எஸ்றா 5

5 ¹அப்பொழுது ஆகாய் என்னும் தீர்க்கதரிசியும், இத்தோவின் குமாரனாகிய சகரியா என்னும் தீர்க்கதரிசியும், யூதாவிலும் எருசலேமிலும் இருந்த யூதர்களுக்கு, இஸ்ரவேலின் தேவனாகிய எங்கள் பிதாவின் நாமத்தினாலே, அவர்கள்மேல் தீர்க்கதரிசனம் சொன்னார்கள். ²அப்பொழுது சலாத்தியேலின் குமாரனாகிய செருபாபேலும், யோசதாக்கின் குமாரனாகிய யெசுவாவும் எழும்பி, எருசலேமில் எங்கள் பிதாவின் ஆலயத்தைத் திரும்பக் கட்டத் தொடங்கினார்கள்; எங்கள் பிதாவின் தீர்க்கதரிசிகள் அவர்களோடிருந்து அவர்களுக்கு ஆதரவாயிருந்தார்கள்.

³அப்பொழுது நதிக்கு அப்புறத்திலிருந்த தேசாதிபதியாகிய தத்னாயும், சேத்தார்பொஸ்னாயும், அவர்களுடைய கூட்டாளிகளும் வந்து: இந்த ஆலயத்தைக் கட்டவும், இந்தக் கட்டிடத்தை முடிக்கவும் உங்களுக்கு உத்தரவு கொடுத்தவர் யார் என்று கேட்டார்கள். ⁴அன்றியும் அவர்கள்: இந்தக் கட்டிடத்தைக் கட்டுகிற மனிதரின் பேர்கள் என்னென்ன என்றும் கேட்டார்கள். ⁵ஆனாலும் அவர்களுடைய பிதாவின் கண் யூத மூப்பர்கள்மேல் நோக்கமாயிருந்தது; ஆகையால் இந்தக் காரியம் தரியுவுக்கு எட்டி, அதைக்குறித்து எழுத்துமூலமாய் மறுஉத்தரவு வருமட்டும் ஒருவரும் அவர்களைத் தடைசெய்யவில்லை.

தரியு ராஜாவுக்கு எழுதப்பட்ட நிருபம்

⁶நதிக்கு அப்புறத்துத் தேசாதிபதியாகிய தத்னாயும், சேத்தார்பொஸ்னாயும், நதிக்கு அப்புறத்திலிருந்த அவனுடைய உடன்உத்தியோகஸ்தரும் தரியு ராஜாவுக்கு அனுப்பின நிருபத்தின் நகல்: ⁷அவர்கள் அவனுக்கு அனுப்பின மறுஉத்தரவின் விவரமாவது: தரியு ராஜாவுக்குச் சம்பூரண சமாதானம் உண்டாவதாக.

⁸ராஜாவுக்குத் தெரியவேண்டியது என்னவென்றால்: நாங்கள் யூதாநாட்டிலிருக்கிற மகா தேவனுடைய ஆலயத்துக்குப் போனோம்; அது பெரிய கற்களால் கட்டப்படுகிறது; சுவர்களில் மரங்கள் பதிக்கப்படுகிறது; இந்த வேலை ஜாக்கிரதையாய் நடந்து, அவர்களுடைய கைகளில் வாய்க்கிறது. ⁹அப்பொழுது நாங்கள் அந்த மூப்பர்களை நோக்கி: இந்த ஆலயத்தைக் கட்டவும், இந்தக் கட்டிடத்தை முடிக்கவும் உங்களுக்கு உத்தரவு கொடுத்தவர் யார் என்று கேட்டோம். ¹⁰உமக்கு அறிவிக்கும்படிக்கும், அவர்களுடைய தலைவர்களின் பேர்களை எழுதிவைக்கும்படிக்கும், அவர்களுடைய பேர்களையும் கேட்டோம். ¹¹அதற்கு அவர்கள் எங்களுக்குப் பிரதியுத்தரமாக: நாங்கள் வானத்துக்கும் பூமிக்கும் தேவனாயிருக்கிற எங்கள் பிதாவின் ஊழியக்காரர்; அநேக வருஷங்களுக்கு முன்னே இஸ்ரவேலின் மகா ராஜா ஒருவர் கட்டி முடித்திருந்த இந்த ஆலயத்தை நாங்கள் திரும்பக் கட்டுகிறோம். ¹²ஆனாலும் எங்கள் பிதாக்கள் வானத்தின் தேவனாகிய எங்கள் பிதாவுக்குக் கோபமூட்டினபடியால், அவர் அவர்களைப் பாபிலோன் ராஜாவாகிய கல்தேயனான நேபுகாத்நேச்சாரின் கையில் ஒப்புக்கொடுத்தார்; அவன் இந்த ஆலயத்தை அழித்து, ஜனங்களைப் பாபிலோனுக்குச் சிறைபிடித்துக் கொண்டுபோனான். ¹³ஆகிலும் பாபிலோன் ராஜாவாகிய கோரேசுடைய முதலாம் வருஷத்தில், இந்த எங்கள் பிதாவின் ஆலயத்தைத் திரும்பக் கட்டவேண்டும் என்று கோரேஸ் ராஜா கட்டளையிட்டான். ¹⁴அன்றியும் நேபுகாத்நேச்சார் எருசலேமிலிருந்த ஆலயத்திலிருந்து எடுத்து, பாபிலோன் கோவிலுக்குக் கொண்டுபோயிருந்த எங்கள் பிதாவின் ஆலயத்துக்குரிய பொன் வெள்ளிப் பாத்திரங்களைக் கோரேஸ் ராஜா பாபிலோன் கோவிலிலிருந்து எடுப்பித்து, தான் தேசாதிபதியாக நியமித்த சேஸ்பாத்சார் என்னும் ஒருவனிடத்தில் ஒப்புவித்து, ¹⁵அவனை நோக்கி: நீ இந்தப் பாத்திரங்களை எடுத்துக்கொண்டுபோய், எருசலேமிலிருக்கிற தேவாலயத்திலே வை; தேவனுடைய ஆலயம் தன் ஸ்தானத்திலே திரும்பக் கட்டப்படக்கடவது என்று சொன்னான். ¹⁶அப்பொழுது இந்தச் சேஸ்பாத்சார் வந்து, எருசலேமிலிருக்கிற எங்கள் பிதாவின் ஆலயத்திற்கு அஸ்திபாரங்களைப் போட்டான்; அதுமுதல் இதுவரைக்கும் அது கட்டப்பட்டுவருகிறது, இன்னும் முடியவில்லை என்றார்கள்.

¹⁷இப்போதும் ராஜாவுக்குச் சம்மதியானால், எருசலேமிலிருக்கிற தேவனுடைய இந்த ஆலயத்தைத் திரும்பக் கட்டவேண்டும் என்று கோரேஸ் ராஜா கட்டளையிட்டது உண்டோ என்று, பாபிலோனிலுள்ள ராஜாவின் பொக்கிஷசாலையிலே தேடிப்பார்க்கப்படவேண்டும்; பின்பு இந்தக் காரியத்தைக்குறித்து ராஜா தமது தீர்மானத்தை எங்களுக்கு அனுப்பவேண்டும்.