ዕዝራ 6

6 ¹ከዚያም ንጉሥ ዳርዮስ ትእዛዝ አስተላለፈ፤ ሀብቶች በተከማቹበት በባቢሎን በመዛግብት ቤት ውስጥም ፍለጋ ተደረገ። ²በሜዶን አውራጃ ውስጥ በምትገኘው በአክሜታ ግንብ ውስጥ አንድ ጥቅልል ተገኘ፤ በውስጡም እንዲህ የሚል ተጽፎ ነበር፦

³ንጉሥ ቂሮስ በነገሠ በመጀመሪያው ዓመት ንጉሥ ቂሮስ እንዲህ ሲል ትእዛዝ ሰጠ፦ በኢየሩሳሌም ያለው የእግዚአብሔር ቤት እንደገና ይሠራ፤ መሥዋዕት የሚቀርብበት ቦታ ይሁን፤ መሠረቱም ጸንቶ ይቆይ፤ ቁመቱ ዘጠና ጫማ፣ ወርዱም ዘጠና ጫማ ይሁን፤ ⁴ሦስት ረድፍ ትላልቅ ድንጋዮችና አንድ ረድፍ የእንጨት ይሁን፤ ወጪውም ከንጉሡ ግምጃ ቤት ይከፈል። ⁵ደግሞም ናቡከደነፆር ከኢየሩሳሌም ቤተ መቅደስ አውጥቶ ወደ ባቢሎን ያመጣቸውን የእግዚአብሔር ቤት የወርቅና የብር ዕቃዎች መልሱ፤ እያንዳንዱን ወደ ስፍራው ወደ ኢየሩሳሌም ቤተ መቅደስ መልሱ፤ በእግዚአብሔርም ቤት ውስጥ አኑሯቸው።

⁶እንግዲህ የወንዙ ማዶ አውራጃ አገረ ገዥ ታተናይ፣ ሰተር ቦዝናይና በዚያ ያሉ ባልደረቦቻችሁ ሆይ፤ ከዚያ ስፍራ ራቁ። ⁷ይህን የእግዚአብሔር ቤት የመሥራቱን ሥራ አትንኩ፤ የአይሁድ አገረ ገዥና የአይሁድ ሽማግሌዎች ይህን የእግዚአብሔር ቤት በስፍራው እንደገና ይሥሩ። ⁸የእግዚአብሔርን ቤት እንደገና ለሚሠሩ ለእነዚህ የአይሁድ ሽማግሌዎች እንዲህ ስል አዝዣለሁ፦ ሥራው እንዳይቋረጥ ወጪያቸው በሙሉ ከንጉሣዊው ግምጃ ቤት፣ ከወንዙ ማዶ አውራጃ ግብር ይከፈላቸው። ⁹በኢየሩሳሌም ላሉ ካህናት ለሰማይ አምላክ ለሚቃጠል መሥዋዕት የሚቀርቡ ወይፈኖች፣ አውራ በጎችና ጠቦቶች፣ እንዲሁም ስንዴ፣ ጨው፣ የወይን ጠጅና ዘይት፤ የሚያስፈልጋቸውን ሁሉ ዕለት ዕለት ሳይጓደል ስጧቸው፤ ¹⁰ለሰማይ አምላክ ደስ የሚያሰኝ መሥዋዕት እንዲያቀርቡ፣ ለንጉሡና ለልጆቹ ሕይወትም እንዲጸልዩ ነው። ¹¹ደግሞም እንዲህ ስል አዝዣለሁ፦ ይህን ዐዋጅ የሚለውጥ ሰው ሁሉ፣ ከቤቱ ምሰሶ ይነቀል፤ እርሱም ተነሥቶ በእርሱ ላይ ይሰቀል፤ ቤቱም ስለዚህ የፍርስራሽ ክምር ይሁን። ¹²ስሙን በዚያ ያሳደረው እግዚአብሔር ይህን ትእዛዝ ለመለወጥ ወይም በኢየሩሳሌም ያለውን ይህን የእግዚአብሔር ቤት ለማፍረስ እጁን የሚያነሣ ንጉሥ ወይም ሕዝብ ሁሉ ይገልብጥ። እኔ ዳርዮስ ይህን ትእዛዝ ሰጥቻለሁ፤ ይህም ፈጥኖ ይፈጸም።

