Amos 6

6 ¹Alaot kadtong nagpahayahay sa Zion, ug kadtong mibati nga luwas sa bukid sa Samaria— ang inilang mga tawo sa labing unang nasod, nga kanila moduol ang balay sa Israel! ²Tabok ngadto sa Calne ug tan-awa; gikan didto padayon ngadto sa Hamat nga bantogan; unya lugsong ngadto sa Gat sa mga Filisteo. Mas maayo ba kamo kay niining mga gingharian? O mas lapad ba ang ilang teritoryo kay sa inyoha? ³Gilayo ninyo ang adlaw sa katalagman, apan gipaduol ninyo ang paghari sa kapintasan. ⁴Naghigda sila sa mga katre nga garing ug nangunghad sa ilang mga higdaanan, nga nangaon sa mga nating karnero gikan sa panon ug sa mga nating baka gikan sa tambokanan. ⁵Nagtugtog sila sa alpa, ug sama kang David, nag-imbento sila ug mga tulonggon alang sa ilang kaugalingon. ⁶Nag-inom sila ug bino nga sinukad sa panaksan ug nagdihog sa ilang kaugalingon sa labing maayong mga lana, apan wala sila magsubo sa pagkagun-ob ni Jose. ⁷Busa karon mabihag sila, nga mangulo sa mga binihag, ug mahanaw ang kasaulogan niadtong nangunghad sa kahayahay.

⁸Ang Soberanong Amahan nanumpa pinaagi sa iyang kaugalingon—mao kini ang pahayag sa Amahan sa kasundalohan sa langit: Gikasilagan ko ang garbo ni Jacob ug gidumtan ang iyang mga kota, ug itugyan ko ang siyudad ug ang tanan nga anaa niini.

⁹Ug kon napulo ka tawo ang mahibilin sa usa ka balay, mangamatay usab sila.

¹⁰Ug kon ang paryente sa usa ka tawo, ang maoy magsunog sa mga patay, mag-alsa kaniya aron dad-on ang mga bukog pagawas sa balay, ug motawag kang bisan kinsa nga anaa sa kinasuloran nga lawak, “May kauban ka pa ba?” ug motubag siya, “Wala,” unya moingon siya, “Hilom! Dili nato angay ilitok ang ngalan sa atong Amahan.”

¹¹Kay tan-awa, ang atong Amahan nagahatag sa sugo, ug ang dakong balay pulpogon, ug ang gamayng balay dugmokon. ¹²Managan ba ang mga kabayo sa pangpang? Magdaro ba ang tawo sa dagat pinaagi sa mga baka? Apan gihimo ninyong hilo ang hustisya ug ang bunga sa pagkamatarong nga mapait nga hilo. ¹³Kamong nagmaya tungod sa Lo-debar ug nag-ingon, “Dili ba pinaagi sa atong kaugalingong kusog nato nailog ang Karnaim alang sa atong kaugalingon?” ^a a v13 Ang duha ka lungsod nga gipasigarbo sa Israel nga iyang nailog nagdala ug mabiaybiayong mga kahulogan: ang Lo-debar daw sama sa “butang nga walay bili,” ug ang Karnaim nagkahulogan ug “mga sungay” — usa ka simbolo sa kusog. Ang ilang mapahitas-ong pagpanghambog sama ra sa pagpasigarbo sa wala.

¹⁴Apan tan-awa—magpatindog ako ug usa ka nasod batok kaninyo, balay sa Israel, nag-ingon ang Amahan sa kasundalohan sa langit, ug ilang daugdaugon kamo gikan sa Lebo-hamat hangtod sa Sapa sa Araba.