Seneibü Bou Chem Kümetbü
Haggai hoba Zekhariaei tetenbüei, Zerubabel hoba Jeshua sepeian chem dangla khangkei. Shumang Danjungbü governor Tatenaiei aoei kho la ngühkhüm kua dogo ngela tükdekei, lausikei haoeneibü Bou nyek jaishou shuong thüka kikei, kheijinei aoeikei haoen ahüttikei. Tatenaiei Dariu to dobü lea, Choba thanshang le kho chühletla ong welaukei.
5 1Hobaje thuseibü Haggai hoba Iddo shou Zekhariaei, seneibü Bou, Israel Mühghaü nyena, Jihuda hoba Jerusalema kibü Jihudabü to haoen thüka tetenko laukei. 2Hobaje Shealtiel shou Zerubabel hoba Jozadak shou Jeshua loenkei, hoba Jerusalema seneibü Bou chem kümla khangkei, hoba seneibü Bou thuseibü shuong haoen yoa kiko, haoen hau kingaikei.
3Hobaje Shumang Danjungbü governor Tatenai, Shethar-bozenai hoba haoeneibü jaisinasi shuong loukei, hoba haoen to phekei, “Ao aoei kan la ho chem dangla hoba ho shemjang yeila ngühkhüm kua?” 4Haoenei tokei phekei, “Ho chem dangbü müt shuongeibü namei ai ki?” 5Lausikei haoeneibü Bou nyekei Jihudabü jaishou shuong thüka chühenkei, kheijinei ho ngüh Dariu jungto longei hoba dobü jongaibü sepeinyu longai asühshongko aolakei haoen anangkei.
Dariu Choba Jungto Le
6Shumang Danjungbü governor Tatenai hoba Shethar-bozenai, haoeibü Shumang Danjungbü jaishou shuong yoa, Dariu Choba jungto dobü le chühletbü ho ki: 7Haoenei hao jungto ngühlang che hautikei, kho lea ho tegü dokei: Dariu Choba la, khümbo sangmai kishi.
8Choba, ngeashi: künei Jihuda kaonyek to, yaangbü Mühghaü chem to haukei. Ho chem kho laang yaangbüei dangda hoba kümthanga wa phokei. Kümsilei haujembo kümda hoba haoeneibü ika haükuda. 9Kheijinei künei jaishou shuong to phekei, “Ao aoei kan la ho chem dangla hoba ho shemjang yeila ngühkhüm kua?” 10No la ngetila shanga hoba leiyeibü shuongeibü namei dola shanga, künei tokei haoeneibü namei phekei. 11Haoenei kün to jongaikei, “Künei seneibü Bou, khuthük hoba kaodak Mühghaü sambü ki, hoba po juong lounyu Israel Choba yaangbou cheei dangan yeibü chem kho künei kümetda. 12Lausikei, aishanga seneibü pisibousi shuongei khuthük Mühghaü seneibü Bou khauangtikei, haoei haoen Babilon Choba Nebukadnezar Babilonbü ika kukei, hoba haoei ho chem leiluan mütshuong Babilon to langsenkei. 13Lausikei Babilon Choba Kurus shaangbou poa, Kurus Chobaei ho seneibü Bou chem kümla ngühkhüm kukei. 14Kurus Chobaei tokei, Nebukadnezarei Jerusalema lembüchem ka sungan Babilon lembüchem to künbü seneibü Bou chem hon hoba chandinam thung shuong, Babilon lembüchem ka sungbakei. Haoei khübü hao governor la yeitibü Sheshbazar nyenbü che la kukei, 15haoei hao to laukei, ‘Ho thung shuong sungjung louan Jerusalem lembüchem to phoashi, hoba Mühghaü chem kho haoeibü kishang to kümetngaitiashi.’ 16Hobaje ho Sheshbazar loukei hoba Jerusalema seneibü Bou chem chemshang phokei; khüka tat asühshongko dangyoko kida, lausikei toukei ayeikei.”
17Kheijinei, Chobaei maia longa, Kurus Chobaei Jerusalema ho Mühghaü chem kümla ngühkhüm kukei laje ngela shanga, Babilon ka kibü Choba le shuonga lamjan. Kheijinei Chobaei ho ngüh shangabü haoeibü songsido kün jungto hautishi.