የአባታችን ቤት ተፈጸመ

¹³ከዚያም የወንዙ ማዶ አገረ ገዥ ታተናይ፣ ሰተር ቦዝናይና ባልደረቦቻቸው ንጉሥ ዳርዮስ ባዘዘው መሠረት ፈጥነው በትክክል ፈጸሙ። ¹⁴የአይሁድ ሽማግሌዎች በነቢዩ ሐጌና በአዶ ልጅ በዘካርያስ ትንቢት እየተገፋፉ ይሠሩና ይከናወኑ ነበር። በአባታችን በእስራኤል አምላክ ትእዛዝ፣ በፋርስ ነገሥታትም በቂሮስ፣ በዳርዮስና በአርጤክስስ ዐዋጅ መሠረት ማነጻቸውን ፈጸሙ። ¹⁵ይህም ቤት ንጉሥ ዳርዮስ በነገሠ በስድስተኛው ዓመት በአዳር ወር በሦስተኛው ቀን ተፈጸመ። ^a a v15 አዳር የአይሁድ ዘመን አቈጣጠር የመጨረሻ ወር ሲሆን፣ በግምት ከየካቲት እስከ መጋቢት ካለው ጊዜ ጋራ ይመጣጠናል።

¹⁶ከዚያም የእስራኤል ሕዝብ፣ ካህናት፣ ሌዋውያንና የተቀሩት ከምርኮ የተመለሱ ሁሉ ይህን የአባታችንን ቤት መቀደስ በደስታ አከበሩ። ¹⁷ይህን የአባታችንን ቤት ለመቀደስ መቶ ወይፈኖች፣ ሁለት መቶ አውራ በጎችና አራት መቶ ጠቦቶች አቀረቡ፤ ለመላው እስራኤልም የኀጢአት መሥዋዕት እንዲሆን እንደ ነገዱ ቍጥር ዐሥራ ሁለት አውራ ፍየሎች አቀረቡ። ¹⁸በኢየሩሳሌም ለአባታችን አገልግሎት ካህናቱን በየክፍላቸው፣ ሌዋውያኑንም በየምድባቸው በሙሴ መጽሐፍ እንደ ተጻፈ ሾሙ።

ምርኮኞቹ ፋሲካን አከበሩ

¹⁹ከምርኮ የተመለሱትም በመጀመሪያው ወር በዐሥራ አራተኛው ቀን ፋሲካን አከበሩ። ²⁰ካህናቱና ሌዋውያኑ በአንድነት ራሳቸውን አንጽተው ነበር፤ ሁሉም ንጹሓን ነበሩ። ከምርኮ ለተመለሱ ሁሉ፣ ለወንድሞቻቸው ለካህናቱና ለራሳቸው የፋሲካውን በግ አረዱ። ²¹ከምርኮ የተመለሱት እስራኤላውያን፣ የእስራኤልን አምላክ አባታችንን ለመፈለግ ከምድሪቱ አሕዛብ ርኩሰት ራሳቸውን ከለዩ ሁሉ ጋራ በሉት። ²²የቂጣን በዓል ሰባት ቀን በደስታ አከበሩ፤ አባታችን በደስታ ሞልቷቸው ነበርና፤ የእስራኤል አምላክ የአባታችንን ቤት በመሥራቱ ሥራ እጃቸውን ያበረታ ዘንድ የአሦርን ንጉሥ ልብ ወደ እነርሱ መልሶ ነበርና። ^b b v22 ፋርስ የቀድሞውን የአሦር መንግሥት ስለ ያካተተ፣ የፋርስ ንጉሥ ‘የአሦር ንጉሥ’ ተብሎ ተጠርቷል።