Ka o nye gị na ụmụ ụmụ gị so gị ngọzi Ebraham, ka ị nwee ike iketa ala ebe ị bi dịka ọbịa, ala ahụ Nna anyị nyere Ebraham.”

Aịzik zipụrụ Jekọb; ọ gara Padan-aram, ikwute Leban nwa Betuel onye Aram, nwanne Ribeka, nne Jekọb na Ịsọ.

Ịsọ chọpụtara na Aịzik agọziela Jekọb ma zipụ ya na Padan-aram ka ọ lụta nwunye nʼebe ahụ, na-adọ ya aka na ntị mgbe ọ na-agọzi ya, sị, “Alụla nwunye site nʼụmụ nwanyị Kenan,” nakwa na Jekọb erubela nna ya na nne ya isi ma gawa Padan-aram. Ya mere Ịsọ hụrụ na ụmụ ada Kenan adịghị nna ya Aịzik mma nʼanya. Ya mere Ịsọ gakwuru Ịshmel ma lụta Mahalat, ada Ịshmel nwa Ebraham, nwanne Nebaiọt, ka ọ bụrụ nwunye, tinyere ndị nwunye ya ndị ọzọ.

Ụzọ E Si Aga Haran

Jekọb hapụrụ Bịasheba ma malite njem ya gawa Haran. O rutere otu ebe ma nọọ ọnọdụ abalị nʼebe ahụ, nʼihi na anyanwụ adala. O weere otu nkume nʼime nkume dị nʼebe ahụ, tinye ya nʼokpuru isi ya, ma dinaa nʼebe ahụ ịrahụ ụra. Ọ rọrọ nrọ: lee, e nwere ihe nrigo e guzobere nʼelu ụwa, elu ya ruru eluigwe, ndị mmụọ ozi nke Nna anyị nọkwa na-arịgo na-arịdakwa nʼelu ya. ^a

Lee, Nna anyị guzoro nʼelu ya, onye sịrị, “Abụ m Nna gị, Chineke nke Ebraham nna gị na nke Aịzik. Aga m enye gị na ụmụ ụmụ gị ala a ị dina nʼelu ya. Ụmụ ụmụ gị ga-adị ka ájá nke ụwa; ị ga-agbasa nʼọdịda anyanwụ, nʼọwụwa anyanwụ, nʼugwu na nʼndịda. Nʼime gị na nʼime ụmụ ụmụ gị ka a ga-agọzi ezinụlọ niile nke ụwa. Mara nke a: Mụ na gị nọ. Aga m echekwa gị ebe ọbụla ị gara, aga m akpọghachikwa gị nʼala a. Agaghị m ahapụ gị tutu ruo mgbe m mezuru ihe m kwere gị na nkwa.”

Jekọb tetara nʼụra ya ma sị, “Nʼezie Nna anyị nọ nʼebe a, mụ onwe m amaghịkwa ya!” Ụjọ tụrụ ya, ọ sị, “Lee ka ebe a si dị egwu! Nke a abụghị ihe ọzọ karịa ụlọ Nna anyị, nke a bụkwa ọnụ ụzọ ámá nke eluigwe.”

Jekọb biliri nʼisi ụtụtụ, were nkume ahụ o tinyere nʼokpuru isi ya, guzobe ya dịka ogidi, ma wụkwasị mmanụ nʼelu ya. Ọ kpọrọ ebe ahụ Betel, ọ bụ ezie na Luz bụbu aha mbụ nke obodo ahụ. ^b Jekọb kwere nkwa sị, “Ọ bụrụ na Chineke ga-anọnyere m ma chekwaa m na njem a m na-aga, nye m achịcha ka m rie na uwe ka m yiri, ma lọghachi nʼudo nʼụlọ nna m, mgbe ahụ Nna anyị ga-abụ Nna m, nkume a m guzobere dịka ogidi ga-abụkwa ụlọ Nna anyị, nʼime ihe niile ị ga-enye m, aga m ewetara gị nʼezie otu ụzọ nʼụzọ iri.”