ਅਜ਼ਰਾ 6

6 ¹ਤਦ ਦਾਰਾ ਰਾਜੇ ਨੇ ਇੱਕ ਹੁਕਮ ਜਾਰੀ ਕੀਤਾ, ਅਤੇ ਬਾਬਲ ਦੇ ਉਸ ਦਸਤਾਵੇਜ਼-ਭਵਨ ਵਿੱਚ ਭਾਲ ਕੀਤੀ ਗਈ, ਜਿੱਥੇ ਖ਼ਜ਼ਾਨੇ ਰੱਖੇ ਜਾਂਦੇ ਸਨ। ²ਮਾਦਈ ਸੂਬੇ ਦੇ ਕਿਲੇ, ਅਹਮਥਾ ਵਿੱਚ ਇੱਕ ਲਪੇਟਵਾਂ ਪੱਤਰ ਲੱਭਿਆ, ਜਿਸ ਵਿੱਚ ਇਹ ਬਿਰਤਾਂਤ ਲਿਖਿਆ ਹੋਇਆ ਸੀ:

³ਕੋਰਸ਼ ਰਾਜੇ ਦੇ ਪਹਿਲੇ ਵਰ੍ਹੇ, ਕੋਰਸ਼ ਰਾਜੇ ਨੇ ਇੱਕ ਹੁਕਮ ਜਾਰੀ ਕੀਤਾ: ਯਰੂਸ਼ਲਮ ਵਿੱਚ ਪਰਮੇਸ਼ੁਰ ਦਾ ਭਵਨ ਮੁੜ ਉਸਾਰਿਆ ਜਾਵੇ, ਬਲੀਦਾਨਾਂ ਲਈ ਇੱਕ ਥਾਂ, ਉਸ ਦੀਆਂ ਨੀਹਾਂ ਬਰਕਰਾਰ ਰੱਖੀਆਂ ਜਾਣ, ਨੱਬੇ ਫੁੱਟ ਉੱਚਾ ਅਤੇ ਨੱਬੇ ਫੁੱਟ ਚੌੜਾ, ⁴ਵੱਡੇ ਪੱਥਰਾਂ ਦੀਆਂ ਤਿੰਨ ਤਹਿਆਂ ਅਤੇ ਲੱਕੜ ਦੀ ਇੱਕ ਤਹਿ; ਖ਼ਰਚ ਰਾਜੇ ਦੇ ਖ਼ਜ਼ਾਨੇ ਵਿੱਚੋਂ ਦਿੱਤਾ ਜਾਵੇ। ⁵ਨਾਲੇ, ਪਰਮੇਸ਼ੁਰ ਦੇ ਭਵਨ ਦੇ ਸੋਨੇ-ਚਾਂਦੀ ਦੇ ਭਾਂਡੇ, ਜਿਹੜੇ ਨਬੂਕਦਨੱਸਰ ਯਰੂਸ਼ਲਮ ਦੀ ਹੈਕਲ ਵਿੱਚੋਂ ਕੱਢ ਕੇ ਬਾਬਲ ਲੈ ਗਿਆ ਸੀ, ਮੋੜ ਦਿੱਤੇ ਜਾਣ—ਉਹ ਯਰੂਸ਼ਲਮ ਦੀ ਹੈਕਲ ਵਿੱਚ ਮੁੜ ਲਿਆਂਦੇ ਜਾਣ, ਹਰ ਇੱਕ ਆਪੋ-ਆਪਣੀ ਥਾਂ, ਅਤੇ ਉਹ ਪਰਮੇਸ਼ੁਰ ਦੇ ਭਵਨ ਵਿੱਚ ਰੱਖੇ ਜਾਣ।

