ይስሓቅ ንያእቆብ መሊሱ ባረኾ

ያእቆብ ሰበይቲ ክደሊ ተሰዲዱ፥ እምኒ ኣብ ትሕቲ ርእሱ ገይሩ ኣብ ምድሪ ሓደረ፥ መላእኽቲ ዝበዝሕዎ መሳልል ድማ ሓለመ። ኣቦና ድማ ነቲ መብፅዓ ኣብርሃም ነቲ ህዱም ደገመሉ፥ ናብ ቤቱ ኽመልሶ ኸዓ ተመባፅዓሉ። ያእቆብ ፈሪሑ ተበራበረ፥ መብፅዓ ኸዓ ተመባፅዐ።

ምዕራፍ 28።

ሽዑ ይስሓቅ ንያእቆብ ፀዊዑ ባረኾ፤ ኣዘዞ ድማ፦ “ካብ ኣዋልድ ከነዓን ሰበይቲ ኣይትእቶ። ናብ ማእኸል ክልተ ሩባታት፥ ናብ ቤት ባቱኤል ኣቦ እኖኻ ኺድ፤ ካብ ኣዋልድ ላባ ሓው እኖኻ ድማ ኣብኡ ሰበይቲ ኣእቱ። ኤልሻዳይ፥ ዅሉ ዝኽእል ኣቦኻ፥ ይባርኽካ፤ የፍርየካን የብዝሐካን፤ ማሕበር ህዝብታት ድማ ኽትከውን። ኣብታ ጓና ኾይንካ እትነብረላ ምድሪ፥ ነታ ኣቦና ንኣብርሃም ዝሃቦ ምእንቲ ኽትወርሳ፥ በረኸት ኣብርሃም ንኣኻን ምሳኻ ንዘርእኻን ይሃብካ።”

ይስሓቅ ድማ ንያእቆብ ሰደዶ፤ ንሱ ኸዓ ናብ ማእኸል ክልተ ሩባታት፥ ናብ ላባ ወዲ ባቱኤል ሶርያዊ፥ ሓው ርብቃ እኖ ያእቆብን ኤሳውን ከደ።

ኤሳው ድማ ይስሓቅ ንያእቆብ ባሪኹ፥ ካብኡ ሰበይቲ ኽወስድ ናብ ማእኸል ክልተ ሩባታት ከም ዝሰደዶ፥ ክባርኾ እንተሎ ኸዓ “ካብ ኣዋልድ ከነዓን ሰበይቲ ኣይትእቶ” ኢሉ ኸም ዝኣዘዞ ረአየ፤ ያእቆብ ድማ ነቦኡን ነእኖኡን ተኣዚዙ ናብ ማእኸል ክልተ ሩባታት ከም ዝኸደ ረአየ። ኤሳው ከዓ ኣዋልድ ከነዓን ነቦኡ ይስሓቅ ዘየሐጕሳኦ ከም ዝኾና ረአየ። ስለዙይ ኤሳው ናብ እስማኤል ከይዱ፥ ብዘይ እተን ካልኦት ኣንስቱ፥ ንማሓላት ጓል እስማኤል ወዲ ኣብርሃም ሓፍቲ ነባዮት ሰበይቲ ወሰዳ።

እታ ናብ ካራን እትወስድ መንገዲ

ያእቆብ ድማ ካብ ቤርሳቤህ ወፂኡ ናብ ካራን ኣምርሐ። ፀሓይ ስለ ዝዓረበት ድማ ኣብ ሓንቲ ቦታ በፂሑ ሓደረ። ካብ ኣእማን እታ ቦታ ድማ ሓደ ወሲዱ ኣብ ትሕቲ ርእሱ ኣንበሮ፤ ኣብታ ቦታ እቲኣ ኸዓ ክድቅስ ደቀሰ። ሕልሚ ኸዓ ሓለመ፦ እንሆ፥ ኣብ ምድሪ ዝቘመ መሳልል፥ ርእሱ ድማ ናብ ሰማይ ዝበፅሕ ነበረ፤ መላእኽቲ ኣቦና ከዓ ኣብኡ ይድይቡን ይወርዱን ነበሩ። ^a

እንሆ ድማ ኣብ ልዕሊኡ እግዚኣብሄር ደው ኢሉ ኸምዙይ በለ፦ “ኣነ ኣቦኻ፥ ኣምላኽ ኣብርሃም ኣቦኻን ኣምላኽ ይስሓቅን እየ። እታ ደቂስካላ ዘለኻ ምድሪ ድማ ንኣኻን ንዘርእኻን ክህበኩም እየ። ዘርእኻ ድማ ከም ሓመድ ምድሪ ክኸውን እዩ፤ ንስኻ ኸዓ ናብ ምዕራብ፥ ምብራቕ፥ ሰሜን፥ ደቡብ ክትዝርጋሕ ኢኻ። ኣህዛብ ኵላ ምድሪ ድማ ብኣኻን ብዘርእኻን ክባረኹ እዮም። እንሆ፥ ኣነ ምሳኻ እየ፤ ናብ ዝኸድካዮ ድማ ክሕልወካ፥ ናብዛ ምድሪ እዚኣ ኸዓ ክመልሰካ እየ። ነቲ እተዛረብኩኻ ኽሳዕ ዝገብሮ ኣይሓድገካን እየ።”

ያእቆብ ድማ ካብ ድቃሱ ተበራበረ እሞ “ብሓቂ ኣቦና ኣብዛ ቦታ እዚኣ ኣሎ፤ ኣነ ግና ኣይፈለጥኩን!” በለ። ፈሪሑ ድማ “እዛ ስፍራ እዚኣ ኽሳዕ ክንደይ ዘፍርህ እያ! እዚኣ ገዛ ኣቦናስ ደኣ እያ እምበር ካልእ ኣይኮነትን፤ እዚኣ ኸዓ ኣፍደገ ሰማይ እያ” በለ።

ያእቆብ ድማ ኣንጊሁ ተሲኡ ነቲ ኣብ ትሕቲ ርእሱ ዘንበሮ እምኒ ወሰዶ፤ ሓወልቲ ጌሩ ኣቘሞ፤ ኣብ ርእሱ ድማ ዘይቲ ኣፍሰሰ። ነታ ቦታ እቲኣ ኸዓ “ቤቴል” ኢሉ ሰመያ፤ ቀደም ግና እታ ኸተማ ሎዛ ትብሃል ነበረት። ^b ያእቆብ ድማ ከምዙይ ኢሉ ተመባፅዐ፦ “እግዚኣብሄር ምሳይ እንተ ኾይኑ፥ በዛ ዝኸዳ ዘለኹ መንገዲ ድማ እንተ ሓለወኒ፥ ዝበልዖ እንጀራን ዝኽደኖ ክዳንን እንተ ሃበኒ፥ ናብ ቤት ኣቦይ ድማ ብደሓን እንተ ተመሊሰ፥ ሽዑ ኣቦና ኣቦይ ክኸውን እዩ፤ እዝ ሓወልቲ ጌረ ዘቘምክዎ እምኒ እዙይ ድማ ቤት ኣቦና ክኸውን እዩ፤ ካብቲ እትህበኒ ዅሉ ኸዓ ብርግፅ ዓስራት ከምፅኣልካ እየ።”