Daliyusi Wásya Mutsiku ni Kisalu Kisikila
Mukanda wa Silusi wáwanwa ku Ekebatana, amana Dalyusi, ka mu kuyamba kaka ku kisalu, kaasi wátsadisa phi mu mbongu zandi-meni amana wákandika wosu wuna kavunza kisalu. Nzu yámanisa amana yáneginwa yi kyesi, amana bana bávutuka mu kinzenza básala nkinzi wa Phasika, ni kyesi mukuma Tata wetu wábalula mbundu ya kyamvu.
6 1Amana Daliyusi, kyamvu, wáhanga mutsiku, amana básanda muna nzu ya masonuku ku Babiloni, homa hana bakala sweka bima bya thalu. 2Báwana mukanda wa kuvunga ku Ekebatana, muna mbanza ya ngolu, muna kinzunga kya Mediya, amana muna wawu másonama masonuku mama:
3Muna mvula ya theti ya kyamvu Silusi, kyamvu Silusi wáhanga mutsiku: nzu ya Nzambi ku Yelusalemi yifweti tungulula, homa ha kutambika bimenga, amana mipfundila mya yawu misíswa; kuzangana kwa yawu metele makumi vwa, kutandumuka kwa yawu metele makumi vwa, 4makaba matatu ma matadi ma mbuta yi dikaba dimosi dya miti; amana bafuta mbongu muna nzu ya mbongu za kyamvu. 5Bavutula phi malonga ma wolu yi ma manzanza ma nzu ya Nzambi, mana Nebukadinezali kábonga muna nzu ya Nzambi ku Yelusalemi amana kanata ku Babiloni; bavutudibya muna nzu ya Nzambi ku Yelusalemi, dyosu-dyosu homa hana, amana basyabya muna nzu ya Nzambi.
6Buthwena, Tatenayi, pfumu wa kinzunga kya kuna luseke lwa nzadi, yi Setali-Bozenayi, yi bakwenu ba kisalu bana kwakuna—lukala thama yi homa hana. 7Yambulenu kisalu kya nzu yayi ya Nzambi; yambulenu pfumu wa Bayuta yi bambuta ba Bayuta batungulula nzu yayi ya Nzambi homa hana. 8Yisya mutsiku wawu kikuma kya bambuta baba ba Bayuta bana bisi tungulula nzu ya Nzambi: mbongu za bawu zoosu zifútama muna nzu ya mbongu za kyamvu, tuka mu phaku za kinzunga kya kuna luseke lwa nzadi, hanga kisalu kisikila. 9Luheka banganga Nzambi bana ku Yelusalemi kyosu-kyosu kina balombele bilumbu byosu, konda kubikama: bana ba bangombi, mikoku mya bayakala, yi bana ba mikoku kikuma kya bimenga bya kuyoka kwena Nzambi wa zilu, yi masangu, mungwa, vinu, yi mafuta, 10hanga batambika bimenga bina bisi sephidisa Nzambi wa zilu, amana bálombila kikuma kya luzingu lwa kyamvu yi lwa bana bandi. 11Yisya mutsiku phi: wosu wuna wasóbula mutsiku wawu, bakatula miti muna nzu yandi, amana batombula yandi, bákhoka yandi hana wawu; amana nzu yandi yikhitulwa mbungu ya matadi kikuma kya wawu. 12Nzambi wuna wásya khumbu yandi hana, kahónda kyamvu wosu holo batu boosu bana bisi tombula koku mu kusobula mutsiku wawu holo mu kuzanga nzu yayi ya Nzambi ku Yelusalemi. Meni, Daliyusi, yihanga mutsiku wawu; ndangu usadilwa ni nswalu.
Nzu ya Tata Yámanisama
13Amana Tatenayi, pfumu wa kuna luseke lwa nzadi, yi Setali-Bozenayi, yi bakwa bawu ba kisalu, basadila kaka bwosu kyamvu Daliyusi kátuma, ni nswalu. 14Bambuta ba Bayuta bákwamina mu kutunga amana mambu máluta mboti, mu nzila ya mbikutulu ya Angayi, mbikudi, yi Zekaliya, mwana wa Ido. Bámanisa kutunga mu mutsiku wa Tata wetu, Nzambi wa Iseledi, yi mu mutsiku wa Silusi, Daliyusi, yi Atasekisi, kyamvu wa Pelesiya. 15Nzu yayi yámanisama mu kilumbu kya tatu kya ngonda Adali, muna mvula ya sambanu ya luyalu lwa kyamvu Daliyusi. a a v15 Adali yenina ngonda ya tsuka ya tangwa za Bayuta, yifwanakana yi ngonda ya Fevelye yi Malesi.
16Amana batu ba Iseledi—banganga Nzambi, balefi, yi ndambu yina yakala ya bakangadi bana bávutuka mu kinzenza—báta mukinzi wa kusambula nzu yayi ya Tata wetu, ni kyesi. 17Kikuma kya kusambula nzu yayi ya Tata wetu, bátambika bangombi khama, mikoku mya bayakala nkama zodi, bana ba mikoku nkama ziya, yi bakhombu ba bayakala kumi yi bodi hanga kimenga kya ndoluka ya masumu kikuma kya Iseledi yosu, mosi kosu kanda. 18Básya banganga Nzambi muna bimvuka bya bawu, yi balefi muna bimvuka bya bawu, kikuma kya kisalu kya Tata wetu ku Yelusalemi, bwosu básonika muna mukanda wa Moyize.
Bakangadi Bata Mukinzi wa Phaki
19Bakangadi bana bávutuka mu kinzenza báta mukinzi wa Phaki mu kilumbu kya kumi yi ya kya ngonda ya theti. 20Banganga Nzambi yi balefi bádisemisa ha kimosi, boosu básema. Báhonda mukoku wa Phaki kikuma kya bakangadi boosu bana bávutuka, yi baphangi ba bawu banganga Nzambi, yi kikuma kya bawu-meni. 21Bisi Kiseledi bana bávutuka mu kinzenza bádyadya, ha kimosi yi boosu bana badihambula mu mvindu wa makanda ma tsi mu kusanda Tata wetu, Nzambi wa Iseledi. 22Báta mukinzi wa mapha makonda muvimbu bilumbu tsambwadi ni kyesi, mukuma Tata wetu wábazadisa kyesi, amana wábalula mbundu ya kyamvu wa Asidiya kwena bawu, hanga kasyamisa moku ma bawu muna kisalu kya nzu ya Tata wetu, Nzambi wa Iseledi. b b v22 Kyamvu wa Pelesiya bisi muteza «kyamvu wa Asidiya» mukuma Pelesiya yábonga luyalu lwa Asidiya lwa thama.