⁶ਹੁਣ ਤਾਂ, ਦਰਿਆ ਪਾਰ ਵਾਲੇ ਸੂਬੇ ਦੇ ਹਾਕਮ ਤਤਨਈ, ਸ਼ਥਰ-ਬੋਜ਼ਨਈ, ਅਤੇ ਤੁਹਾਡੇ ਉੱਥੋਂ ਦੇ ਸਾਥੀ ਅਧਿਕਾਰੀਓ—ਉਸ ਥਾਂ ਤੋਂ ਦੂਰ ਰਹੋ। ⁷ਪਰਮੇਸ਼ੁਰ ਦੇ ਇਸ ਭਵਨ ਦੇ ਕੰਮ ਨੂੰ ਹੱਥ ਨਾ ਲਾਓ; ਯਹੂਦੀਆਂ ਦੇ ਹਾਕਮ ਅਤੇ ਯਹੂਦੀਆਂ ਦੇ ਬਜ਼ੁਰਗਾਂ ਨੂੰ ਪਰਮੇਸ਼ੁਰ ਦਾ ਇਹ ਭਵਨ ਉਸੇ ਥਾਂ ਉੱਤੇ ਮੁੜ ਉਸਾਰਨ ਦਿਓ। ⁸ਮੈਂ ਇਨ੍ਹਾਂ ਯਹੂਦੀ ਬਜ਼ੁਰਗਾਂ ਲਈ, ਜੋ ਪਰਮੇਸ਼ੁਰ ਦਾ ਭਵਨ ਮੁੜ ਉਸਾਰ ਰਹੇ ਹਨ, ਇਹ ਹੁਕਮ ਦਿੰਦਾ ਹਾਂ: ਉਨ੍ਹਾਂ ਦਾ ਸਾਰਾ ਖ਼ਰਚ ਸ਼ਾਹੀ ਖ਼ਜ਼ਾਨੇ ਵਿੱਚੋਂ, ਦਰਿਆ ਪਾਰ ਵਾਲੇ ਸੂਬੇ ਦੇ ਮਾਲੀਏ ਵਿੱਚੋਂ ਦਿੱਤਾ ਜਾਵੇ, ਤਾਂ ਜੋ ਕੰਮ ਨਾ ਰੁਕੇ। ⁹ਯਰੂਸ਼ਲਮ ਦੇ ਜਾਜਕਾਂ ਨੂੰ ਹਰ ਰੋਜ਼, ਬਿਨਾ ਕਿਸੇ ਕਮੀ ਦੇ, ਜੋ ਕੁਝ ਲੋੜੀਂਦਾ ਹੋਵੇ ਦਿੱਤਾ ਜਾਵੇ: ਜਵਾਨ ਵਹਿੜੇ, ਭੇਡੂ, ਅਤੇ ਲੇਲੇ ਅਕਾਸ਼ ਦੇ ਪਰਮੇਸ਼ੁਰ ਲਈ ਹੋਮ ਦੀਆਂ ਭੇਟਾਂ ਵਾਸਤੇ, ਅਤੇ ਕਣਕ, ਲੂਣ, ਮੈਅ ਅਤੇ ਤੇਲ, ¹⁰ਤਾਂ ਜੋ ਉਹ ਅਕਾਸ਼ ਦੇ ਪਰਮੇਸ਼ੁਰ ਨੂੰ ਭਾਉਂਦੀਆਂ ਬਲੀਆਂ ਚੜ੍ਹਾਉਣ, ਅਤੇ ਰਾਜੇ ਅਤੇ ਉਹ ਦੇ ਪੁੱਤਰਾਂ ਦੇ ਜੀਵਨ ਲਈ ਪ੍ਰਾਰਥਨਾ ਕਰਨ। ¹¹ਮੈਂ ਇਹ ਵੀ ਹੁਕਮ ਦਿੰਦਾ ਹਾਂ: ਜੋ ਕੋਈ ਇਸ ਫ਼ਰਮਾਨ ਨੂੰ ਬਦਲੇਗਾ, ਉਹ ਦੇ ਘਰ ਵਿੱਚੋਂ ਇੱਕ ਸ਼ਤੀਰ ਪੁੱਟਿਆ ਜਾਵੇ, ਅਤੇ ਉਹ ਨੂੰ ਉਸ ਉੱਤੇ ਚੜ੍ਹਾ ਕੇ ਟੰਗਿਆ ਜਾਵੇ, ਅਤੇ ਉਹ ਦਾ ਘਰ ਇਸ ਕਾਰਨ ਮਲਬੇ ਦਾ ਢੇਰ ਬਣਾ ਦਿੱਤਾ ਜਾਵੇ। ¹²ਜਿਸ ਪਰਮੇਸ਼ੁਰ ਨੇ ਆਪਣਾ ਨਾਮ ਉੱਥੇ ਵਸਾਇਆ ਹੈ, ਉਹ ਹਰ ਉਸ ਰਾਜੇ ਜਾਂ ਲੋਕ ਨੂੰ ਢਾਹ ਦੇਵੇ ਜੋ ਇਸ ਹੁਕਮ ਨੂੰ ਬਦਲਣ ਜਾਂ ਯਰੂਸ਼ਲਮ ਵਿੱਚਲੇ ਪਰਮੇਸ਼ੁਰ ਦੇ ਇਸ ਭਵਨ ਨੂੰ ਢਾਹੁਣ ਲਈ ਹੱਥ ਚੁੱਕੇ। ਮੈਂ, ਦਾਰਾ, ਇਹ ਹੁਕਮ ਜਾਰੀ ਕਰਦਾ ਹਾਂ—ਇਹ ਤੁਰੰਤ ਪੂਰਾ ਕੀਤਾ ਜਾਵੇ।

