ਆਮੋਸ 6

6 ¹ਹਾਏ ਉਨ੍ਹਾਂ ਉੱਤੇ ਜੋ ਸੀਯੋਨ ਵਿੱਚ ਸੁਖ-ਚੈਨ ਨਾਲ ਵੱਸਦੇ ਹਨ, ਅਤੇ ਉਨ੍ਹਾਂ ਉੱਤੇ ਜੋ ਸਾਮਰਿਯਾ ਦੇ ਪਹਾੜ ਉੱਤੇ ਆਪਣੇ ਆਪ ਨੂੰ ਸੁਰੱਖਿਅਤ ਸਮਝਦੇ ਹਨ—ਉਸ ਪ੍ਰਧਾਨ ਕੌਮ ਦੇ ਨਾਮਵਰ ਪੁਰਖ, ਜਿਨ੍ਹਾਂ ਕੋਲ ਇਸਰਾਏਲ ਦਾ ਘਰਾਣਾ ਆਉਂਦਾ ਹੈ! ²ਕਲਨੇਹ ਨੂੰ ਪਾਰ ਲੰਘ ਕੇ ਵੇਖੋ; ਉੱਥੋਂ ਵੱਡੇ ਹਮਾਥ ਨੂੰ ਜਾਓ; ਫਿਰ ਫ਼ਲਿਸਤੀਆਂ ਦੇ ਗਥ ਨੂੰ ਉਤਰ ਜਾਓ। ਕੀ ਤੁਸੀਂ ਇਨ੍ਹਾਂ ਰਾਜਾਂ ਨਾਲੋਂ ਚੰਗੇ ਹੋ? ਜਾਂ ਕੀ ਉਨ੍ਹਾਂ ਦੀ ਹੱਦ ਤੁਹਾਡੀ ਨਾਲੋਂ ਵੱਡੀ ਹੈ? ³ਤੁਸੀਂ ਬਿਪਤਾ ਦੇ ਦਿਨ ਨੂੰ ਦੂਰ ਧੱਕਦੇ ਹੋ, ਪਰ ਜ਼ੁਲਮ ਦੇ ਰਾਜ ਨੂੰ ਨੇੜੇ ਲੈ ਆਉਂਦੇ ਹੋ। ⁴ਓਹ ਹਾਥੀ-ਦੰਦ ਦੇ ਪਲੰਘਾਂ ਉੱਤੇ ਲੇਟਦੇ ਹਨ ਅਤੇ ਆਪਣੀਆਂ ਸੇਜਾਂ ਉੱਤੇ ਪਸਰ ਜਾਂਦੇ ਹਨ, ਇੱਜੜ ਦੇ ਲੇਲੇ ਅਤੇ ਵਾੜੇ ਦੇ ਮੋਟੇ-ਤਾਜ਼ੇ ਵੱਛੇ ਖਾਂਦੇ ਹਨ। ⁵ਓਹ ਬਰਬਤ ਵਜਾਉਂਦੇ ਰਹਿੰਦੇ ਹਨ, ਅਤੇ ਦਾਊਦ ਵਾਂਗ ਆਪਣੇ ਲਈ ਵਾਜੇ ਘੜਦੇ ਹਨ। ⁶ਓਹ ਕਟੋਰੇ ਭਰ-ਭਰ ਕੇ ਮੈ ਪੀਂਦੇ ਹਨ ਅਤੇ ਵਧੀਆ ਤੋਂ ਵਧੀਆ ਤੇਲ ਆਪਣੇ ਉੱਤੇ ਮਲਦੇ ਹਨ, ਪਰ ਯੂਸੁਫ਼ ਦੀ ਬਰਬਾਦੀ ਉੱਤੇ ਓਹ ਦੁਖੀ ਨਹੀਂ ਹੁੰਦੇ। ⁷ਇਸ ਲਈ ਹੁਣ ਓਹ ਗ਼ੁਲਾਮੀ ਵਿੱਚ ਜਾਣ ਵਾਲਿਆਂ ਦੇ ਸਭ ਤੋਂ ਅੱਗੇ ਗ਼ੁਲਾਮ ਹੋ ਕੇ ਜਾਣਗੇ, ਅਤੇ ਪਸਰ ਕੇ ਸੁਖ-ਚੈਨ ਕਰਨ ਵਾਲਿਆਂ ਦੀ ਰੰਗਰਲੀ ਮੁੱਕ ਜਾਵੇਗੀ।

⁸ਪ੍ਰਭੂ ਪਿਤਾ ਨੇ ਆਪਣੀ ਹੀ ਸੌਂਹ ਖਾਧੀ ਹੈ—ਸੁਰਗੀ ਸੈਨਾਂ ਦੇ ਪਿਤਾ ਦਾ ਇਹ ਵਾਕ ਹੈ: ਮੈਂ ਯਾਕੂਬ ਦੇ ਹੰਕਾਰ ਤੋਂ ਘਿਣ ਕਰਦਾ ਹਾਂ ਅਤੇ ਉਹ ਦੇ ਗੜ੍ਹਾਂ ਨਾਲ ਵੈਰ ਰੱਖਦਾ ਹਾਂ, ਅਤੇ ਮੈਂ ਸ਼ਹਿਰ ਨੂੰ ਅਤੇ ਉਸ ਵਿਚਲੀ ਹਰ ਚੀਜ਼ ਨੂੰ ਹਵਾਲੇ ਕਰ ਦਿਆਂਗਾ।

