Leiyasor kala paikhareka kahaibing kakhanang ngasāranu
Kanaoi phulāngli pipamda, mayao kaphā shaida, laa kathar sākhuida, kala Josephwui khangachei chili mangaphaningmakhala mibing ngāharra. Athumwui kha̱rāngai ngasakhavā hina khakhālkahaina. Ithumwui Avāna akhalattawui ming eina kāchi phunghaira: athumna ngayeiwui ngalemli ringkhavā ngalei kathānli khuivāra, kala ana athumli yangthut khavai ngalei akha shokhuira.
6 1Zionli leiyasor kahaibing kala Samaria kaphungli nganantāp kahaibing yur khareiwui mi maholaka kahaibing, Israelwui shimna athumwuili rākahai mibing kakhanang ngasāranu! 2Calnehli kānkalu kala yanglu; chiwui eina Hamath khareili vālu; chiwui thili Philistinewui Gathli tāvālu. Nathum hi wungram hibingwui vanga phāmeila? Maningkha athumwui leiret nathumwui leiretwui vanga reikhameirala? 3Nathumna kalākashi atam chi ngareithui ngasaka, chithālala khangama̱wui munga chi nganailak ngasaka. 4Athumna mafahāwui petli ngasāmkhui, kala athumwui hamkahaili reisang, yao ashangva̱wui eina yaonaobing shaida, kala kahom shimwui eina seinaobing shaiya. 5Athumna tingteilā singda, David thāda athum khalattawui vang laawui akap-akai sākhui. 6Athumna khongsai kapem eina drakhāra̱ mang, kala phameikap kaje thao eina khalattali neochin, kha athumna Josephwui shimān chiwui vang wukkhanang maleimana. 7Chiwui vang eina ara athum raithā kahaibingwui mangāshong raikathāli khuithuihaora, kala reisanglak eina leibingwui khamathān chi thuihaora.
8Proho Avāna akhalatta eina ngashithaira; hi saikorawui Avāwui hāngkashokna: Jacobwui langkaso chi ina sānhaira kala awui raipanbing yangkharinga, kala ina keinung kala chiwui alungli khalei saikora chi mihaora.
9Kala shim akhali mi tharā horhaiakha, athumla thira.
10Kala mi akhawui theisā, phasā chuikatā mi a, ara̱kui shimwui eina khuishokkhavai ali khāngkhui tharan, kala shimlungwui alungli khalei ali hokhuilaga, "Na ngasoda arui mi akha leirala?" da hānga, kala ana, "Khipākha maleimana," da ngahānkai, chitharan ana, "Hushai! Ithumna ithumwui Avāwui ming mapopaimana," da hāngra.
11Kaja yanglu, ithumwui Avāna ningmi, kala shim khareia chi shirthatserhaora kala shim kateo chi akai-akai sākhaihaora. 12Siguibingna lungkaitungli yongzatla? Mina mukkā eina yirei luila? Chithālala nathumna mashunli kathiri ngasā ngasakhaira, kala khamashung khangarongwui athei chi thingkhā ngasā ngasakhaira. 13Nathum Lo-debarwui vang ringphā kahaibing kala hāngabing, "Ithumna ithum khalattawui yāng eina Karnaim chi ithum khalattawui vang khuihaira maningmala?" a a v13 Israelna khuiya da langkaso sāwui keinung khani chi khangayiwui khamayā zang: Lo-debar chi 'khikhala maleiwui ot' da khai, kala Karnaim chi 'angaji' da khamayā zang—yāngwui zimiksho. Athumwui langkaso khamayā chi khikhala maleili maikāng kahai thāda.
14Kha yanglu, O Israelwui shimkhur, ina nathumtungli yur akha raisāri, da saikorawui Avāna hānga, kala athumna nathumli Hamath vāzang khavai eina thuilaga Arabahwui kongrā vāzang khavai chotchāng ngasakra.
