Darius Raja pora Kaam Chalai Thakibole Hukum Dise
Cyrus laga kitab Ecbatana te pai, aru Darius pora kaam koribole hukum diya he nohoi kintu nijor tax pora paisa bhi diye aru bigar kora jun-bhi ke dhomki diye. Ghor tu khotom hoi, aru anondo pora utsorgo kori diye, aru bondi pora ulti aha manuh khan pora Nistar Purbb manai, amar Pitri pora ekjon raja laga mon ghurai dise koi kene khushi hoi kene.
6 1Tetiya Darius Raja pora ekta hukum dise, aru Babylon laga likha rakha ghor te, kot te dhun-sompoti khan rakhise, ta te bisari sa-sa korise. 2Media laga desh te thaka Ecbatana laga kella bhitor te, ekta chithi-putha pai jaise, aru eitu bhitor te eneka likha thakise:
3Cyrus Raja laga prothom saal te, Cyrus Raja pora ekta hukum dise: Jerusalem te thaka Isor laga ghor ke notun kori bonabo lage, bolidan diya jagah ekta, tar bhetimul rakhi kene, nobbe feet usa aru nobbe feet chouria, 4tinta tah dangor pathor khan aru ekta tah khuri; kharcha tu raja laga dhun-ghor pora dibo. 5Aru, Nebuchadnezzar pora Jerusalem laga mondir pora loi kene Babylon te ani diya Isor laga ghor laga suna aru chandi laga saman khan wapas dibi—eitu khan ke Jerusalem laga mondir te wapas ani dibi, ekta-ekta nijor jagah te, aru Isor laga ghor te rakhibi.
6Etiya, Nodi Paar laga desh laga governor Tattenai, Shethar-bozenai, aru ta te thaka tumikhan laga sathi adhikari khan—hei jagah pora dur te thakibi. 7Isor laga eitu ghor laga kaam ke chari dibi; Yehudi khan laga governor aru Yehudi khan laga bura manuh khan pora Isor laga eitu ghor ke tar jagah te notun kori bonabole dibi. 8Isor laga ghor notun kori bona eitu Yehudi bura manuh khan nimite Moi eneka hukum di ase: tarkhan laga pura kharcha raja laga dhun-ghor pora, Nodi Paar laga desh laga kor pora dibi, titia kaam tu bondh nohobo. 9Jerusalem te thaka purohit khan ke tarkhan laga dorkar thaka sob hodai din dibi, nagila bina: sorgo laga Isor ke jolai diya bolidan nimite jawan ghahari khan, mer-mta khan, mer-bacha khan, aru gehu, nimok, angur-ros, tel, 10sorgo laga Isor ke khushi kora bolidan khan dibole, aru raja aru tar laga chokra khan laga jivon nimite prathana koribole. 11Moi bhi eneka hukum di ase: kun manuh eitu hukum ke bodli koribo, tar laga ghor pora ekta khuri tani ulabo, aru tar ke uthai kene tate gath mari dibo, aru eitu nimite tar laga ghor ke bhanga-kuli laga dhur bonai dibo. 12Kun Isor pora Tar laga nam ta te rakhise, eitu hukum ke bodli koribole nahole Jerusalem te thaka Isor laga eitu ghor ke khotom koribole hath uthowa kun raja nahole manuh khan ke bhi Tai pora girai dibo. Moi, Darius, eitu hukum di ase—joldi pora eitu kori dibi.
Pitri laga Ghor Khotom Hoise
13Tetiya Nodi Paar laga governor Tattenai, Shethar-bozenai, aru tarkhan laga sathi khan pora Darius Raja hukum diya nisena he, joldi pora korise. 14Yehudi khan laga bura manuh khan bhabobadi Haggai aru Iddo laga chokra Zechariah laga bhabobani pora bonai thakise aru unnati kori thakise. Amar Pitri, Israel laga Isor laga hukum pora, aru Persia laga raja Cyrus, Darius, aru Artaxerxes laga hukum pora tarkhan bona tu khotom korise. 15Darius Raja laga raj laga choita saal te, Adar mahina laga tin tarikh te eitu ghor tu khotom hoise. a a v15 Adar tu Yehudi khan laga calendar laga hekh mahina ase, February–March logot kaustu eke nisena.
16Tetiya Israel laga manuh khan—purohit khan, Levi khan, aru bondhi pora wapas aha baki khan—khushi pora amar Pitri laga eitu ghor laga samarpan tu manai korise. 17Amar Pitri laga eitu ghor laga samarpan nimite tarkhan ekso ghahari, 200 mer-mta, 400 mer-bacha, aru pura Israel nimite paap laga bolidan hisab te baroh-ta mta sagol dise, ekta jati pichete ekta. 18Moses laga kitab te likha thaka nisena, tarkhan Jerusalem te amar Pitri laga sewa nimite purohit khan ke tarkhan laga bhag te aru Levi khan ke tarkhan laga bhag te rakhise.
Bondhi pora Wapas Aha Khan Nistar Porbo Manai
19Bondhi pora wapas aha khan pora prothom mahina laga chouda tarikh te Nistar Porbo manai korise. 20Purohit khan aru Levi khan eke logote nijor ke sapha korise, sob sapha thakise. Tarkhan bondhi pora wapas aha sob khan nimite, tarkhan laga bhai purohit khan nimite, aru nijor nimite Nistar Porbo laga mer-bacha ke marise. 21Bondhi pora wapas aha Israel laga manuh khan, aru amar Pitri, Israel laga Isor ke bisaribole desh laga jati khan laga letera pora nijor ke alag kori luwa sob khan logote, eitu khaise. 22Tarkhan khushi pora sat din Khomir Nathaka Roti laga Porbo manai korise, kilemane amar Pitri pora tarkhan ke khushi pora bhorta kori dise, aru amar Pitri, Israel laga Isor laga ghor laga kaam te tarkhan laga hath ke mojbut koribole, Assyria laga raja laga mon ke tarkhan phale ghurai dise. b b v22 Persia laga raja ke 'Assyria laga raja' koi ase kilemane Persia pora age laga Assyria rajyo ke loi loise.