Esdras 7 FHB Father's Heart Bible™

7 ¹Apre bagay sa yo, sou rèy Atagzèsès, wa peyi Pès la, te gen Esdras, pitit Seraja, Seraja pitit Azarya, Azarya pitit Ilkija, ²Ilkija pitit Chaloum, Chaloum pitit Zadòk, Zadòk pitit Achitoub, ³Achitoub pitit Amarya, Amarya pitit Azarya, Azarya pitit Merajòt, ⁴Merajòt pitit Zeraja, Zeraja pitit Ouzi, Ouzi pitit Bouki, ⁵Bouki pitit Abichwa, Abichwa pitit Fineas, Fineas pitit Eleaza, Eleaza pitit Aron, granprèt la. ⁶Esdras sa a soti lavil Babilòn li moute. Li te yon nèg save ki te fò anpil nan lalwa Moyiz la, lalwa Papa nou, Bondye pèp Izrayèl la, te bay la. Wa a ba li tou sa li te mande, paske men Papa li te sou li. ⁷Nan setyèm lanne rèy wa Atagzèsès la, kèk moun nan pèp Izrayèl la, kèk prèt, moun Levi, chantè, gad pòtay, ak sèvitè tanp lan moute Jerizalèm. ⁸Esdras rive Jerizalèm nan senkyèm mwa setyèm lanne rèy wa a. ⁹Li kite Babilòn premye jou premye mwa a; li rive Jerizalèm premye jou senkyèm mwa a, paske bon men Papa li te sou li. ¹⁰Paske Esdras te pran desizyon ak tout kè li pou l etidye lalwa Papa nou, pou l obeyi l, epi pou l moutre pèp Izrayèl la lòd ak regleman li yo.

Lèt Wa a Bay pou Esdras

¹¹Men kopi lèt wa Atagzèsès te bay Esdras, prèt la ki te yon nèg save tou, yon moun ki te fò anpil nan kòmandman ak regleman Papa nou te bay pèp Izrayèl la:

¹²Atagzèsès, wa tout wa yo, voye bonjou bay Esdras, prèt la, nèg save ki konn lalwa Bondye ki nan syèl la. Koulye a,

¹³men lòd mwen bay: nenpòt moun nan pèp Izrayèl la ki nan peyi m'ap gouvènen an, ansanm ak prèt yo ak moun Levi yo, ki vle ale Jerizalèm, gen dwa ale avèk ou. ¹⁴Paske se wa a ak sèt konseye l yo ki voye ou al enspekte sitiyasyon peyi Jida ak lavil Jerizalèm, dapre lalwa Bondye ou a ki nan men ou, ¹⁵epi pou ou pote ajan ak lò wa a ansanm ak konseye l yo bay ak tout kè yo pou Bondye pèp Izrayèl la, li menm ki rete lavil Jerizalèm, ¹⁶ansanm ak tout ajan ak lò w'a jwenn nan tout pwovens Babilòn lan, plis kado pèp la ak prèt yo bay ak bon kè yo pou kay Bondye yo a ki lavil Jerizalèm. ¹⁷Ak lajan sa a, prese achte towo bèf, belye mouton, ak ti mouton, ansanm ak ofrann grenn jaden ak ofrann bwason ki mache ak yo, epi ofri yo sou lotèl kay Bondye ou a ki lavil Jerizalèm. ¹⁸Ou menm ak frè ou yo, nou mèt fè sa nou wè ki pi bon ak rès ajan ak lò a, dapre volonte Bondye ou a. ¹⁹Renmèt devan Bondye lavil Jerizalèm nan tout veso yo ba ou pou sèvis nan kay Bondye ou a. ²⁰Tout lòt bagay kay Bondye ou a ta bezwen, ki tonbe sou ou pou ou founi, w'a pran yo nan kès wa a.

²¹Mwen menm, wa Atagzèsès, mwen bay tout trezorye ki nan pwovens lòt bò larivyè Lefrat la lòd sa a: tou sa Esdras, prèt la, nèg save ki konn lalwa Bondye ki nan syèl la, mande nou, se pou nou fè l egzakteman. ²²Nou mèt ba li jiska sètmil senksan (7.500) liv ajan, sisan (600) barik ble, sisan (600) galon diven, sisan (600) galon lwil, ak sèl san limit. ²³Tou sa Bondye ki nan syèl la kòmande, se pou yo fè l nèt pou kay li a, pou kòlè Bondye pa tonbe sou peyi wa a ap gouvènen an ni sou pitit li yo. ²⁴Nou fè nou konnen tou: pèsonn pa gen dwa fè okenn prèt, moun Levi, chantè, gad pòtay, sèvitè tanp lan, osinon ouvriye kay Bondye sa a peye taks, enpo, ni dwa pasaj.

²⁵Ou menm Esdras, dapre bon konprann Bondye ou ba ou a, w'a chwazi majistra ak jij pou gouvènen tout pèp ki nan pwovens lòt bò larivyè Lefrat la, tout moun ki konnen lalwa Bondye ou a. Moun ki pa konnen yo, w'a moutre yo. ²⁶Nenpòt moun ki refize obeyi lalwa Bondye ou a ak lalwa wa a, se pou yo byen pini l: swa yo touye l, swa yo mete l deyò nan peyi a, swa yo sezi byen li, osinon yo mete l nan prizon.

²⁷Lwanj pou Papa nou, Bondye zansèt nou yo, li menm ki mete nan kè wa a lanvi pou l anbeli kay Papa nou an ki lavil Jerizalèm, ²⁸epi ki fè m jwenn favè ak renmen li devan wa a, devan konseye l yo, ak devan tout gwo chèf wa a ki gen pouvwa. Konsa, mwen pran kouraj, paske men Papa mwen te sou mwen, epi mwen reyini chèf nan pèp Izrayèl la pou yo moute ansanm avèk mwen.