Esra 5

5 ¹Nígbà náà ni àwọn wòlíì Hagai àti Sekariah ọmọ Iddo sọtẹ́lẹ̀ fún àwọn Júù ní Judah àti Jerusalemu, ní orúkọ Baba wa, Ọlọ́run Israẹli, tí ń bẹ lórí wọn. ²Nígbà náà ni Serubbabeli ọmọ Ṣealtieli àti Jeṣua ọmọ Josadaki dìde, wọ́n sì bẹ̀rẹ̀ sí í tún ilé Baba wa kọ́ ní Jerusalemu, àwọn wòlíì Baba wa wà pẹ̀lú wọn, wọ́n ń ràn wọ́n lọ́wọ́.

³Nígbà náà ni Tatenai, gómìnà Ìkọjá-Odò, Ṣetari-bosenai, àti àwọn ẹgbẹ́ wọn wá, wọ́n sì béèrè pé, “Ta ni ó fún yín láṣẹ láti kọ́ ilé yìí àti láti parí ìkọ́lé yìí?” ⁴Wọ́n tún béèrè pé, “Kí ni orúkọ àwọn ọkùnrin tí ń kọ́ ilé yìí?” ⁵Ṣùgbọ́n ojú Baba wọn ń ṣọ́ àwọn àgbàgbà Júù, nítorí náà kò sí ẹni tí ó dá wọn dúró títí ọ̀rọ̀ náà fi dé ọ̀dọ̀ Dariusi, tí ìdáhùn tí a kọ sílẹ̀ sì padà.

Lẹ́tà kan sí Dariusi Ọba

⁶Ẹ̀dà lẹ́tà tí Tatenai, gómìnà Ìkọjá-Odò, àti Ṣetari-bosenai pẹ̀lú àwọn alábàáṣiṣẹ́pọ̀ rẹ̀ ní Ìkọjá-Odò fi ránṣẹ́ sí Dariusi Ọba. ⁷Wọ́n fi ìròyìn ránṣẹ́ sí i tí ó kà báyìí pé: Sí Dariusi Ọba, àlàáfíà pípé.

⁸Kí ọba kí ó mọ̀ pé: àwa lọ sí ìpínlẹ̀ Judah, sí ilé Ọlọ́run ńlá. A ń fi òkúta ńláńlá kọ́ ọ, a sì ń tẹ́ igi sára ògiri. Iṣẹ́ náà ń tẹ̀síwájú pẹ̀lú àìsinmi, ó sì ń gbilẹ̀ ní ọwọ́ wọn. ⁹Nítorí náà a béèrè lọ́wọ́ àwọn àgbàgbà pé, “Ta ni ó fún yín láṣẹ láti kọ́ ilé yìí àti láti parí ìkọ́lé yìí?” ¹⁰A tún béèrè orúkọ wọn, kí a lè sọ fún ọ, àti láti kọ orúkọ àwọn olórí sílẹ̀. ¹¹Wọ́n dá wa lóhùn pé, “Àwa ni ìránṣẹ́ Baba wa, Ọlọ́run ọ̀run àti ayé, àwa sì ń tún ilé náà kọ́ tí ọba ńlá kan ní Israẹli kọ́, tí ó sì parí ní ọ̀pọ̀lọpọ̀ ọdún sẹ́yìn. ¹²Ṣùgbọ́n nítorí tí àwọn baba ńlá wa mú Baba wa bínú, Ọlọ́run ọ̀run, ó fi wọ́n lé Nebukadnessari ará Babeli lọ́wọ́, ọba Babeli, ẹni tí ó pa ilé yìí run, tí ó sì kó àwọn ènìyàn náà ní ìgbèkùn lọ sí Babeli. ¹³Ṣùgbọ́n ní ọdún kìíní Kirusi ọba Babeli, Kirusi ọba pàṣẹ pé kí a tún ilé Baba wa yìí kọ́. ¹⁴Kirusi ọba sì tún mú láti inú tẹ́mpìlì Babeli àwọn ohun èlò wúrà àti fàdákà ti ilé Baba wa tí Nebukadnessari ti kó láti inú tẹ́mpìlì ní Jerusalemu, tí ó sì kó lọ sí tẹ́mpìlì Babeli. Ó fi wọ́n fún ẹni kan tí orúkọ rẹ̀ ń jẹ́ Ṣeṣbassari, ẹni tí ó yàn ní gómìnà, ¹⁵ó sọ fún un pé, ‘Mú àwọn ohun èlò wọ̀nyí, lọ fi wọ́n sí inú tẹ́mpìlì Jerusalemu, kí a sì tún ilé Ọlọ́run kọ́ sí ipò rẹ̀.’ ¹⁶Nígbà náà ni Ṣeṣbassari yìí wá, ó sì fi ìpìlẹ̀ ilé Baba wa lélẹ̀ ní Jerusalemu; láti ìgbà náà títí di ìsinsìnyí, a ti ń kọ́ ọ, kò sì tí ì parí.”

¹⁷Nítorí náà, bí ó bá wu ọba, kí a wá inú ìwé ìrántí ọba ní Babeli, láti mọ̀ bóyá Kirusi ọba pàṣẹ pé kí a tún ilé Ọlọ́run yìí kọ́ ní Jerusalemu. Nígbà náà kí ọba fi ìpinnu rẹ̀ lórí ọ̀rọ̀ yìí ránṣẹ́ sí wa.