創世記 9

9 ¹跟住我哋嘅父就賜福畀挪亞同佢啲仔,話:「你哋要生養眾多,遍滿全地。 ²地上嘅走獸、空中嘅飛鳥、一切喺地上爬嘅動物,同埋海裏嘅魚,都會怕你哋、驚你哋;佢哋都交喺你哋手裏。 ³一切有生命、識郁嘅動物都可以做你哋嘅食物。我點樣將青菜賜畀你哋,而家我就將呢一切都賜畀你哋。 ⁴但係帶住血、即係帶住生命嘅肉,你哋唔可以食。 ⁵至於你哋嘅血、即係你哋嘅生命,我一定會追討:凡係走獸,我都要追討;凡係人,人流咗兄弟嘅血,我都要追討佢嘅命。 ⁶凡流人血嘅,佢嘅血都要由人流出嚟; 因為人係按住 父、子、聖靈嘅形象造成嘅。 ⁷至於你哋,要生養眾多; 喺地上繁衍, 喺地上加增。」

⁸跟住我哋嘅父對挪亞同埋佢一齊嘅啲仔話:

⁹「至於我,我而家同你哋、同你哋以後嘅後裔立我嘅約, ¹⁰亦都同你哋一齊嘅一切有生命嘅活物——飛鳥、牲畜、地上一切嘅野獸,即係凡同你哋一齊出方舟嘅、地上一切嘅活物立約。 ¹¹我同你哋立我嘅約:凡有血肉嘅,唔會再畀洪水滅絕;亦都唔會再有洪水嚟毀滅大地。」 ¹²跟住我哋嘅父話:「我同你哋、同一切同你哋一齊嘅活物所立嘅約,直到世世代代,呢個就係嗰個記號: ¹³我將我嘅彩虹放喺雲裏面,做我同大地立約嘅記號。 ¹⁴每逢我使雲遮蓋大地,彩虹喺雲裏面出現嘅時候, ¹⁵我就會記念我同你哋、同一切各類有生命嘅活物所立嘅約:洪水唔會再毀滅一切有血肉嘅。 ¹⁶彩虹喺雲裏面嘅時候,我一睇見就會記念:喺我同地上一切各類活物之間,呢個永遠嘅約。」 ¹⁷所以我哋嘅父對挪亞話:「呢個就係我同地上一切有血肉嘅所立嘅約嘅記號。」

閃同雅弗遮蓋佢哋嘅父親

¹⁸出方舟嘅挪亞啲仔就係:閃、含同雅弗。(含就係迦南嘅父親。) ¹⁹呢三個係挪亞嘅仔;全地嘅人都係由佢哋散播出嚟嘅。

²⁰挪亞係種地嘅人,佢率先開墾咗一個葡萄園。 ²¹佢飲咗啲葡萄園嘅酒,就醉咗,喺自己嘅帳棚裏面赤住身瞓。 ²²迦南嘅父親含睇見自己父親赤身露體,就出去話畀外面兩個兄弟聽。 ²³閃同雅弗攞咗件外袍,搭喺佢哋兩個嘅膊頭上面,倒後行入去,遮蓋咗父親嘅赤身;佢哋面向後,所以睇唔到父親嘅赤身。 ²⁴挪亞酒醒之後,知道咗佢細仔對佢做過乜嘢, ²⁵就話:「迦南要受咒詛! 佢要做兄弟中最 低下嘅奴僕。」

²⁶佢又話:「閃嘅父應當稱頌; 願迦南做閃嘅奴僕。 ²⁷願我哋嘅父擴張雅弗嘅境界; 願雅弗住喺閃嘅帳棚裏面, 又願迦南做閃嘅奴僕。」

²⁸洪水以後,挪亞又活咗三百五十年。 ²⁹挪亞一生共活咗九百五十年,跟住就過咗身。