ਪਿਤਾ ਦਾ ਭਵਨ ਮੁਕੰਮਲ ਹੋ ਜਾਂਦਾ ਹੈ

¹³ਤਦ ਦਰਿਆ ਪਾਰ ਵਾਲੇ ਸੂਬੇ ਦੇ ਹਾਕਮ ਤਤਨਈ, ਸ਼ਥਰ-ਬੋਜ਼ਨਈ, ਅਤੇ ਉਨ੍ਹਾਂ ਦੇ ਸਾਥੀਆਂ ਨੇ ਠੀਕ ਉਵੇਂ ਹੀ, ਜਿਵੇਂ ਦਾਰਾ ਰਾਜੇ ਨੇ ਹੁਕਮ ਦਿੱਤਾ ਸੀ, ਤੁਰੰਤ ਕੀਤਾ। ¹⁴ਯਹੂਦੀਆਂ ਦੇ ਬਜ਼ੁਰਗ ਹੱਗਈ ਨਬੀ ਅਤੇ ਇੱਦੋ ਦੇ ਪੁੱਤਰ ਜ਼ਕਰਯਾਹ ਦੇ ਅਗੰਮ ਵਾਕ ਰਾਹੀਂ ਉਸਾਰੀ ਕਰਦੇ ਅਤੇ ਸਫ਼ਲ ਹੁੰਦੇ ਰਹੇ। ਉਨ੍ਹਾਂ ਨੇ ਸਾਡੇ ਪਿਤਾ, ਇਸਰਾਏਲ ਦੇ ਪਰਮੇਸ਼ੁਰ ਦੇ ਹੁਕਮ ਨਾਲ, ਅਤੇ ਕੋਰਸ਼, ਦਾਰਾ ਤੇ ਫ਼ਾਰਸ ਦੇ ਰਾਜੇ ਅਰਤਹਸ਼ਸ਼ਤਾ ਦੇ ਹੁਕਮ ਨਾਲ ਉਸਾਰੀ ਪੂਰੀ ਕੀਤੀ। ¹⁵ਇਹ ਭਵਨ ਦਾਰਾ ਰਾਜੇ ਦੇ ਰਾਜ ਦੇ ਛੇਵੇਂ ਵਰ੍ਹੇ, ਅਦਾਰ ਮਹੀਨੇ ਦੀ ਤੀਜੀ ਤਾਰੀਖ਼ ਨੂੰ ਮੁਕੰਮਲ ਹੋ ਗਿਆ। ^a a v15 ਅਦਾਰ ਯਹੂਦੀ ਜੰਤਰੀ ਦਾ ਆਖ਼ਰੀ ਮਹੀਨਾ ਹੈ, ਜੋ ਲਗਭਗ ਫ਼ਰਵਰੀ–ਮਾਰਚ ਦੇ ਬਰਾਬਰ ਹੈ।

¹⁶ਤਦ ਇਸਰਾਏਲ ਦੇ ਲੋਕਾਂ—ਜਾਜਕਾਂ, ਲੇਵੀਆਂ, ਅਤੇ ਗ਼ੁਲਾਮੀ ਤੋਂ ਪਰਤੇ ਬਾਕੀ ਲੋਕਾਂ—ਨੇ ਸਾਡੇ ਪਿਤਾ ਦੇ ਇਸ ਭਵਨ ਦੀ ਪ੍ਰਤਿਸ਼ਠਾ ਖ਼ੁਸ਼ੀ ਨਾਲ ਮਨਾਈ। ¹⁷ਸਾਡੇ ਪਿਤਾ ਦੇ ਇਸ ਭਵਨ ਦੀ ਪ੍ਰਤਿਸ਼ਠਾ ਲਈ ਉਨ੍ਹਾਂ ਨੇ ਸੌ ਵਹਿੜੇ, 200 ਭੇਡੂ, 400 ਲੇਲੇ, ਅਤੇ ਸਾਰੇ ਇਸਰਾਏਲ ਲਈ ਪਾਪ ਦੀ ਭੇਟ ਵਜੋਂ ਬਾਰਾਂ ਬੱਕਰੇ ਚੜ੍ਹਾਏ, ਹਰ ਗੋਤ ਪਿੱਛੇ ਇੱਕ। ¹⁸ਉਨ੍ਹਾਂ ਨੇ ਜਾਜਕਾਂ ਨੂੰ ਉਨ੍ਹਾਂ ਦੀਆਂ ਵੰਡਾਂ ਵਿੱਚ ਅਤੇ ਲੇਵੀਆਂ ਨੂੰ ਉਨ੍ਹਾਂ ਦੀਆਂ ਵੰਡਾਂ ਵਿੱਚ ਯਰੂਸ਼ਲਮ ਵਿੱਚ ਸਾਡੇ ਪਿਤਾ ਦੀ ਸੇਵਾ ਲਈ ਥਾਪਿਆ, ਜਿਵੇਂ ਮੂਸਾ ਦੀ ਪੋਥੀ ਵਿੱਚ ਲਿਖਿਆ ਹੋਇਆ ਹੈ।

