Ezra 6

6 ¹Chiwui thili awunga Dariusna kakaso akha mihaowa, kala lan kaziphaida khalei Babylonwui lairik kazipshimli phā sāhaowa. ²Mediawui ngaleili khalei Ecbatana raipanli lairik akhalui akha thuksai, kala chiwui alungli hithāda kapisanga:

³Awunga Cyruswui mungkhare kumli, awunga Cyrusna kakaso akha mi: Jerusalemli khalei Varewui shim chi sakāluiphalungra, pha̱kaphayā chigatpam, chiwui shimphunga rungshinghaida, atung feet hangchiko kala aret feet hangchiko, ⁴ngalung hakva apeng kathum kala thing apeng akha; kala aman chi awungawui lanshimwui eina mira. ⁵Kala Nebuchadnezzarna Jerusalemli khalei khorumshimwui eina khuishokta Babylonli khuivā kahai Varewui shimwui sinā kala lupāsā khorkhongbing chi latmilu; Jerusalemwui khorumshimli ava̱va̱ apamli khuivālaga Varewui shimli vahailu.

⁶Ara, Kong makānda khalei ngaleiwui lammunga Tattenai, Shethar-bozenai, kala apamli khalei nathumwui ngasotnao lammungabing, apam chiwui eina kānda chihochaohaolu. ⁷Varewui shim hiwui ot chi aningkhānranu; Jihudiwui lammunga kala Jihudiwui khararnaobingna Varewui shim hi chiwui apamli sākāluiranu. ⁸Varewui shim sakālui khalei Jihudiwui khararnaobing hiwui vang ina hithāda kakaso mi: athumwui aman katonga chi awungawui lanshimwui eina, Kong makānda khalei ngaleiwui khāshinā eina mira, chithākha ot chi mangasāmmara. ⁹Jerusalemli khalei pāngmonbingli athumna darkār kasā ot chi thangthang mashoila milu: kazingramwui Vareli rikkatā kachigatwui vang mukvānao, yaovā, yaonao, kala kehu, machi, drakhāra̱, thao, ¹⁰chithākha athumna kazingramwui Vareli ningyangung pha̱kaphayā chigatranu, kala awunga eina awui naomayarabingwui mirinwui vang seihā sāranu. ¹¹Ina hithādala kakaso mi: khipānakha kakaso hi khak tāakha, awui shimwui eina khāng akha tāshoklaga, ali khāngkhuida chiwuitungli phāshi sāhaora, kala awui shim chi chiwui vang khorkazam kahaipam sāhaora. ¹²Chipamli awui ming chipamvāhai Varena, kakaso hi ngachei khavai lah Jerusalemli khalei Varewui shim hi sākhai khavai pāng khāngkhui awunga lah mibing khipānakha, ali horsangmihaora. Ina Dariusna kakaso hi mi; ra̱shakshirei sāhaoranu.

Avāwui Shim Kuphaowa

¹³Chiwui thili Kong makānda khalei lammunga Tattenai, Shethar-bozenai, kala athumwui ngasotnaobingna awunga Dariusna kaso kahai athishurda ra̱shakshirei sāhaowa. ¹⁴Jihudiwui khararnaobingna marān Haggai eina Iddowui naomayara Zechariahwui phongkhami eina sāda mataisanglakhaowa. Ithumwui Avā, Israelwui Varewui kakaso eina, kala Persiawui awunga Cyrus, Darius, kala Ar-ta-xerxeswui hukum eina athumna sāda kuphaowa. ¹⁵Shim hi awunga Dariuswui mungda kum katharuk, Marun kachāngwui kakathumathang kuphaowa. ^a a v15 Marun kachāng chi Jihudiwui kumkhangchāwui akhakhum kachāngna; tākam eina February eina March atamli lei.

¹⁶Chiwui thili Israelwui mibing, kaja pāngmonbing, Levinaobing, kala latkhaung raithā kahaibing khaleibingna ithumwui Avāwui shim hiwui dharkat chi khamathān eina sāsanga. ¹⁷Ithumwui Avāwui shim hiwui dharkatwui vang, Israel saikorawui suiham chigat khavai, athumna mukvā shākha, yaovā shākhani, yaonao shāmati, kala mevā tharāda khani, shang kachiva̱wui eina ava̱va̱ chigata. ¹⁸Kala Moseswui lairikli kapi kahai athishurda, athumna pāngmonbing chi athumwui khum athishurda, kala Levinaobing chi athumwui khum athishurda, Jerusalemli ithumwui Avāwui otram khangatha̱ khavai kapangsanga.

Raithā Kahaiwui Eina Latkhaungbingna Makānkhami Phanit Mayona

¹⁹Raithā kahaiwui eina latunga Israelnaobingna kachāng kharewui tharāda khamatethang makānkhami phanit mayona. ²⁰Pāngmonbing eina Levinaobingna athum khalatta ngasoda tharkhuiya, saikora kathara sai. Chieina athumna raithā kahaiwui eina latkhaung saikorawui vang, athumwui achinā ngarā pāngmonbing, kala athum khalattawui vang makānkhamiwui yaonao taithata. ²¹Raithā kahaiwui eina latunga Israelnaobing, kala ngalei chiwui yurbingwui makathar eina athum khalatta ngatei ngasakta ithumwui Avā, Israelwui Vareli phākhavai kaphaning mi saikorana chi shai. ²²Athumna khamathān eina shinithang khawok makazang khamui phanit mayona, kaja ithumwui Avāna athumli khamathān chipemmi, kala ithumwui Avā, Israelwui Varewui shim kasā otli athumwui pāng pangngasaka khavai, Assyria awungawui ning athumshong ngareiungngasaka. ^b b v22 Persia awungali 'Assyria awunga' da hokmi, kaja Persiana kharewui Assyria wungram chi awui alungli haikhuihairasai.