Kuthunguluda Nzu ya Tata wetu
Mu kusindikwa kwena Angayi yi Zakadiya, Zolubabedi yi Yesuwa báyandika kutungulula hika. Tatenayi, pfumu wa kinzunga, wáhyula nani wábaheka muswa, kaasi disu dya Tata wa bawu dyákala tala hana thandu ya bambuta, buna Ka mutu ku wábakakidikisa. Mukanda wa Tatenayi kwena Dalyusi wálomba kaka ni básanda masonuku ma kyamvu.
5 1Amana bambikudi Angayi yi Zakadiya mwana wa Ido bábikula kwena Bayuta bana ba ku Yuta yi ku Yelusalemi, mu khumbu ya Tata wetu, Nzambi wa Kiseledi, wuna wakala hana thandu ya bawu. 2Amana Zolubabedi mwana wa Salasyedi yi Yesuwa mwana wa Yozadaki bátelama amana báyandika kutungulula Nzu ya Tata wetu ku Yelusalemi, bambikudi ba Tata wetu bakala kumosi yi bawu, mu kubasadisa.
3Amana Tatenayi, pfumu wa kinzunga kya ku tseki dya nzadi, Setali-Bozenayi, yi bakwawu ba bawu bisa amana bahyudi: «Nati wuluhani muswa mu kutunga nzu yayi amana mu kumanisa thungidi yayi?» 4Bahyudi phi: «Khi khumbu za batu bana bisi tunga thungidi yayi?» 5Kaasi disu dya Tata wa bawu dyakala tala hana thandu ya bambuta ba Bayuta, buna Ka mutu ku wábakakidikisaku yikuna dyambu dina ditula kwena Dalyusi amana mvutu yasonama yavutuka.
Mukanda kwena Kyamvu Dalyusi
6Kifwani kya mukanda wuna Tatenayi, pfumu wa kinzunga kya ku tseki dya nzadi, yi Setali-Bozenayi ha kimosi yi bakwawu bandi ba kisalu ba ku tseki dya nzadi, báhitika kwena kyamvu Dalyusi. 7Báhitika kwena yandi mukanda wuna wasonama bwabu: Kwena kyamvu Dalyusi, ngemba yalungila.
8Wazaya, a kyamvu: twénda ku kinzunga kya Yuta, kuna nzu ya Nzambi wa mbuta. Yisi tungibwa mu matadi manene, miti misudika mu bibaka. Kisalu kyisi salama mu ngolu amana kyisi zyama bukheti mu moku ma bawu. 9Buna twábahyula bambuta: «Nati wuluhani muswa mu kutunga nzu yayi amana mu kumanisa thungidi yayi?» 10Twábahyula phi khumbu za bawu, hanga tukuzayisa, amana hanga tusonika khumbu za batwadisi ba bawu. 11Bátuvutwala: «Betu thwenina basadi ba Tata wetu, Nzambi wa zilu yi wa tsi, amana thwisi thunguluda nzu yina yátungama amana yámanisama tukidila mvula za lawu kwena kyamvu mosi wa mbuta wa Kiseledi. 12Kaasi mukuma batata betu basya Tata wetu mu khabu, Nzambi wa zilu, wábaheka mu moku ma Nebukadinezali mwisi Babiloni, kyamvu wa Babiloni, wuna wáwulumuna nzu yayi amana wánata batu mu kinzenza ku Babiloni. 13Kaasi mu mvula ya theti ya Silusi kyamvu wa Babiloni, Silusi kyamvu wásenda ndangu nzu yayi ya Tata wetu yathunguludibwa. 14Silusi kyamvu wábonga phi, mu nzu ya nzambi ya ku Babiloni, malonga ma wolu yi ma phalata ma nzu ya Tata wetu, mana Nebukadinezali kábonga mu nzu ya Nzambi ya ku Yelusalemi amana kánata ku nzu ya nzambi ya ku Babiloni. Wámaheka kwena mutu mosi khumbu yandi Sesebazali, wuna kásikununa pfumu wa kinzunga, 15amana wumuzimbwadi: «Bonga malonga mama, wenda masya mu nzu ya Nzambi ya ku Yelusalemi, amana yambula nzu ya Nzambi yathunguludibwa hana homa handi.» 16Buna Sesebazali yandu wisa amana wásikula mipfundila mya nzu ya Tata wetu ku Yelusalemi; tukidila mu tangwa meni tii yi lelu, yisi tungibwa, kaasi yikonda kumanisa.»
17Buna, yuka ni kyamvu kazodi, yambula basanda mu mikanda mya luyalu ya ku Babiloni, ndangu bamona yuka ni kyamvu Silusi wásenda ndangu nzu yayi ya Nzambi ya ku Yelusalemi yathunguludibwa. Buna yambula kyamvu katuhitika lubanzi lwandi mu dyambu dyadi.