ਗ਼ੁਲਾਮੀ ਤੋਂ ਪਰਤੇ ਲੋਕ ਪਸਾਹ ਮਨਾਉਂਦੇ ਹਨ

¹⁹ਗ਼ੁਲਾਮੀ ਤੋਂ ਪਰਤੇ ਲੋਕਾਂ ਨੇ ਪਹਿਲੇ ਮਹੀਨੇ ਦੀ ਚੌਦਵੀਂ ਤਾਰੀਖ਼ ਨੂੰ ਪਸਾਹ ਮਨਾਇਆ। ²⁰ਜਾਜਕਾਂ ਅਤੇ ਲੇਵੀਆਂ ਨੇ ਆਪਣੇ ਆਪ ਨੂੰ ਇਕੱਠਿਆਂ ਸ਼ੁੱਧ ਕੀਤਾ ਸੀ, ਸਾਰੇ ਪਵਿੱਤਰ ਸਨ। ਉਨ੍ਹਾਂ ਨੇ ਗ਼ੁਲਾਮੀ ਤੋਂ ਪਰਤੇ ਸਾਰੇ ਲੋਕਾਂ, ਆਪਣੇ ਭਰਾ ਜਾਜਕਾਂ, ਅਤੇ ਆਪਣੇ ਲਈ ਪਸਾਹ ਦਾ ਲੇਲਾ ਵੱਢਿਆ। ²¹ਗ਼ੁਲਾਮੀ ਤੋਂ ਪਰਤੇ ਇਸਰਾਏਲੀਆਂ ਨੇ ਇਹ ਖਾਧਾ, ਉਨ੍ਹਾਂ ਸਾਰਿਆਂ ਸਮੇਤ ਜਿਨ੍ਹਾਂ ਨੇ ਸਾਡੇ ਪਿਤਾ, ਇਸਰਾਏਲ ਦੇ ਪਰਮੇਸ਼ੁਰ ਨੂੰ ਭਾਲਣ ਲਈ ਆਪਣੇ ਆਪ ਨੂੰ ਦੇਸ ਦੀਆਂ ਕੌਮਾਂ ਦੀ ਅਸ਼ੁੱਧਤਾ ਤੋਂ ਅੱਡ ਕਰ ਲਿਆ ਸੀ। ²²ਉਨ੍ਹਾਂ ਨੇ ਸੱਤ ਦਿਨ ਖ਼ੁਸ਼ੀ ਨਾਲ ਪਤੀਰੀ ਰੋਟੀ ਦਾ ਪਰਬ ਮਨਾਇਆ, ਕਿਉਂ ਜੋ ਸਾਡੇ ਪਿਤਾ ਨੇ ਉਨ੍ਹਾਂ ਨੂੰ ਖ਼ੁਸ਼ੀ ਨਾਲ ਭਰ ਦਿੱਤਾ ਸੀ ਅਤੇ ਅੱਸ਼ੂਰ ਦੇ ਰਾਜੇ ਦਾ ਦਿਲ ਉਨ੍ਹਾਂ ਵੱਲ ਫੇਰ ਦਿੱਤਾ ਸੀ, ਤਾਂ ਜੋ ਸਾਡੇ ਪਿਤਾ, ਇਸਰਾਏਲ ਦੇ ਪਰਮੇਸ਼ੁਰ ਦੇ ਭਵਨ ਦੇ ਕੰਮ ਵਿੱਚ ਉਨ੍ਹਾਂ ਦੇ ਹੱਥ ਮਜ਼ਬੂਤ ਕਰੇ। ^b b v22 ਫ਼ਾਰਸ ਦੇ ਰਾਜੇ ਨੂੰ ‘ਅੱਸ਼ੂਰ ਦਾ ਰਾਜਾ’ ਇਸ ਲਈ ਕਿਹਾ ਗਿਆ ਹੈ ਕਿਉਂ ਜੋ ਫ਼ਾਰਸ ਨੇ ਪਹਿਲੇ ਅੱਸ਼ੂਰੀ ਸਾਮਰਾਜ ਨੂੰ ਆਪਣੇ ਵਿੱਚ ਸਮਾ ਲਿਆ ਸੀ।