ዘፍጥረት 9

9 ¹አባታችንም ኖኅንና ልጆቹን ባረካቸው፤ እንዲህም አላቸው፤ “ብዙ ተባዙ፤ ምድርንም ሙሉ። ²የምድር አራዊት ሁሉ፣ የሰማይ ወፎች ሁሉ፣ በመሬት ላይ የሚሳብ ሁሉ፣ የባሕርም ዓሦች ሁሉ ይፈሩአችኋል፤ ይደነግጡባችኋል፤ በእጃችሁም ተሰጥተዋል። ³ሕያው ሆኖ የሚንቀሳቀስ ሁሉ ምግባችሁ ይሆናል። አረንጓዴውን ተክል እንደ ሰጠኋችሁ፣ አሁን ሁሉን እሰጣችኋለሁ። ⁴ነገር ግን ሕይወቱ ማለትም ደሙ በውስጡ ያለውን ሥጋ አትብሉ። ⁵ስለ ሕይወታችሁም ደም በርግጥ ተጠያቂ አደርጋለሁ፤ ከእያንዳንዱ እንስሳ እሻዋለሁ፤ ከሰውም ቢሆን፣ ከእያንዳንዱ ሰው ስለ ወንድሙ ሕይወት የሰውን ሕይወት እሻለሁ። ⁶የሰውን ደም የሚያፈስስ ሁሉ፣ ደሙ በሰው ይፈስሳል፤ ሰው የተፈጠረው በአብ፣ በወልድና በመንፈስ ቅዱስ መልክ ነውና። ⁷እናንተ ግን፣ ብዙ ተባዙ፤ በምድር ላይ ተራቡ፤ በእርስዋም ላይ ተባዙ።”

⁸አባታችንም ኖኅንና ከእርሱ ጋር የነበሩትን ልጆቹን እንዲህ አላቸው፤

⁹“እነሆ፣ እኔ ከእናንተ ጋር፣ ከእናንተም በኋላ ከሚመጣው ዘራችሁ ጋር ኪዳኔን አሁን አቆማለሁ፤ ¹⁰ከእናንተም ጋር ካለው ሕያው ፍጥረት ሁሉ ጋር፤ ከወፎች፣ ከቤት እንስሳት፣ ከምድር አራዊት ሁሉ ጋር፤ ከእናንተ ጋር ከመርከብ ከወጣው ሁሉ ጋር፣ ከምድር ሕያዋን ፍጥረታት ሁሉ ጋር። ¹¹ኪዳኔን ከእናንተ ጋር አቆማለሁ፤ ሥጋ ለባሽ ሁሉ ዳግመኛ በጥፋት ውሃ አይጠፋም፤ ምድርንም የሚያጠፋ የጥፋት ውሃ ዳግመኛ አይሆንም።” ¹²አባታችንም እንዲህ አለ፤ “በእኔና በእናንተ መካከል፣ ከእናንተም ጋር ካለው ሕያው ፍጥረት ሁሉ መካከል ለሚመጡት ትውልዶች ሁሉ የማደርገው የኪዳን ምልክት ይህ ነው፤ ¹³በእኔና በምድር መካከል ላለው ኪዳን ምልክት እንዲሆን፣ ቀስተ ደመናዬን በደመና ውስጥ አኖርሁ። ¹⁴በምድር ላይ ደመና ባመጣሁ ጊዜ፣ ቀስተ ደመናውም በደመና ውስጥ በታየ ጊዜ፣ ¹⁵በእኔና በእናንተ መካከል፣ በየዓይነቱም ሕያው ፍጥረት ሁሉ መካከል ያለውን ኪዳኔን አስባለሁ፤ የጥፋት ውሃም ሕይወት ያለውን ሁሉ ዳግመኛ አያጠፋም። ¹⁶ቀስተ ደመናው በደመና ውስጥ በሚሆንበት ጊዜ፣ አየዋለሁ፤ በእኔና በምድር ላይ ባለው በየዓይነቱ ሕያው ፍጥረት ሁሉ መካከል ያለውን የዘላለም ኪዳን አስባለሁ።” ¹⁷አባታችንም ኖኅን እንዲህ አለው፤ “በእኔና በምድር ላይ ባለው ሕይወት ሁሉ መካከል ያቆምሁት የኪዳን ምልክት ይህ ነው።”

ሴምና ያፌት አባታቸውን ሸፈኑ

¹⁸ከመርከብ የወጡት የኖኅ ልጆች ሴም፣ ካምና ያፌት ነበሩ። (ካም የከነዓን አባት ነበር።) ¹⁹እነዚህ ሦስቱ የኖኅ ልጆች ነበሩ፤ ምድርም ሁሉ ከእነርሱ ተሞላች።

²⁰ኖኅም ገበሬ ሆኖ፣ የወይን ተክል የተከለ የመጀመሪያው ሰው ሆነ። ²¹ከወይኑም ጠጥቶ ሰከረ፤ በድንኳኑም ውስጥ ተራቁቶ ተኛ። ²²የከነዓን አባት ካም የአባቱን ዕርቃን አየ፤ በውጭም ላሉት ለሁለቱ ወንድሞቹ ነገረ። ²³ሴምና ያፌት ልብስ ወስደው በሁለቱ ትከሻቸው ላይ ጣሉ፤ የኋሊትም እየሄዱ ገብተው የአባታቸውን ዕርቃን ሸፈኑ፤ ፊታቸው ወደ ኋላ ዞሮ ስለ ነበር የአባታቸውን ዕርቃን አላዩም። ²⁴ኖኅም ከወይኑ ስካር ነቅቶ ታናሽ ልጁ ያደረገበትን ባወቀ ጊዜ፣ ²⁵እንዲህም አለ፤ “ከነዓን የተረገመ ይሁን! ለወንድሞቹ የባሪያዎች ባሪያ ይሆናል።”

²⁶ደግሞም እንዲህ አለ፤ “የሴም አባት የተባረከ ይሁን፤ ከነዓንም የሴም ባሪያ ይሁን። ²⁷አባታችን የያፌትን ድንበር ያስፋፋ፤ ያፌትም በሴም ድንኳኖች ይኑር፤ ከነዓንም የሴም ባሪያ ይሁን።”

²⁸ከጥፋት ውሃው በኋላ ኖኅ ሦስት መቶ አምሳ ዓመት ኖረ። ²⁹ኖኅ በአጠቃላይ ዘጠኝ መቶ አምሳ ዓመት ኖረ፤ ከዚያም ሞተ።