Isaacna Jacobli Latluida Somi
Preiva̱ phākhavai chihothuiya Jacob ngalung akha khumkui sāda ayarli pizanga, kala kazingraobingna kachungkha kakā shairon akha mang shimana. Ithumwui Avāna Abrahamli kakhāngmi chi yāmkazat mi chili hāngluishita, kala ali ngaleili khuiungluishitra da ngashita. Jacobna ngacheeda thuimathukta, ngahānbaorar sāhaowa.
28 1Chieina Isaacna Jacobli ngakaoda somi, kala ali ningmida hānga, "Canaanwui sha̱nao ngarā akhali preiva̱ sāda makhuialu. 2Paddan-aramli, nava̱wui avā Bethuelwui shimli vālu; kala chili nava̱wui achinā Labanwui sha̱nao ngarā akhali preiva̱ sāda khuilu. 3El Shaddai, nawui Pangshapa Avāna nali somiranu, nali athei matheida mataisang ngasakranu, chieina na mi ashangva̱ ngasāranu. 4Abrahamli mikahai sokhami chi nali kala nava ngaso nawui ara̱-azāli miranu, chieina ithumwui Avāna Abrahamli mikahai, na ramkazata thāda kapam ngalei chi samphangra."
5Isaacna Jacobli chihovāhaowa; kala ana Paddan-aramli, Arampā Bethuelwui naomayara, Jacob eina Esauwui ava̱va̱ Rebekahwui achinā Labanli vai.
6Isaacna Jacobli somida, khavā chili khuikhavai Paddan-aramli chihovā, kala somi tharan ali ningmida, "Canaan sha̱nao ngarā akhali preiva̱ sāda makhuialu," da hāngkhami chi Esauna theihaowa; 7kala Jacobna avāva̱ eina ava̱va̱li nganāda Paddan-aramli vāhaowa kaji chila theihaowa. 8Chieina Esauna Canaanwui sha̱nao ngarā chi avāva̱ Isaacwui miktāli makaphā otna kaji theihaowa. 9Chieina Esauna Ishmaelli vaida, awui preiva̱ ngarā mazangla Abrahamwui naomayara Ishmaelwui naongalāva̱, Nebaiothwui azarva̱ Mahalathli preiva̱ sāda khui.
Haranli Shongfa
10Jacobna Beer-shebawui eina zatphokta Haranli tāmamāna. 11Ana apam akhali vāshungda chili ngayā apama, kaja zimik tunhaowa. Ana apam chiwui lunggui akha khuida akuiwui azingli haida, apam chili pizanga. 12Ana mang akha shimana: okathuili thāk akha sākā kahai, aton kazingram kāzokta, kala ithumwui Avāwui kazingraobing chiwuitungli kākāda katāda sai. a a v12 Jishuna khalattali thāk hi thāda chithei — okathui eina kazingramwui matak ngarumkhavai, awui mangā eina ithumna ithumwui Avāli rāki chi ana (John 1:51).
13Kala chiwui atungli ithumwui Avāna nganingda hānga, "I nawui Avā, navā Abraham eina Isaacwui Varena. Na kapi ngalei chi nali kala nawui ara̱-azāli mira. 14Nawui ara̱-azā chi okathuiwui chifa thāra; na zingtunshong, zingshoshong, atungshong kala azingshong mayāsangra. Nawui kala nawui ara̱-azāwui mangā eina okathuiwui shimkhur saikora sokhami ngasāra. 15Theilu: I nava ngaso lei. Na katā apam saikorali ina nali yangmira, kala ngalei hili nali latunghaowa ngasakra. Nali ngashit kahai chi ina masāranglakha eina tangda nali mahorhaimara."
16Jacobna pikakhui eina ngakarthuida hānga, "Kachangkhata ithumwui Avā apam hili leichaowa, kha ina matheimana!" 17Ana ngacheeda hānga, "Apam hi kayākha khangachee-khangachākhala! Hi ithumwui Avāwui shim maningla khangatei maningmana, kala hi kazingramwui ngaveina."
18Jacobna ngathorthak ngakarthuilaga awui akuiwui azingli haihai ngalung chi khuilaga pākra̱ sāda shuna, kala chiwui atonli thao heirora. 19Ana apam chiwui aming Bethel phokmi, chithālala keinung chi khareli Luz hosai. b b v19 Bethel manging chi "Varewui shim"; khareli keinung chi Luz da hosai. 20Jacobna khangashit akha sāda hānga, "Kalikha Vare ili ngasoda leida, iwui vāki kaji shongzāli ili yangmida, zākhavai kashakazā kala ngavaikhavai kashankachon ili khamiakha, 21kala ina ishāvāwui shimli kalā mashi khavai latungakha, chitharan ithumwui Avā iwui Avā sāra, 22kala ina pākra̱ sāda shunkahai ngalung hi ithumwui Avāwui shim sāra, kala nana ili mi saikorawui eina ina kachangkhata nali tithe khuivāra."
