Ezra 5

5 ¹Unya ang mga propetang si Haggeo ug si Zacarias nga anak ni Iddo nanagna ngadto sa mga Judio sa Juda ug sa Jerusalem, sa ngalan sa atong Amahan, ang Dios sa Israel, nga anaa kanila. ²Unya si Zerubabel nga anak ni Sealtiel ug si Jeshua nga anak ni Jozadak mitindog ug misugod sa pagtukod pag-usab sa balay sa atong Amahan sa Jerusalem, ug uban kanila ang mga propeta sa atong Amahan, nga nagpalig-on kanila.

³Unya si Tatenai, ang gobernador sa Tabok-sa-Suba, si Shetar-bozenai, ug ang ilang mga kauban miabot ug nangutana, “Kinsa ang naghatag kaninyog pagtugot sa pagtukod niini nga balay ug paghuman niini nga tinukod?” ⁴Nangutana usab sila, “Unsa ang mga ngalan sa mga lalaki nga nagtukod niini nga tinukod?” ⁵Apan ang mata sa ilang Amahan nagbantay sa mga anciano sa mga Judio, busa walay nakapaundang kanila hangtod nga ang maong butang nakaabot kang Dario ug mibalik ang tubag nga sinulat.

Usa ka Sulat ngadto kang Haring Dario

⁶Kopya sa sulat nga gipadala ni Tatenai, ang gobernador sa Tabok sa Suba, ug ni Shetar-bozenai uban sa iyang isigka-opisyal sa Tabok sa Suba, ngadto kang Haring Dario. ⁷Nagpadala sila kaniyag taho nga nagkanayon: Ngadto kang Haring Dario, hingpit nga kalinaw.

⁸Hibaloi, hari: miadto kami sa probinsya sa Juda, ngadto sa balay sa bantogang Dios. Gitukod kini gamit ang dagkong mga bato, ug ang mga troso gipahimutang sa mga paril. Ang buluhaton nagpadayon nga makugihon ug milambo sa ilang mga kamot. ⁹Busa nangutana kami sa mga anciano, “Kinsa ang naghatag kaninyog pagtugot sa pagtukod niini nga balay ug paghuman niini nga tinukod?” ¹⁰Nangutana usab kami sa ilang mga ngalan, aron ipahibalo kanimo, ug aron itala ang mga ngalan sa ilang mga pangulo. ¹¹Mitubag sila kanamo, “Kami mga alagad sa among Amahan, ang Dios sa langit ug sa yuta, ug gitukod namo pag-usab ang balay nga gitukod ug nahuman daghang katuigan na ang milabay sa usa ka bantogang hari sa Israel. ¹²Apan tungod kay gipasuko sa among mga katigulangan ang among Amahan, ang Dios sa langit, gitugyan niya sila ngadto kang Nabucodonosor nga Babilonhon, ang hari sa Babilonia, nga maoy milaglag niini nga balay ug nagbihag sa katawhan ngadto sa Babilonia. ¹³Apan sa unang tuig ni Ciro nga hari sa Babilonia, si Haring Ciro nagmando nga tukoron pag-usab kini nga balay sa among Amahan. ¹⁴Si Haring Ciro usab nagpakuha gikan sa templo sa Babilonia sa bulawan ug plata nga mga sudlanan sa balay sa among Amahan nga gikuha ni Nabucodonosor gikan sa templo sa Jerusalem ug gidala ngadto sa templo sa Babilonia. Gihatag niya kini ngadto sa usa nga ginganlag Sesbazar, nga iyang gitudlo nga gobernador, ¹⁵nga nag-ingon kaniya, ‘Kuhaa kini nga mga sudlanan, adto ug ibutang kini sa templo sa Jerusalem, ug tukoron pag-usab ang balay sa Dios diha sa dapit niini.’ ¹⁶Unya kini nga si Sesbazar miabot ug mipahimutang sa mga patukoranan sa balay sa among Amahan sa Jerusalem; sukad niadto hangtod karon gitukod gihapon kini, nga wala pa mahuman.”

¹⁷Busa, kon mouyon ang hari, pangitaa diha sa harianong mga talaan sa Babilonia, aron masuta kon si Haring Ciro nagmando ba nga tukoron pag-usab kini nga balay sa Dios sa Jerusalem. Unya ipadala sa hari kanamo ang iyang hukom mahitungod niini nga butang.