ዕዝራ 7

7 ¹ከእነዚህ ነገሮች በኋላ፣ የፋርስ ንጉሥ አርጤክስስ በነገሠበት ዘመን፣ ዕዝራ የሰራያ ልጅ፣ ሰራያ የአዛርያ ልጅ፣ አዛርያ የኬልቅያ ልጅ፣ ²ኬልቅያ የሰሎም ልጅ፣ ሰሎም የሳዶቅ ልጅ፣ ሳዶቅ የአኪጦብ ልጅ፣ ³አኪጦብ የአማርያ ልጅ፣ አማርያ የአዛርያ ልጅ፣ አዛርያ የማራዮት ልጅ፣ ⁴ማራዮት የዘራህያ ልጅ፣ ዘራህያ የዑዚ ልጅ፣ ዑዚ የቡኪ ልጅ፣ ⁵ቡኪ የአቢሱ ልጅ፣ አቢሱ የፊንሃስ ልጅ፣ ፊንሃስ የአልዓዛር ልጅ፣ አልዓዛር የሊቀ ካህናቱ የአሮን ልጅ ነበር። ⁶ይህ ዕዝራ ከባቢሎን ወጥቶ መጣ፤ እርሱም የእስራኤል አምላክ አባታችን በሰጠው በሙሴ ሕግ የተካነ ጸሐፊ ነበር። የአባቱ እጅ በእርሱ ላይ ስለ ነበረ፣ ንጉሡ የለመነውን ሁሉ ሰጠው። ⁷ከእስራኤላውያን አንዳንዶች፣ ካህናት፣ ሌዋውያን፣ ዘማሪዎች፣ በር ጠባቂዎችና የቤተ መቅደስ አገልጋዮች በንጉሡ በአርጤክስስ በሰባተኛው ዓመት ወደ ኢየሩሳሌም ወጡ። ⁸ዕዝራም በንጉሡ በሰባተኛው ዓመት በአምስተኛው ወር ወደ ኢየሩሳሌም መጣ። ⁹በመጀመሪያው ወር በመጀመሪያው ቀን ከባቢሎን ተነሣ፤ የአባቱ በጎ እጅ በእርሱ ላይ ስለ ነበረ፣ በአምስተኛው ወር በመጀመሪያው ቀን ኢየሩሳሌም ደረሰ። ¹⁰ዕዝራ የአባታችንን ሕግ ለማጥናት፣ ለመፈጸም፣ ሥርዓቱንና ፍርዱንም በእስራኤል ለማስተማር ልቡን አዘጋጅቶ ነበርና።

ለዕዝራ የተጻፈ የንጉሡ ደብዳቤ

¹¹ንጉሡ አርጤክስስ ለካህኑና ለጸሐፊው ለዕዝራ የሰጠው የደብዳቤው ግልባጭ ይህ ነው፤ እርሱም ለእስራኤል የተሰጡትን የአባታችንን ትእዛዛትና ሥርዓት የተማረ ነበር፤

