Ezira 5 FHB Father's Heart Bible™

5 ¹Nao anabii, Hagai na Zekaria mũrũ wa Ido, magĩcooka makĩratha mohoro kũrĩ Ayahudi arĩa maarĩ Juda na Jerusalemu, thĩinĩ wa rĩĩtwa rĩa Ithe witũ, o we Ngai wa Isiraeli, ũrĩa warĩ igũrũ rĩao. ²Hĩndĩ ĩyo Zerubabeli mũrũ wa Shealitieli na Jeshua mũrũ wa Jozadaki magĩũkĩra makĩambĩrĩria gwaka rĩngĩ nyũmba ya Ithe witũ kũu Jerusalemu, na anabii a Ithe witũ maarĩ hamwe nao, makĩmateithia.

³Hĩndĩ ĩyo Tatenai, barũthi wa Mũrĩmo-wa-Rũũĩ, na Shetharu-bozenai, na arĩa maatwaranaga nao, magĩũka makĩũria atĩrĩ, “Nũũ ũmũheete rũũtha rwa gwaka nyũmba ĩno na kũrĩĩkia mwako ũyũ?” ⁴Ningĩ makĩũria atĩrĩ, “Marĩĩtwa ma andũ arĩa maraaka nyũmba ĩno nĩ marĩkũ?” ⁵No riitho rĩa Ithe wao nĩrĩarangagĩra athuuri a Ayahudi, nĩ ũndũ ũcio gũtirĩ mũndũ waamagirĩrĩirie, nginya ũhoro ũcio ũgĩkinya kũrĩ Dario na macookio maandĩke magĩcooka.

Marũa kũrĩ Mũthamaki Dario

⁶Ũyũ nĩguo mũharo wa marũa marĩa Tatenai, barũthi wa Mũrĩmo wa Rũũĩ, na Shetharu-bozenai hamwe na anene arĩa maarĩ nao a Mũrĩmo wa Rũũĩ, maatũmĩire Mũthamaki Dario. ⁷Maamũtũmĩire ũhoro wandĩke ũũ: Kũrĩ Mũthamaki Dario, thaayũ mũkinyanĩru.

⁸Menya, wee mũthamaki: nĩtwathiĩte bũrũriinĩ wa Juda, nyũmbainĩ ya Ngai ũrĩa mũnene. Ĩraakwo na mahiga manene, na mbaũ ikaigwo thĩinĩ wa thingo. Wĩra ũcio nĩũrathiĩ na mbere na kĩyo na nĩũragaacĩra mookoinĩ mao. ⁹Nĩ ũndũ ũcio tũkĩũria athuuri acio atĩrĩ, “Nũũ ũmũheete rũũtha rwa gwaka nyũmba ĩno na kũrĩĩkia mwako ũyũ?” ¹⁰Ningĩ tũkĩũria marĩĩtwa mao, nĩ geetha tũkũmenyithie, na nĩ geetha twandĩke marĩĩtwa ma atongoria acio. ¹¹Nao magĩtũcookeria atĩrĩ, “Ithuĩ tũrĩ ndungata cia Ithe witũ, o we Ngai wa igũrũ na thĩ, na nĩtũraaka rĩngĩ nyũmba ĩrĩa yaakirwo na ĩkĩrĩĩkio mĩaka mĩingĩ mĩhĩtũku nĩ mũthamaki ũmwe mũnene wa Isiraeli. ¹²No tondũ maithe maitũ ma tene nĩmarakaririe Ithe witũ, o we Ngai wa igũrũ, nĩamaneanire kũrĩ Nebukadineza ũrĩa Mũbabuloni, mũthamaki wa Babuloni, ũrĩa wanangire nyũmba ĩno na agĩtaha andũ acio akĩmatwara Babuloni. ¹³No mwakainĩ wa mbere wa Kurusu mũthamaki wa Babuloni, Kurusu mũthamaki ũcio agĩatha atĩ nyũmba ĩno ya Ithe witũ yaakwo rĩngĩ. ¹⁴Ningĩ Kurusu mũthamaki ũcio akĩruta thĩinĩ wa hekaru ya Babuloni indo cia thahabu na betha cia nyũmba ya Ithe witũ iria Nebukadineza aarutĩte thĩinĩ wa hekaru ya Jerusalemu agĩcitwara hekaruinĩ ya Babuloni. Agĩcineana kũrĩ mũndũ warĩ na rĩĩtwa Sheshibaza, ũrĩa aatuĩte barũthi, ¹⁵akĩmwĩra atĩrĩ, ‘Oya indo ici, thiĩ ũcĩige hekaruinĩ ya Jerusalemu, na nyũmba ya Ngai yaakwo rĩngĩ handũ hayo.’ ¹⁶Hĩndĩ ĩyo Sheshibaza ũcio agĩũka akĩaka mĩthingi ya nyũmba ya Ithe witũ kũu Jerusalemu; kuuma hĩndĩ ĩyo nginya rĩu ĩraakwo, na ndĩrĩĩkĩtie.”

¹⁷Nĩ ũndũ ũcio, mũthamaki angĩĩtĩkĩra, nĩgũcario thĩinĩ wa maandĩko ma ũthamaki marĩa marĩ Babuloni, nĩ geetha kũmenyeke kana Mũthamaki Kurusu nĩaathanire atĩ nyũmba ĩno ya Ngai ĩrĩa ĩrĩ Jerusalemu yaakwo rĩngĩ. Naake mũthamaki nĩatũtũmĩre itua rĩake igũrũ rĩa ũhoro ũyũ.