Ani Pa om In To Thou Latnu
Haggai le Zacharias na sung za thang pi thangnu, Zerubbabel le Jeshua na in ga to thou lat lang be to rwe. Taleipuba Tattenai na tuna hei to lang ngam pi thangbo diga theilan ngaake, atiyeda bani om Pa om mik ga patso rwan lu chung bi ongnu briakpina, pakhatchana le bani ding to tan make. Tattenai na Darius khou chamthwan hiaknu bi rangkaan chamthwan zong lang khatcha ngaiye.
5 1Atiga thiamting Haggai le Iddo sa kapaisa Zacharias le na, Israel om Rikrwang ani Pa meng bi, Judah le Jerusalem bi ongnu Jihudi rwan khou bani chung bi ri chong rin swak ngaake. 2Atiga Shealtiel sa kapaisa Zerubbabel le Jozadak sa kapaisa Jeshua le na thouluga Jerusalem bi ani Pa om in ga to thou lat lang be to rwe, khatle ani Pa om thiamting rwanna bani le diga ong bachamluga bani ding paang thang ngaake.
3Atiga Tuiqwa Kasinnu taram om taleipuba Tattenai, Shethar-bozenai khatle bani om bachamnu rwan hungluga ngaiye, “Heiba in to lang khatle heiba in pum ga to loi lang tuna nani ding ngam pi thangbo?” 4Banina le ngaiye, “Heiba in to ongnu manpa rwan om meng ga pa-aambo?” 5Atiyeda bani om Pa om mikna Jihudi chwan phunnu rwan ding phaang ong ngaake, atiga haba chong ga Darius khou hungphun makka khatle hiak thangnu chong katak han hung mak basaan, pakhatchana le bani ding to tan make.
Krwang Darius Khou Chamthwan Khat
6Tuiqwa Kasinnu taram om taleipuba Tattenai khatle Shethar-bozenai, Tuiqwa Kasinnu bi baom babaan rwan le na krwang Darius khou zathang damnu chamthwan om bakatha gaye. 7Banina bakhou chamthwan khat zathang ngaake, hei danga hiak nge: Krwang Darius khou, dai bazaangnu loi to ding ngo.
8Krwang na theiyo: anina Judah taram la, kaliannu Rikrwang om in bi se ngaake. Haba in ga liannu lung bingna to ong nge, kapan bi thing bing nam thang nge. Chwan ga rakanga to ong nge khatle bani kut pi pha ong nge. 9Atiga anina chwan phunnu rwan khou ngaiye, “Heiba in to lang khatle heiba in pum ga to loi lang tuna nani ding ngam pi thangbo?” 10Anina le bani om meng ga ngai ngaake, nang khou theithang lang khatle bapuba rwan om meng ga hiak thang lang nge. 11Banina ani khou katake, “Ani ga tambaan le talei ram om Rikrwang ani Pa om chwanlaang tonu nunne, khatle sangwan tei tei kama bina Israel om krwang liannu khatna to loi thang damnu in ga anina to thou lat nge. 12Atiyeda ani pu pa rwanna tambaan om Rikrwang ani Pa ding balung pwan thang briakpina, Maanna bani ding Babylon krwang, Babylon rwan Nebuchadnezzar kut pi pi thang ngaake, maanna heiba in ding to braanluga mi nun ding Babylon la nam thou dam ngaake. 13Atiyeda Babylon krwang Cyrus om sangwan kamanu bi, Cyrus krwang na heiba ani Pa om in ding to thou lat lang chongtan pi rwe. 14Nebuchadnezzar na Jerusalem om kalum in bina louluga Babylon om kalum in la pwan hungnu, ani Pa om in om kachaak le tangka om theng bing ga le Cyrus krwang na Babylon om kalum in bina lou hungluga, taleipuba toga basak thangnu, Sheshbazzar dinu meng amnu mi khat khou pi thang ngaake, 15bakhou rinne, ‘Heiba theng bing ga louluga Jerusalem om kalum in bi se nam thangro, khatle Rikrwang om in ding baom riak la to thou lat ding ngo.’ 16Atiga heiba Sheshbazzar hungluga Jerusalem bi ani Pa om in om inphung ga dam thang rwe; haba kaan bina aniya tangga to ong nge, atun le to loi make.”
17Atiga, krwang na pemnuwe dabe, Babylon bi amnu krwang om chamthwan bing bi zong ding ngo, Cyrus krwang na Jerusalem bi amnu heiba Rikrwang om in ding to thou lat lang zathang pi dam ngaakpo diga muwo. Atiga krwang na heiba chong lang bi baom baningnu ga ani khou zathang piyo.