¹²የነገሥታት ንጉሥ አርጤክስስ፣ ለሰማይ አምላክ ሕግ ጸሐፊ ለካህኑ ለዕዝራ፤ ሰላም ለአንተ ይሁን። አሁንም፣

¹³በመንግሥቴ ውስጥ ካሉ እስራኤላውያን፣ ከካህናትና ከሌዋውያን ጋራ፣ ወደ ኢየሩሳሌም መሄድ የሚፈልግ ሁሉ ከአንተ ጋራ ይሂድ ብዬ አዝዣለሁ። ¹⁴በእጅህ ባለው በአምላክህ ሕግ መሠረት ስለ ይሁዳና ስለ ኢየሩሳሌም እንድትመረምር በንጉሡና በሰባቱ አማካሪዎቹ ተልከሃልና፤ ¹⁵ንጉሡና አማካሪዎቹ መኖሪያው በኢየሩሳሌም ለሆነው ለእስራኤል አምላክ በፈቃዳቸው የሰጡትን ብርና ወርቅ ይዘህ ትሄድ ዘንድ፤ ¹⁶በባቢሎን አውራጃ ሁሉ ከምታገኘው ብርና ወርቅ ሁሉ ጋራ፣ ሕዝቡና ካህናቱ በኢየሩሳሌም ላለው ለአምላካቸው ቤት በፈቃዳቸው ከሚሰጡት መባ ጋራ ይዘህ ሂድ። ¹⁷በዚህ ገንዘብ ወይፈኖችን፣ አውራ በጎችንና ጠቦቶችን ከእህል ቍርባናቸውና ከመጠጥ ቍርባናቸው ጋራ ፈጥነህ ግዛ፤ በኢየሩሳሌም ባለው በአምላክህ ቤት መሠዊያ ላይም አቅርባቸው። ¹⁸በቀረውም ብርና ወርቅ አንተና ወንድሞችህ መልካም መስሎ የታያችሁን እንደ አምላክህ ፈቃድ አድርጉ። ¹⁹ለአምላክህ ቤት አገልግሎት የተሰጡህን ዕቃዎች በኢየሩሳሌም አምላክ ፊት አስረክብ። ²⁰ለአምላክህ ቤት የሚያስፈልገውን ሌላም ማናቸውንም ነገር ልታቀርበው ቢገባህ፣ ከንጉሡ ግምጃ ቤት አቅርበው።

²¹እኔ ንጉሥ አርጤክስስ፣ ከወንዝ ማዶ ባለው አውራጃ ላሉት ገንዘብ ያዦች ሁሉ፦ የሰማይ አምላክ ሕግ ጸሐፊ ካህኑ ዕዝራ የሚጠይቃችሁን ሁሉ በጥንቃቄ ፈጽሙ ብዬ አዝዣለሁ። ²²እስከ 7,500 ፓውንድ ብር ገደማ፣ 600 መስፈሪያ ስንዴ፣ 600 ጋሎን የወይን ጠጅ፣ 600 ጋሎን ዘይትና ያለ ገደብ ጨው። ²³የሰማይ አምላክ የሚያዘው ሁሉ፣ በንጉሡ መንግሥትና በልጆቹ ላይ ቍጣ እንዳይመጣ፣ ለቤቱ በሙሉ ይደረግ። ²⁴ደግሞም እናሳውቃችኋለን፤ በካህናት፣ በሌዋውያን፣ በዘማሪዎች፣ በበር ጠባቂዎች፣ በቤተ መቅደስ አገልጋዮች ወይም በዚህ በእግዚአብሔር ቤት ሠራተኞች ላይ ግብር፣ ቀረጥ ወይም መቅጫ መጣል አይገባም።

²⁵ዕዝራ ሆይ፤ በእጅህ ባለው በአምላክህ ጥበብ መሠረት፣ ከወንዝ ማዶ ባለው አውራጃ ያሉትን፣ የአምላክህን ሕግጋት የሚያውቁትን ሁሉ ሕዝብ የሚገዙ ዳኞችንና ፈራጆችን ሹም። የማያውቁትንም አስተምር። ²⁶የአምላክህን ሕግና የንጉሡን ሕግ የማይፈጽም ሁሉ፣ በጥብቅ ይቀጣ፤ በሞት፣ በግዞት፣ በንብረት መወረስ ወይም በእስራት።

²⁷በኢየሩሳሌም ያለውን የአባታችንን ቤት ያስጌጥ ዘንድ በንጉሡ ልብ ውስጥ ያኖረ፣ የአባቶቻችን አምላክ አባታችን ይባረክ፤ ²⁸በንጉሡ፣ በአማካሪዎቹና በንጉሡ ኀያላን መኳንንት ሁሉ ፊት ምሕረትን ያሳየኝ ነው። የአባቴም እጅ በእኔ ላይ ስለ ነበረ፣ ጠነከርሁ፤ ከእስራኤልም መሪዎችን ከእኔ ጋራ ይወጡ ዘንድ ሰበሰብሁ።