Mmalite Ọhụrụ nye Noa

Mmalite ọhụrụ nwere iwu sitere nʼaka Nna anyị: mụbaanụ, unu erila anụ nwere ọbara ndụ ya, a ga-ajụkwa ajụjụ maka ndụ mmadụ nʼihi na mmadụ bu onyinyo ya. O tinyere egwurugwu dịka ihe ịrịba ama nke ọgbụgba ndụ. Mgbe ahụ Noa ṅụbigara mmanya oke, Ham kpughere ọtọ ya, a bụkwa Kenan ọnụ.

Isi 9.

Mgbe ahụ, Nna anyị gọziri Noa na ụmụ ya ndị ikom, sị, “Mụọnụ ọmụmụ, baakwanụ ụba, jupụtakwanụ nʼụwa. Anụ ọhịa niile nke ụwa, nnụnụ niile nke mbara igwe, ihe niile na-akpụ akpụ nʼelu ala, na azụ niile nke oké osimiri ga-atụ egwu gị ma maa jijiji nʼihu gị; e nyefeela ha nʼaka gị. Ihe niile dị ndụ ma na-akpụ akpụ ga-abụ nri gị. Dịka m nyere gị ahịhịa ndụ, ugbu a ana m enye gị ihe niile. Ma ị gaghị eri anụ nke ọbara ndụ ya ka dị nʼime ya. Nʼezie, aga m ajụ ajụjụ banyere ọbara ndụ unu: nʼaka anụ ọbụla ka m ga-ajụ ya, nʼakakwa mmadụ ọbụla—onye ọbụla nʼihi ndụ nwanne ya—aga m ajụ maka ndụ mmadụ. Onye ọbụla na-awụfu ọbara mmadụ, site nʼaka mmadụ ka a ga-awụfukwa ọbara ya; nʼihi na nʼoyiyi nke Chineke ka e kere mmadụ. ^a Ma gị onwe gị, mụọ ọmụmụ, baakwa ụba; gbasaa nʼelu ụwa ma baakwa ụba nʼelu ya.”

Mgbe ahụ, Nna anyị gwara Noa na ụmụ ya ndị ikom nọnyeere ya, sị:

“Ma mụ onwe m, ana m eme ka ọgbụgba ndụ m guzosie ike nʼetiti mụ na unu, na ụmụ unu ndị ga-eso unu nʼazụ, na ihe niile e kere eke nke dị ndụ nọnyeere unu—nnụnụ, anụ ụlọ, na anụ ọhịa niile nke ụwa—ihe niile sooro unu site nʼụgbọ mmiri ahụ pụta, ihe niile dị ndụ nke ụwa. Ana m eme ọgbụgba ndụ m nʼetiti mụ na unu: a gaghị ebipụkwa anụ ahụ niile ọzọ site na mmiri iju; iju mmiri agaghịkwa adị ọzọ iji bibie ụwa.” Mgbe ahụ, Nna anyị sịrị, “Nke a bụ ihe ịrịba ama nke ọgbụgba ndụ m na-eme nʼetiti mụ na unu na ihe niile e kere eke nke dị ndụ nọnyeere unu, ruo ọgbọ niile ga-abịa: Etinyela m eke na egwurugwu m nʼime igwe ojii dịka ihe ịrịba ama nke ọgbụgba ndụ dị nʼetiti mụ na ụwa. Mgbe ọbụla m wetara igwe ojii nʼelu ụwa, eke na egwurugwu ahụ pụtakwara nʼime igwe ojii, aga m echeta ọgbụgba ndụ m dị nʼetiti mụ na unu na ihe niile e kere eke nke dị ndụ nke ụdị ọbụla: mmiri iju agaghịkwa ebibi ndụ niile ọzọ. Mgbe eke na egwurugwu ahụ dị nʼime igwe ojii, aga m ahụ ya ma cheta ọgbụgba ndụ ebighị ebi ahụ dị nʼetiti mụ na ihe niile e kere eke nke dị ndụ nke ụdị ọbụla dị nʼụwa.” Ya mere, Nna anyị gwara Noa, sị, “Nke a bụ ihe ịrịba ama nke ọgbụgba ndụ ahụ m guzobere nʼetiti mụ na ndụ niile dị nʼụwa.”

Shem na Jafet Kpuchie Nna Ha

Ụmụ Noa ndị ikom si nʼụgbọ mmiri ahụ pụta bụ: Shem, Ham, na Jafet. (Ham bụ nna Kenan.). Ndị a atọ bụ ụmụ Noa ndị ikom, sitekwa na ha ka mmadụ gbasasịrị nʼụwa niile.

Noa, onye ọrụ ubi, bụ onye mbụ kụrụ ubi vaịn. Mgbe ọ ṅụrụ ụfọdụ nʼime mmanya ya, mmanya gbagburu ya, o wee dinaa nʼụlọ ikwu ya gba ọtọ. Ham, bụ nna Kenan, hụrụ nna ya ka ọ gba ọtọ, ọ gaa gwa ụmụnne ya abụọ nọ nʼezi. Shem na Jafet weere uwe mwụda, tụkwasị ya nʼubu ha abụọ, jiri azụ ha gbaga ije baa, kpuchie ọtọ nna ha; ihu ha chere nʼazụ, ya mere ha ahụghị ọtọ nna ha. Mgbe Noa si nʼụra mmanya ya teta ma mata ihe nwa ya nwoke nke nta mere ya, ọ sịrị, “Ka a bụọ Kenan ọnụ! Ọ ga-abụ ohu nke dịkarịsịrị ala nʼebe ụmụnne ya nọ.”

Ọ sịkwara, “Ngọzị dịrị Nna Shem; ka Kenan bụrụ ohu Shem. Ka Nna anyị mee ka oké ala Jafet saa mbara; ka Jafet biri nʼụlọ ikwu Shem, ka Kenan bụrụkwa ohu Shem.”

Mgbe iju mmiri ahụ gasịrị, Noa dịrị ndụ afọ narị atọ na iri ise. Afọ niile Noa dịrị ndụ dị narị itoolu na iri ise, mgbe ahụ ọ wee nwụọ.