Mwaei Dario Konyoonji Poisyet
Kinyooru bukuitap Kurus eng' Ekbatana, ak Dario ma kotuktoe kityo poisyet ago kotoretyi eng' kanyiogikyik ineegei ak kong'at kole kebar chii age tugul ne iyomei koristo. Kiwong' koot ak kitabaan eng' boiboiyet, ak koriip kiprutoinik Paska, koboiboiyen kole kaawel Kwandanyo muguleldap laitoryat.
6 1Ki pun anyun laitoryat Dario ng'atuutyet, ak ki kicheeng'at eng' kootap sireet eng' Babilon, ole kigonoree konoraik. 2Kinyooru bukuit eng' Ekbatana, eng' irimeet ne mi kebeberwegap Media, ne ki kisirchi sireet ni:
3Eng' kenyiit ne po tai ne po laitoryat Kurus, ki pun laitoryat Kurus ng'atuutyet kole: keteechei kootap Kamuktaindet ne mi Jerusalem, koik olooto ne kigoitoi keenik, ingotononchi lumeiywekyik, koindonyi ko mitainik tiptem ak tisap ak tebeesindonyi ko mitainik tiptem ak tisap, 4chepkeleel somok che po koik che eecheen ak agenge ne po keetiik; kigoito kanyiok eng' konoraigap laitoryat. 5Ak kora, keweekte tereenigap thahabu ak che po fedha che po kootap Kamuktaindet che ki ip Nebukadnezar kobun hekaluutap Jerusalem ak koip koba Babilon—keweekte chooto kobwa hekaluutap Jerusalem, chii tugul ole mi, ak kinde chooto kootap Kamuktaindet.
6Nguno anyun, inyee Tatenai pounindetap kebeberwek ne mi Let Aineetap, ak Shethar-bozenai, ak otwogigap poisyet che kobootok eng' olooto—oloosak eng' olooto. 7Obagaach poisyetap koot ni ne po Kamuktaindet; ingoteech pounindetap Yahudik ak poisyegap Yahudik koot ni ne po Kamuktaindet eng' oldanyi. 8Apun ng'atuutyoni agobo poisyegap Yahudichu che teechei kootap Kamuktaindet: kigoito kanyiokwak tugul eng' konoraigap laitoryat, eng' kodoigap kebeberwek ne mi Let Aineetap, si mamet poisyet. 9Koochi tisiik che mi Jerusalem kiy age tugul ne machei eng' peetuut age tugul, kot mamet: moek, saamisyek, keechiirek che po keenik che ibeelei eng' Kamuktaindet ne po kipsengwet, ak nganuuk, muunyuk, mwaitet, ak mwanik, 10si kogoito keenik che anyinyen Kamuktaindet ne po kipsengwet, ak kosaaei agobo laitoryat ak saboondap weeriikyik. 11Apun kora ng'atuutyet: age tugul ne walei ng'atuutyoni, kilum keetit eng' koonnyi, ak kieeti ineendet ak kibuch eng' chooto, ak kiyai koonnyi koek tulwo amu nooto. 12Ingong'em Kamuktaindet ne ki konde kainennyi olooto laitoryat age tugul anan piik che eetei euut koyai kowal ng'atuutyoni anan kong'em koot ni ne po Kamuktaindet ne mi Jerusalem. Anee, Dario, apun ng'atuutyoni—ingoyaak chepto atun.
Kagees Kootap Kwanda
13Yeityo koyai Tatenai, pounindetap Let Aineetap, ak Shethar-bozenai, ak tupchosyekwak ko uu ye ki ang'at laitoryat Dario, chepto atun. 14Ki teechei poisyegap Yahudik ak koboiboi eng' maotisyetap Hagai maotindet ak Zekariah weeriitap Ido. Kagogees teekseet ko uu ng'atuutyetap Kwandanyo, Kamuktaindet ne po Israel, ak ko uu ng'atuutyetap Kurus, Dario, ak Artaxerxes laitoryatap Persia. 15Kagogees koot ni eng' peetuutap somok ne po Adar, eng' kenyiit ne po lo ne po laitornatetap laitoryat Dario. a a v15 Adar ko arawet ne po let ne po maguutigap Yahudik, ne tokyingei arawetap aeng' ak somok.
16Yeityo koboiboitu piigap Israel—tisiik, Lawiik, ak alak che ki kagoweekta eng' egosyek—agobo katabaanetap koot ni ne po Kwandanyo eng' boiboindo. 17Agobo katabaanetap koot ni ne po Kwandanyo, ki igoito moek pogol, saamisyek pogol aeng', keechiirek pogol ang'wan, ak ngoik che murenik taman ak aeng' koek kagoochinetap tengekto agobo Israel tugul, agenge eng' ooreet age tugul. 18Ki inde tisiik lugosyekwak ak Lawiik lugosyekwak agobo poisyetap Kwandanyo eng' Jerusalem, ko uu ye ki kisir eng' bukuitap Musa.
Oyai Egosyee Paska
19Ki yai piik che ki kagoweekta eng' egosyek paska eng' peetuutap taman ak ang'wan ne po arawet ne po tai. 20Kiga koanyinygei tisiik ak Lawiik togeennyi, kotiliileen tugul. Ki par keechiiregap paska agobo piik tugul che ki kagoweekta eng' egosyek, tupchosyekwak tisiik, ak icheegei. 21Ki am piigap Israel che ki kagoweekta eng' egosyek, kobooto tugul che ki kagosepkei eng' murwoonindap pororyosyegap emet si kocheeng' Kwandanyo, Kamuktaindet ne po Israel. 22Ki yai igoortap magatiinik che ma kinde mermereek peetuusyek tisap eng' boiboindo, amu ki kagonyi Kwandanyo boiboindo ak kowal mugulelwegap laitoryatap Assyria kobwa icheek, si kogimit eunekwak eng' poisyetap kootap Kwandanyo, Kamuktaindet ne po Israel. b b v22 Kiguure laitoryatap Persia 'laitoryatap Asyria' amu ki kagonam Persia laitornatetap Asyria ne ki mi keny.