⁹ਅਤੇ ਜੇ ਇੱਕੋ ਘਰ ਵਿੱਚ ਦਸ ਆਦਮੀ ਬਚੇ ਰਹਿਣ, ਤਾਂ ਓਹ ਵੀ ਮਰ ਜਾਣਗੇ।

¹⁰ਅਤੇ ਜਦੋਂ ਕਿਸੇ ਦਾ ਸਾਕ, ਅਰਥਾਤ ਲੋਥਾਂ ਨੂੰ ਸਾੜਨ ਵਾਲਾ, ਹੱਡੀਆਂ ਨੂੰ ਘਰੋਂ ਬਾਹਰ ਲੈ ਜਾਣ ਲਈ ਉਹ ਨੂੰ ਚੁੱਕੇਗਾ, ਅਤੇ ਘਰ ਦੇ ਸਭ ਤੋਂ ਅੰਦਰਲੇ ਕਮਰੇ ਵਿੱਚ ਜੋ ਕੋਈ ਹੋਵੇ ਉਹ ਨੂੰ ਪੁੱਛੇਗਾ, “ਕੀ ਤੇਰੇ ਨਾਲ ਹੁਣ ਵੀ ਕੋਈ ਹੈ?” ਅਤੇ ਉਹ ਉੱਤਰ ਦੇਵੇਗਾ, “ਕੋਈ ਨਹੀਂ,” ਤਾਂ ਉਹ ਆਖੇਗਾ, “ਚੁੱਪ! ਅਸੀਂ ਸਾਡੇ ਪਿਤਾ ਦਾ ਨਾਮ ਨਹੀਂ ਲੈਣਾ।”

¹¹ਕਿਉਂ ਜੋ ਵੇਖੋ, ਸਾਡਾ ਪਿਤਾ ਹੁਕਮ ਦਿੰਦਾ ਹੈ, ਅਤੇ ਵੱਡਾ ਘਰ ਟੋਟੇ-ਟੋਟੇ ਹੋ ਜਾਵੇਗਾ ਅਤੇ ਛੋਟਾ ਘਰ ਚੂਰ-ਚੂਰ। ¹²ਕੀ ਘੋੜੇ ਢਿੱਗ ਉੱਤੇ ਦੌੜਦੇ ਹਨ? ਕੀ ਕੋਈ ਬਲਦਾਂ ਨਾਲ ਸਮੁੰਦਰ ਨੂੰ ਵਾਹੁੰਦਾ ਹੈ? ਪਰ ਤੁਸੀਂ ਨਿਆਂ ਨੂੰ ਜ਼ਹਿਰ ਬਣਾ ਦਿੱਤਾ ਹੈ ਅਤੇ ਧਾਰਮਿਕਤਾ ਦੇ ਫਲ ਨੂੰ ਕੌੜਾ ਜ਼ਹਿਰ। ¹³ਤੁਸੀਂ ਜੋ ਲੋ-ਦਬਾਰ ਉੱਤੇ ਖ਼ੁਸ਼ ਹੁੰਦੇ ਹੋ ਅਤੇ ਆਖਦੇ ਹੋ, “ਕੀ ਅਸੀਂ ਆਪਣੇ ਹੀ ਬਲ ਨਾਲ ਕਰਨਾਈਮ ਨੂੰ ਆਪਣੇ ਲਈ ਨਹੀਂ ਲੈ ਲਿਆ?” ^a a v13 ਜਿਹੜੇ ਦੋ ਨਗਰਾਂ ਨੂੰ ਜਿੱਤਣ ਦਾ ਇਸਰਾਏਲ ਮਾਣ ਕਰਦਾ ਹੈ, ਉਨ੍ਹਾਂ ਦੇ ਨਾਵਾਂ ਵਿੱਚ ਠੱਠਾ ਲੁਕਿਆ ਹੋਇਆ ਹੈ: ਲੋ-ਦਬਾਰ ਦੀ ਅਵਾਜ਼ “ਨਾ-ਕੁਝ ਚੀਜ਼” ਵਰਗੀ ਹੈ, ਅਤੇ ਕਰਨਾਈਮ ਦਾ ਅਰਥ “ਸਿੰਗ” ਹੈ—ਜੋ ਬਲ ਦਾ ਨਿਸ਼ਾਨ ਹੈ। ਉਨ੍ਹਾਂ ਦਾ ਹੰਕਾਰੀ ਮਾਣ ਅਸਲ ਵਿੱਚ ਕੁਝ-ਵੀ-ਨਹੀਂ ਉੱਤੇ ਘਮੰਡ ਕਰਨ ਦੇ ਬਰਾਬਰ ਹੈ।

¹⁴ਪਰ ਵੇਖੋ—ਹੇ ਇਸਰਾਏਲ ਦੇ ਘਰਾਣੇ, ਮੈਂ ਤੁਹਾਡੇ ਵਿਰੁੱਧ ਇੱਕ ਕੌਮ ਖੜ੍ਹੀ ਕਰ ਰਿਹਾ ਹਾਂ, ਸੁਰਗੀ ਸੈਨਾਂ ਦੇ ਪਿਤਾ ਦਾ ਵਾਕ ਹੈ, ਅਤੇ ਓਹ ਤੁਹਾਨੂੰ ਲਬੋ-ਹਮਾਥ ਤੋਂ ਲੈ ਕੇ ਅਰਾਬਾਹ ਦੀ ਨਦੀ ਤੱਕ ਦੁਖ ਦੇਣਗੇ।