Asen Tebu Ki Yanglushitsü
Haggai aser Zakariai jembia melentsü agia, Zerubbabel aser Yeshuai tang yanglushitsü tenzük. Governor Tattenaii shibai iba ozüng agü ta metettsü mulung, saka parnok Tebu tenüki tamburtem madak liasü, anungji shingaia parnok meanentet. Tattenai Darius chuba dang pei yokba shitii, chuba kaketlongtem bushidaktsü sasa meshi.
5 1Anungji ainkar Haggai aser Iddo chir Zakariai, parnok madak aliba Israel Tsüngrem asen Tebu tenüng nung, Yihuda aser Yirusalem nung aliba Yihuda nunger dang shina jembi. 2Idangji Shealtiel chir Zerubbabel aser Yozadak chir Yeshuai aramesoa, Yirusalem nung asen Tebu ki yanglushitsü tenzük; asen Tebu ainkartemi parnok den, parnok tashi itdaktsü.
3Idangji Ayong Külen governor Tattenai, Shethar-bozenai aser parnok den alirtem arua asüngdang, “Shibai nenok dang iba ki yanglutsü aser iba teyangluba renemtsü ozüng agü?” 4Parnoki ano asüngdang, “Iba ki yanglurtem nisung tenüng kechi?” 5Saka parnok Tebu tenüki Yihuda nunger tamburtem dak repranga ali; anungji iba o Darius dang matong aser telangzüba shiti tanaben maru tashi, shinga nisungi parnok meanentet.
Darius Chuba Dang Shiti Ka
6Ayong Külen governor Tattenai, Shethar-bozenai aser Ayong Külen nung par yimsüsür adianutem den Darius chuba dangi yokba shiti ajizükba ya lir: 7Parnoki pa dang osang ka yok, aji nung ya zülu liasü: Darius chuba dang, tesünep ajak liang.
8Oh chuba, na metetang: onok Yihuda lima nung, Tsüngrem tulu ki dang alu. Aji lung tuluba agi yanglua alir, süngpak jara nung ayuba lir. Iba tasena meranga inyaka alir aser parnok ket nung tajunga aotsü. 9Anungji onoki tamburtem dang asüngdang, “Shibai nenok dang iba ki yanglutsü aser iba teyangluba renemtsü ozüng agü?” 10Na dang metetdaktsü asoshi, aser temeranger tenüng zülutsü asoshi, onoki ano parnok tenüng asüngdang. 11Parnoki onok dang langzü, “Onok anüng aser alima Tsüngrem asen Tebu kilir, aser alemli küm aika Israel chuba tulu kai yanglua renemba ki onoki yanglushitsü. 12Saka asenok tsüraburtemi anüng Tsüngrem asen Tebu rasadaktsü ajanga, pai parnok Babilon nunger Nebukadnezar, Babilon chuba ket nung agütsü; pai iba ki raksa, aser nüburtem Babilon limai pur ao. 13Saka Babilon chuba Sairas küm mezüngbuba nung, Sairas chubai iba asen Tebu ki yanglushitsü ta ozüng agü. 14Aser Nebukadnezari Yirusalem tenla ki nungi agia Babilon tenla kidang bener aoba asen Tebu ki hon aser taribi osettem, aji Sairas chubai Babilon tenla ki nungi agitet. Pai Sheshbazzar ta ajaba, shiba pai governor kümdakja nisung ka nem agütsü, 15pa dang ashi, ‘Iba osettem benang, Yirusalem tenla kidang oa ayuang, aser Tsüngrem ki pei linük nung yanglushidakjang.’ 16Anungji iba Sheshbazzar arua Yirusalem nung asen Tebu ki kimung renem; aji nungi tanü tashi aji yanglua alir, ano merenem.”
17Anungji, chuba temulung sangra, Yirusalem nung aliba iba Tsüngrem ki yanglushitsü ta Sairas chubai ozüng agü ma masü ta metettsü asoshi, Babilon nung aliba chuba kaket nung bushiteptsü. Idangji iba o dak chubai pei telemtetba onok dang yokang.