Hakso hoba maang khümbo kibü shuong shanga ügütü
Honeibü shen ka langsenko yepbü, sanlon maibü shoushou shaubü, chia latetbü, hoba Josef leilubü shanga maang aangangbü shuong shanga ügütü. Haoeneibü hakso kho shabü ki. seneibü Bou himshuong ka theyolanyokei: haoen langsenbü shuong jenyua shaangbou yeiko haulabü, hoba haoei haoen shieikoela shanga chem che onglabü.
6 1Zion ka hakso kibü shuong hoba Samaria shongha khümbo kibü shuong shanga ügütü— shaangbou phang thükkabü mütshuong, aoyou jungto Israel chem louda! 2Kalne to danan chühashi; khüka Hamat yaangbü to hauashi; kheijinei Filistiabü Gath to yanashi. Habü sangle shuong toje kan maibou lo? Ayingsi haoeneibü leilang kaneibü toje yaangbou lo? 3Kanei thushed chalou khüyou phoda, lausikei ik shatyobü songdakbü nyangko lottida. 4Haoen thunyu hauh shena yepda hoba haoeneibü haksoshang thüka haksoda, sanshuong ka sanlon shoushou hoba lamleshang ka masu shoushou shauda. 5Haoen kongkin jungeida hoba Dawid phatko, haoen lolo shanga pithung kongkin shuong küntida. 6Haoen ih thung shenan yungda hoba onang maibou thamei naangkuda, lausikei haoen Josef leilubü shanga maang angangda. 7Khoei tou haoen langsenbü shuong thüka shaangbou yeiko haulabü, hoba haksoko kibü shuongeibü olinbü dankhümlabü.
8Saopobü Bou hao himshuong ka theyolanyokei—ho Lakjaibü dan Bouei lauda: Ngei Jakobeibü lilibü mangsenda hoba haoeibü lapheishon shuong hatentilabü, hoba sangnyu hoba khona kibü pendou danko kuan aptilabü.
9Hoba chem chenei müt an ong kialonga, haoenkei hailabü.
10Hobaje müt cheeibü chempen, mang juokbü khoei, chem ka lo shuong leian satla hao angtida, hoba maangkabou shemjang to kibü aoyou to ngakei, “Nyi yoa aoyou thon ki si?” hoba haoei jongaikei, “Müt che ongkei aki,” kheijinei haoei laulabü, “Sangsemashi! Senei seneibü Bou nyen ngala athük.”
11Aishanga chühashi, seneibü Bouei ngühkhüm kuda, hoba chem yaangbü netla yeiko phetnyinlabü hoba chem hanbü shisho shisho leilulabü. 12Koli shuongei laang thüka laangla lo? Aoei masu yoa yungnyu sek laütida lo? Lausikei kanei ngühmai kom la yeitikei hoba saopobü hek kom khauekbü la yeitikei. 13Kan Lodebar shanga olinyobü shuong hoba lauda, “Künei kün lulueibü hauei Karnaim kün shanga leikei aki lo?” a a v13 Israelbüei lekei dogo lilibü lenbü sangnyu nyi ho mü weabü thenyeng yoan ki: Lodebar kho ‘aikei akibü peisilei’ phatko ditbü, hoba Karnaim kho ‘shing’ dogo thenyeng—hau thensangbü che. Haoeneibü lilibü lenbü kho aikei akibüa soneikangbü yoa ong ki.
14Lausikei chühashi—ngei kan thükto phang che phonenda, O Israel chem, dogo Lakjaibü dan Bouei lauda, hoba haoenei Lebo Hamat ka Araba shushou sühko kan khon kutilabü.
