Gẹnẹsisi 9

9 ¹Nígbà náà ni Baba wa sì bùkún Noa àti àwọn ọmọ rẹ̀, ó wí pé, “Ẹ bí sí i, kí ẹ sì pọ̀ sí i, kí ẹ sì kún ayé. ²Gbogbo ẹranko ayé, gbogbo ẹyẹ ojú ọ̀run, ohun gbogbo tí ń rákò lórí ilẹ̀, àti gbogbo ẹja inú òkun yóò bẹ̀rù yín, ẹ̀rù yín yóò sì bà wọ́n; a ti fi wọ́n lé yín lọ́wọ́. ³Gbogbo ohun alààyè tí ń rìn yóò jẹ́ oúnjẹ yín. Gẹ́gẹ́ bí mo ti fún yín ní ewéko tútù, mo fi ohun gbogbo fún yín nísinsìnyí. ⁴Ṣùgbọ́n ẹ kò gbọdọ̀ jẹ ẹran tí ẹ̀jẹ̀ ìyè rẹ̀ ṣì wà nínú rẹ̀. ⁵Dájúdájú, èmi yóò béèrè ìṣirò fún ẹ̀jẹ̀ yín: lọ́wọ́ gbogbo ẹranko ni èmi yóò ti béèrè rẹ̀, àti lọ́wọ́ gbogbo ènìyàn—olúkúlùkù nítorí ẹ̀mí arákùnrin rẹ̀—èmi yóò béèrè ẹ̀mí ènìyàn. ⁶Ẹnikẹ́ni tí ó bá ta ẹ̀jẹ̀ ènìyàn sílẹ̀, ọwọ́ ènìyàn ni a ó ti ta ẹ̀jẹ̀ rẹ̀ sílẹ̀; nítorí nínú àwòrán Baba, Ọmọ, àti Ẹ̀mí Mímọ́ ni a ṣẹ̀dá ènìyàn. ⁷Ní ti yín, ẹ bí sí i, kí ẹ sì pọ̀ sí i; ẹ tànkálẹ̀ ká ayé kí ẹ sì pọ̀ sí i lórí rẹ̀.”

⁸Nígbà náà ni Baba wa sọ fún Noa àti fún àwọn ọmọ rẹ̀ tí ó wà pẹ̀lú rẹ̀ pé:

⁹“Ní ti èmi, mo ń fi ìdí májẹ̀mú mi múlẹ̀ pẹ̀lú yín àti pẹ̀lú àwọn ìran yín tí ń bọ̀ lẹ́yìn yín nísinsìnyí, ¹⁰àti pẹ̀lú gbogbo ẹ̀dá alààyè tí ó wà pẹ̀lú yín—àwọn ẹyẹ, ohun ọ̀sìn, gbogbo ẹranko igbó ayé—gbogbo èyí tí ó bá yín jáde kúrò nínú ọkọ̀, gbogbo ohun alààyè ayé. ¹¹Mo fi ìdí májẹ̀mú mi múlẹ̀ pẹ̀lú yín: a kì yóò tún gé gbogbo ẹran-ara kúrò nípasẹ̀ omi ìkún-omi mọ́; ìkún-omi kì yóò tún wà láti pa ayé run mọ́.” ¹²Nígbà náà ni Baba wa wí pé, “Èyí ni àmì májẹ̀mú tí mo ń dá láàrín èmi àti ẹ̀yin àti gbogbo ẹ̀dá alààyè tí ó wà pẹ̀lú yín, fún gbogbo ìran tí ń bọ̀: ¹³Mo ti fi òṣùmàrè mi sí inú àwọsánmà gẹ́gẹ́ bí àmì májẹ̀mú tí ó wà láàrín èmi àti ayé. ¹⁴Nígbàkigbà tí mo bá mú àwọsánmà wá sórí ayé tí òṣùmàrè bá sì farahàn nínú àwọsánmà, ¹⁵èmi yóò rántí májẹ̀mú mi tí ó wà láàrín èmi àti ẹ̀yin àti gbogbo ẹ̀dá alààyè ti onírúurú gbogbo: omi ìkún-omi kì yóò tún pa gbogbo alààyè run mọ́. ¹⁶Nígbà tí òṣùmàrè bá wà nínú àwọsánmà, èmi yóò rí i, èmi yóò sì rántí májẹ̀mú ayérayé tí ó wà láàrín èmi àti gbogbo ẹ̀dá alààyè ti onírúurú gbogbo lórí ilẹ̀ ayé.” ¹⁷Báyìí ni Baba wa sọ fún Noa pé, “Èyí ni àmì májẹ̀mú tí mo ti fìdí rẹ̀ múlẹ̀ láàrín èmi àti gbogbo alààyè tí ó wà lórí ayé.”

Ṣemu àti Jafẹti Bo Baba Wọn

¹⁸Àwọn ọmọ Noa tí wọ́n jáde kúrò nínú ọkọ̀ ni: Ṣemu, Hamu, àti Jafẹti. (Hamu ni baba Kenaani.). ¹⁹Àwọn mẹ́tẹ̀ẹ̀ta wọ̀nyí ni àwọn ọmọ Noa, láti ọ̀dọ̀ wọn ni a sì ti tàn káàkiri gbogbo ayé.

²⁰Noa, ọkùnrin tí ń ro ilẹ̀, ni ó kọ́kọ́ gbin ọgbà àjàrà. ²¹Nígbà tí ó mu lára wáìnì rẹ̀, ó sì yó, ó sì dùbúlẹ̀ ní ìhòòhò nínú àgọ́ rẹ̀. ²²Hamu, baba Kenaani, rí ìhòòhò baba rẹ̀, ó sì sọ fún àwọn arákùnrin rẹ̀ méjèèjì tí wọ́n wà lóde. ²³Ṣemu àti Jafẹti mú aṣọ ìbora, wọ́n gbé e lé èjìká wọn méjèèjì, wọ́n fi ẹ̀yìn rìn wọlé, wọ́n sì bo ìhòòhò baba wọn; ojú wọn wà sẹ́yìn, nítorí náà wọn kò rí ìhòòhò baba wọn. ²⁴Nígbà tí Noa jí kúrò nínú wáìnì rẹ̀, tí ó sì mọ ohun tí ọmọ rẹ̀ àbíkẹ́yìn ṣe sí i, ²⁵ó wí pé, “Ègún ni fún Kenaani! Òun yóò jẹ́ ẹni tí ó rẹlẹ̀ jùlọ nínú àwọn ìránṣẹ́ fún àwọn arákùnrin rẹ̀.”

²⁶Ó tún wí pé, “Ìbùkún ni fún Baba Ṣemu; kí Kenaani jẹ́ ìránṣẹ́ Ṣemu. ²⁷Kí Baba wa fẹ̀ agbègbè Jafẹti lójú; kí Jafẹti máa gbé inú àwọn àgọ́ Ṣemu, kí Kenaani sì jẹ́ ìránṣẹ́ Ṣemu.”

²⁸Lẹ́yìn ìkún-omi náà, Noa wà láàyè fún ọdún ọ̀ọ́dúnrún ó lé àádọ́ta. ²⁹Àpapọ̀ ọdún tí Noa wà láàyè jẹ́ ẹgbẹ̀rún ó dín àádọ́ta, lẹ́yìn náà ni ó kú.