Amar Pitri laga Ghor Aru Bona
Haggai aru Zechariah pora utsah pai kene, Zerubbabel aru Jeshua pora aru ekbar bonabole shuru korise. Shasonkorta Tattenai pora kun pora hukum dise koi kene janibole mangise, kintu taikhan laga Pitri laga chokhu buzurg khan uporte thaka karne, kun bhi taikhan ke rukabo para nai. Darius ke diya Tattenai laga khobor te kintu raja laga purana kagoj khan bisaribo koi kene he mangise.
5 1Tetiya bhabobadi Haggai aru Iddo laga chokra Zechariah pora Judah aru Jerusalem te thaka Yehudi khan ke, amar Pitri, Israel laga Isor laga nam te, tarkhan uporte bhabobani koise. 2Tetiya Shealtiel laga chokra Zerubbabel aru Jozadak laga chokra Jeshua uthi kene Jerusalem te amar Pitri laga ghor aru bona shuru korise, aru amar Pitri laga bhabobadi khan tarkhan logot thaki kene tarkhan ke modot kori thakise.
3Tetiya Nodi-paar laga governor Tattenai, Shethar-bozenai, aru tarkhan laga sathi khan ahhi kene hudise, “Kun pora tumikhan ke eitu ghor bona aru eitu kaam khotom koribole hukum dise?” 4Tarkhan aru hudise, “Eitu ghor bona manuh khan laga nam ki ase?” 5Kintu tarkhan laga Pitri laga suku Yehudi bura khan uporte sai thakise, karne kun bhi tarkhan ke roka nai, jitia tak kotha tu Darius logot punchise aru likha jawab wapas ahhise.
Raja Darius ke Ekta Chithi
6Nodi-paar laga governor Tattenai, aru Shethar-bozenai aru tar logote Nodi-paar laga adhikari khan pora Raja Darius ke pathai diya chithi laga copy eitu ase. 7Tarkhan tar ke eneka likha khobor pathaise: Raja Darius ke, pura shanti hobi.
8Raja, jani lobi: amikhan Judah laga desh te, mohan Isor laga ghor te jaise. Eitu dangor pathor khan pora bona ase, aru dewar te khuri khan lagai ase. Kaam tu mon di kene kori ase aru tarkhan laga hath te bhal pora bari ase. 9Karne amikhan bura khan ke hudise, “Kun pora tumikhan ke eitu ghor bona aru eitu kaam khotom koribole hukum dise?” 10Amikhan apuni ke janabole karne tarkhan laga nam bhi hudise, aru cholawta khan laga nam likhibole karne. 11Tarkhan amikhan ke jawab di kene koise, “Amikhan amar Pitri, sorgo aru prithibi laga Isor laga noukar ase, aru bisi saal age te Israel laga ekjon dangor raja pora bona aru khotom kora ghor tu amikhan aru bona ase. 12Kintu amar purbo-manuh khan pora amar Pitri, sorgo laga Isor ke khong uthai diya karne, Tar pora tarkhan ke Babylon laga raja, Babylon manuh Nebuchadnezzar laga hath te di dise, aru tai eitu ghor khotom kori dise aru manuh khan ke Babylon te dhori loi jaise. 13Kintu Babylon laga raja Cyrus laga prothom saal te, raja Cyrus pora amar Pitri laga eitu ghor aru bonabole hukum dise. 14Nebuchadnezzar pora Jerusalem laga mondir pora loi kene Babylon laga mondir te dhori loi jiya amar Pitri laga ghor laga suna aru chandi laga saman khan, raja Cyrus pora Babylon laga mondir pora anise. Aru tai eitu khan Sheshbazzar koi kene matiya ekjon ke dise, jun ke tai governor bonaise, 15aru tar ke koise, ‘Eitu saman khan loi lobi, jai kene Jerusalem laga mondir te rakhibi, aru Isor laga ghor tu tar nijor jagate aru bonabi.’ 16Tetiya eitu Sheshbazzar ahhi kene Jerusalem te amar Pitri laga ghor laga mojbut bona jaga rakhise; hei somoi pora etiya tak eitu bona ase, etiya bhi khotom huwa nai.”
17Karne, jodi raja khushi ase, tene hole Babylon te thaka raja laga likha-kitab khan te bisari lobi, raja Cyrus pora Jerusalem te thaka Isor laga eitu ghor aru bonabole hukum disilo na nai eitu sabole. Tetiya raja pora eitu kotha uporte tar faisla amikhan ke pathai dibi.