Ezra 7

7 ¹Pagkatapos ng mga pangyayaring ito, noong panahon ng paghahari ni Artajerjes na hari ng Persia, si Ezra na anak ni Seraias, na anak ni Azarias, na anak ni Hilkias, ²na anak ni Salum, na anak ni Zadok, na anak ni Ahitub, ³na anak ni Amarias, na anak ni Azarias, na anak ni Meraiot, ⁴na anak ni Zerahias, na anak ni Uzi, na anak ni Buki, ⁵na anak ni Abisua, na anak ni Finees, na anak ni Eleazar, na anak ni Aaron na punong pari. ⁶Ang Ezra na ito ay umahon mula sa Babilonia, isang eskribang bihasa sa Kautusan ni Moises na ibinigay ng ating Ama, ang Diyos ng Israel. Ipinagkaloob sa kanya ng hari ang lahat ng kanyang hiniling, sapagkat ang kamay ng kanyang Ama ay sumasakanya. ⁷May ilang mga Israelita, mga pari, mga Levita, mga mang-aawit, mga bantay-pinto, at mga lingkod sa templo na umahon sa Jerusalem noong ikapitong taon ni Haring Artajerjes. ⁸Dumating si Ezra sa Jerusalem noong ikalimang buwan, sa ikapitong taon ng hari. ⁹Nang unang araw ng unang buwan ay umalis siya sa Babilonia; nakarating siya sa Jerusalem nang unang araw ng ikalimang buwan, sapagkat ang mabuting kamay ng kanyang Ama ay sumasakanya. ¹⁰Sapagkat inilagak ni Ezra ang kanyang puso na pag-aralan ang Kautusan ng ating Ama, sundin ito, at ituro ang kanyang mga tuntunin at mga alituntunin sa Israel.

Ang Liham ng Hari para kay Ezra

¹¹Ito ang sipi ng liham na ibinigay ni Haring Artajerjes kay Ezra na pari at eskriba, isang dalubhasa sa mga utos at mga tuntunin ng ating Ama para sa Israel:

¹²Artajerjes, hari ng mga hari, kay Ezra na pari, eskriba ng Kautusan ng Diyos ng langit: mga pagbati. At ngayon,

¹³Ipinag-uutos ko: sinumang Israelita sa aking kaharian, kasama ang mga pari at mga Levita, na nais pumunta sa Jerusalem ay makakasama mo. ¹⁴Sapagkat ikaw ay isinugo ng hari at ng kanyang pitong tagapayo upang magsuri tungkol sa Juda at Jerusalem ayon sa Kautusan ng iyong Diyos, na nasa iyong kamay, ¹⁵at upang dalhin ang pilak at ginto na kusang-loob na ibinigay ng hari at ng kanyang mga tagapayo sa Diyos ng Israel, na ang tahanan ay nasa Jerusalem, ¹⁶kasama ang lahat ng pilak at ginto na iyong makikita sa buong lalawigan ng Babilonia, at ang mga kusang-loob na kaloob ng bayan at ng mga pari, na kusang ibinigay para sa bahay ng kanilang Diyos sa Jerusalem. ¹⁷Sa salaping ito, agad kang bumili ng mga toro, mga lalaking tupa, at mga kordero, kasama ang kanilang mga handog na butil at handog na inumin, at ihandog ang mga ito sa altar ng bahay ng iyong Diyos sa Jerusalem. ¹⁸Gawin mo ang anumang inaakala mong pinakamabuti ng iyo at ng iyong mga kapatid sa natitirang pilak at ginto, ayon sa kalooban ng iyong Diyos. ¹⁹Iharap mo sa Diyos ng Jerusalem ang mga kasangkapang ibinigay sa iyo para sa paglilingkod sa bahay ng iyong Diyos. ²⁰Kunin mo mula sa ingatang-yaman ng hari ang anumang iba pang kailangan ng bahay ng iyong Diyos na nauukol sa iyong ibigay.

²¹Ako, si Haring Artajerjes, ay nag-uutos sa bawat ingat-yaman sa lalawigang Dako Pa Roon ng Ilog: isagawang lubusan ang anumang hilingin sa inyo ni Ezra na pari, eskriba ng Kautusan ng Diyos ng langit. ²²Hanggang sa halos 7,500 librang pilak, 600 salop na trigo, 600 galong alak, 600 galong langis, at walang takdang asin. ²³Anumang iutos ng Diyos ng langit, gawin itong lubusan para sa kanyang bahay, upang walang poot na dumating sa kaharian ng hari at sa kanyang mga anak. ²⁴Ipinababatid din namin sa inyo: walang buwis, tributo, o singil na maaaring ipataw sa kaninumang pari, Levita, mang-aawit, bantay-pinto, lingkod sa templo, o manggagawa ng bahay na ito ng Diyos.

²⁵Ezra, sa pamamagitan ng karunungan ng iyong Diyos na nasa iyong kamay, magtalaga ka ng mga hukom at mga tagapaghatol upang mamahala sa buong bayan sa lalawigang Dako Pa Roon ng Ilog—sa lahat ng nakakaalam ng mga kautusan ng iyong Diyos. Turuan mo ang hindi nakakaalam. ²⁶Ang sinumang tumangging sumunod sa kautusan ng iyong Diyos at sa kautusan ng hari ay dapat mahigpit na parusahan—kamatayan, pagpapatapon, pagsamsam ng mga ari-arian, o pagkabilanggo.

²⁷Purihin ang ating Ama, ang Diyos ng ating mga ninuno, na naglagay sa puso ng hari upang pagandahin ang bahay ng ating Ama sa Jerusalem, ²⁸at nagpakita sa akin ng wagas na pag-ibig sa harap ng hari, ng kanyang mga tagapayo, at ng lahat ng makapangyarihang mga pinuno ng hari. Kaya nagkalakas-loob ako, sapagkat ang kamay ng aking Ama ay sumasaakin, at tinipon ko ang mga pinuno mula sa Israel upang umahong kasama ko.