Sabon Farawa ga Nuhu

Sabon farawa tare da dokoki daga Ubanmu: ku yawaita, kada ku ci jinin rai, kuma za a nemi hakkin ran mutum domin mutane suna ɗauke da surarsa. Ya sa bakan gizo alamar alkawari. Sa'an nan Nuhu ya bugu, Ham ya tona tsiraicinsa, aka kuma la'anta Kan'ana.

Babi na 9.

Sai Ubanmu ya albarkaci Nuhu da 'ya'yansa maza, yana cewa, “Ku haifu, ku yawaita, ku cika duniya. Dukan namun duniya, da dukan tsuntsayen sama, da dukan abin da yake rarrafe a ƙasa, da dukan kifin teku za su ji tsoronku su kuma firgita da ku; an sa su a hannunku. Kowane abu mai rai da yake motsi zai zama abincinku. Kamar yadda na ba ku ganyaye kore, yanzu ina ba ku kome. Amma kada ku ci naman da yake da jininsa na rai a cikinsa. Hakika zan nemi lissafin jininku; daga kowace dabba zan neme shi, kuma daga kowane mutum—wato kowanne saboda ran ɗan'uwansa—zan nemi ran mutum. Duk wanda ya zubar da jinin mutum, ta hannun mutane za a zubar da jininsa; gama a cikin siffar Allah ne aka halicci mutum. ^a Amma ku, ku haifu ku yawaita; ku bazu a duniya ku kuma yawaita a cikinta.”

Sai Ubanmu ya ce wa Nuhu da 'ya'yansa maza da suke tare da shi,

“Ga ni kuwa, yanzu ina kafa alkawarina da ku, da kuma zuriyarku bayanku, da kuma kowace halitta mai rai da take tare da ku—tsuntsaye, da dabbobi, da kowane naman jeji na duniya—dukan abin da ya fito daga jirgin tare da ku, kowane abu mai rai na duniya. Na kafa alkawarina da ku, cewa ba za a ƙara hallaka dukan mai jiki da ruwan ambaliya ba; ba kuwa za a ƙara aukowar ambaliya domin ta hallaka duniya ba.” Sai Ubanmu ya ce, “Wannan ita ce alamar alkawarin da nake yi tsakanina da ku da kowace halitta mai rai da take tare da ku, har dukan tsararraki masu zuwa. Na sa bakan gizona a cikin gizagizai, yă zama alamar alkawari tsakanina da duniya. Duk sa'ad da na kawo gizagizai bisa duniya, bakan gizo kuma ya bayyana a cikin gizagizan, zan tuna da alkawarina tsakanina da ku da kowace halitta mai rai na kowane iri; ruwan ambaliya ba zai ƙara hallaka dukan masu rai ba. Sa'ad da bakan gizo yake a cikin gizagizai, zan gan shi in tuna da madawwamin alkawari tsakanina da kowace halitta mai rai na kowane iri a duniya.” Saboda haka Ubanmu ya ce wa Nuhu, “Wannan ita ce alamar alkawarin da na kafa tsakanina da dukan masu rai a duniya.”

Shem da Yafet Suka Rufe Mahaifinsu

'Ya'yan Nuhu maza da suka fito daga jirgin su ne, Shem, da Ham, da Yafet. (Ham shi ne mahaifin Kan'ana.). Waɗannan uku su ne 'ya'yan Nuhu, daga gare su kuwa aka warwatsa mutane ko'ina a duniya.

Nuhu, mutum mai noma, shi ne farkon wanda ya shuka gonar inabi. Da ya sha ruwan inabinsa, sai ya bugu, ya kwanta tsirara a cikin alfarwarsa. Ham, mahaifin Kan'ana, ya ga mahaifinsa tsirara, sai ya gaya wa 'yan'uwansa biyu da suke a waje. Sai Shem da Yafet suka ɗauki mayafi, suka ɗora shi a kafaɗunsu biyu, suka shiga suna ja da baya, suka rufe tsiraicin mahaifinsu; fuskokinsu suna wajen baya, don kada su ga tsiraicin mahaifinsu. Da Nuhu ya farka daga buguwar ruwan inabinsa, ya kuma san abin da ɗansa ƙarami ya yi masa, sai ya ce, “La'ananne ne Kan'ana! Zai zama bawa mafi ƙasƙanci ga 'yan'uwansa.”

Ya kuma ce, “Albarka ta tabbata ga Uban Shem; Kan'ana kuwa yă zama bawan Shem. Ubanmu yă faɗaɗa yankin Yafet; Yafet kuwa yă zauna a cikin alfarwun Shem, Kan'ana kuma yă zama bawan Shem.”

Bayan ambaliyar ruwa, Nuhu ya yi shekara ɗari uku da hamsin yana da rai. Dukan kwanakin ran Nuhu shekara ɗari tara da hamsin ne, sa'an nan ya mutu.