ዘፍጥረት 28

28 ¹ይስሐቅም ያዕቆብን ጠርቶ ባረከው፤ እንዲህም ብሎ አዘዘው፦ “ከከነዓን ሴቶች ልጆች ሚስት አታግባ፤ ²ተነሥተህ ወደ ጳዳን አራም፣ ወደ እናትህ አባት ወደ ባቱኤል ቤት ሂድ፤ በዚያም ከእናትህ ወንድም ከላባ ሴቶች ልጆች ሚስት አግባ። ³ኤል ሻዳይ፣ ሁሉን ቻይ አባትህ፣ ይባርክህ፤ ፍሬያማም ያድርግህ፤ ያብዛህም፤ የሕዝቦችም ማኅበር ትሆናለህ። ⁴አባታችን ለአብርሃም የሰጠውን፣ መጻተኛ ሆነህ የምትኖርበትን ምድር ትወርስ ዘንድ፣ የአብርሃምን በረከት ለአንተና ከአንተ ጋራ ላለው ዘርህ ይስጥህ።”

⁵ይስሐቅም ያዕቆብን ሰደደው፤ እርሱም የያዕቆብና የዔሳው እናት ወደ ሆነችው ወደ ርብቃ ወንድም፣ ወደ አራማዊው ባቱኤል ልጅ ወደ ላባ፣ ወደ ጳዳን አራም ሄደ።

⁶ዔሳውም ይስሐቅ ያዕቆብን እንደ ባረከውና ከዚያ ሚስት እንዲያገባ ወደ ጳዳን አራም እንደ ሰደደው፣ ሲባርከውም፦ “ከከነዓናውያን ሴቶች ሚስት አታግባ” ብሎ እንዳዘዘው አወቀ፤ ⁷ያዕቆብም አባቱንና እናቱን ታዝዞ ወደ ጳዳን አራም እንደ ሄደ አወቀ። ⁸ዔሳውም የከነዓን ሴቶች ልጆች በአባቱ በይስሐቅ ዘንድ የማያስደስቱ መሆናቸውን አየ። ⁹ስለዚህ ዔሳው ወደ እስማኤል ሄዶ፣ ከነበሩት ሚስቶቹ በተጨማሪ የአብርሃም ልጅ የእስማኤል ልጅ፣ የናባዮትን እኅት ማኅላትን አገባ።

ወደ ካራን የሚወስደው መንገድ

¹⁰ያዕቆብም ከቤርሳቤህ ወጥቶ ወደ ካራን ተጓዘ። ¹¹ፀሐይም ጠልቃ ስለ ነበር ወደ አንድ ስፍራ ደርሶ በዚያ አደረ። ከዚያ ስፍራ ድንጋዮች አንዱን ወስዶ ተንተርሶ፣ ለመተኛት በዚያ ስፍራ ተኛ። ¹²ሕልምም አየ፤ እነሆ፣ በምድር ላይ የቆመ መሰላል ነበር፤ ጫፉም ወደ ሰማይ ደርሶ ነበር፤ የአባታችንም መላእክት በእርሱ ሲወጡና ሲወርዱ ነበሩ። ^a a v12 ኢየሱስ ራሱን ይህ መሰላል እንደ ሆነ ይገልጣል፤ ይኸውም በምድርና በሰማይ መካከል ያለው ግንኙነት፣ ወደ አባታችን የምንመጣበት እርሱ ነው (ዮሐንስ 1፥51)።

¹³እነሆም፣ አባታችን ከበላዩ ቆሞ እንዲህ አለ፦ “አባትህ እኔ ነኝ፤ የአባትህ የአብርሃም አምላክ፣ የይስሐቅም አምላክ እኔ ነኝ። የተኛህባትን ምድር ለአንተና ለዘርህ እሰጣለሁ። ¹⁴ዘርህም እንደ ምድር አፈር ይሆናል፤ ወደ ምዕራብና ወደ ምሥራቅ፣ ወደ ሰሜንና ወደ ደቡብ ትስፋፋለህ። በአንተና በዘርህም የምድር ወገኖች ሁሉ ይባረካሉ። ¹⁵እነሆ፣ ከአንተ ጋራ ነኝ፤ በምትሄድበትም ሁሉ እጠብቅሃለሁ፤ ወደዚችም ምድር እመልስሃለሁ። የተናገርሁህን እስካደርግ ድረስ አልተውህም።”

¹⁶ያዕቆብም ከእንቅልፉ ነቅቶ፣ “በእውነት አባታችን በዚህ ስፍራ አለ፤ እኔ ግን አላወቅሁም” አለ። ¹⁷ፈርቶም፣ “ይህ ስፍራ እንዴት የሚያስፈራ ነው! ይህ ከአባታችን ቤት በቀር ሌላ አይደለም፤ ይህም የሰማይ ደጅ ነው” አለ።

¹⁸ያዕቆብም ማልዶ ተነሥቶ፣ ተንተርሶት የነበረውን ድንጋይ ወስዶ ዐምድ አድርጎ አቆመው፤ በላዩም ላይ ዘይት አፈሰሰ። ¹⁹ያንም ስፍራ ቤቴል ብሎ ጠራው፤ የከተማዪቱ የቀድሞ ስም ግን ሉዝ ነበር። ^b b v19 ቤቴል ማለት “የእግዚአብሔር ቤት” ማለት ነው፤ ከተማዪቱ ቀድሞ ሉዝ ትባል ነበር። ²⁰ያዕቆብም እንዲህ ብሎ ተሳለ፦ “እግዚአብሔር ከእኔ ጋራ ቢሆን፣ በምሄድበትም በዚህ መንገድ ቢጠብቀኝ፣ የምበላውን እንጀራና የምለብሰውን ልብስ ቢሰጠኝ፣ ²¹ወደ አባቴም ቤት በሰላም ብመለስ፣ አባታችን አባቴ ይሆናል፤ ²²ዐምድ አድርጌ ያቆምሁትም ይህ ድንጋይ የአባታችን ቤት ይሆናል፤ ከምትሰጠኝም ሁሉ ለአንተ ዐሥራትን በእርግጥ አመጣለሁ።”