ንኖህ ሓዱሽ መጀመርታ

ሓድሽ ጅማሮ ምስ ሕግታት ኣቦና፦ ተባዛሑ፥ ደም ህይወት ዘለዎ ስጋ ኣይትብልዑ፥ ህይወት ሰብ ድማ ይሕተተሉ፥ ሰብ ብመልክዑ ተፈጢሩ ስለ ዝኾነ። ነቲ ቀስቲ ደበና ድማ ምልክት ኪዳን ገይሩ ኣንበሮ። ድሕሪኡ ኖህ ሰኸረ፥ ካም ድማ ሕፍረቱ ቐልዐ፥ ከነዓን ከዓ ተረግመ።

ምዕራፍ 9።

ኣቦና ድማ ንኖህን ንደቁን ባሪኹ ከምዙይ በሎም፦ “ተፋረዩ፥ ተባዛሑ፥ ንምድሪ ድማ ምልእዋ። ኵሉ ኣራዊት ምድርን ኵሉ ኣዕዋፍ ሰማይን ኣብ ምድሪ ዝንቀሳቐስ ኵሉን ኵሉ ዓሳ ባሕርን ክፈርሃኹምን ክርዕደኩምን እዩ፤ ኣብ ኢድኩም ተዋሂቦም ኣለዉ። ህይወት ዘለዎ ዝንቀሳቐስ ኵሉ ምግብኹም ክኸውን እዩ። ከምቲ ሓመልማል ዝሃብኩኹም፥ ሕዚ ኵሉ እህበኩም ኣለኹ። ነቲ ህይወቱ ዝኾነ ደሙ ገና ዘለዎ ስጋ ግና ኣይትብልዑ። ብርግፅ ድማ ንደምኩም ክደልዮ እየ፤ ካብ ኵሉ እንስሳ ክደልዮ እየ፤ ካብ ኵሉ ሰብውን፥ ነፍሲ ሰብ ካብ ኢድ ሓዉ ክደልዮ እየ። ደም ሰብ ዘፍስስ ኵሉ፥ ደሙ ብሰብ ክፈስስ እዩ፤ ብመልክዕ እግዚኣብሄር ሰብ ተፈጢሩ እዩ እሞ። ^a ንስኻትኩም ድማ ተፋረዩ ተባዛሑ፤ ኣብ ምድሪ ተዘርግሑ፥ ኣብኣ ድማ ተባዛሑ።”

ኣቦና ድማ ንኖህን ነቶም ምስኡ ዝነበሩ ደቁን ከምዙይ በሎም፦

“ኣነ ድማ እንሆ ኪዳነይ ምሳኻትኩም፥ ምስ ዘርእኹም ድሕሬኹምን ኤቕውም ኣለኹ፤ ምስ ኵሉ እቲ ምሳኻትኩም ዘሎ ህይወት ዘለዎ ፍጡር፥ ኣዕዋፍን እንስሳን ኵሉ ኣራዊት ምድርን፥ ካብ መርከብ ምሳኻትኩም ዝወፀ ኵሉን፥ ኵሉ ህይወት ዘለዎ ፍጡር ምድርን ድማ ኤቕውም ኣለኹ። ኪዳነይ ምሳኻትኩም ኤቕውም ኣለኹ፤ ደጊም ኵሉ ስጋ ብማይ ጥፍኣት ኣይክፅነትን እዩ፤ ደጊምውን ንምድሪ ዘጥፍእ ማይ ጥፍኣት ኣይኸውንን እዩ።” ኣቦና ድማ ከምዙይ በለ፦ “እዝ ኣብ መንጎይን መንጎኹምን ምስ ኵሉ ምሳኻትኩም ዘሎ ህይወት ዘለዎ ፍጡርን ንዅሉ ዝመፅእ ወለዶ ዝገብሮ ዘለኹ ምልክት ኪዳን እዙይ እዩ፦ ቀስቲ ደበናይ ኣብ ደመና ገይረ ኣለኹ፤ ንሱ ኸዓ ኣብ መንጎይን መንጎ ምድርን ዘሎ ምልክት ኪዳን እዩ። ኣብ ልዕሊ ምድሪ ደመና ምስ ኣምፅእ፥ ቀስቲ ደበና ድማ ኣብ ደመና ምስ ተርኣየ፥ ነቲ ኣብ መንጎይን መንጎኹምን ምስ ኵሉ ዓይነት ህይወት ዘለዎ ፍጡርን ዘሎ ኪዳነይ ክዝክር እየ፤ ደጊም ማይ ጥፍኣት ንዅሉ ህይወት ዘለዎ ኣየጥፍኣን እዩ። ቀስቲ ደበና ኣብ ደመና ምስ ዝህሉ፥ ክርእዮ እየ፤ ነቲ ኣብ መንጎይን ኣብ ምድሪ ምስ ዘሎ ኵሉ ዓይነት ህይወት ዘለዎ ፍጡርን ዘሎ ናይ ዘለኣለም ኪዳን ድማ ክዝክር እየ።” ኣቦና ድማ ንኖህ “እዝ ኣብ መንጎይን ኣብ ምድሪ ዘሎ ኵሉ ህይወት ዘለዎ ፍጡርን ዘቖምክዎ ኪዳን ምልክት እዙይ እዩ” በሎ።

ሴምን ያፌትን ንኣቦኦም ከደኑ

ደቂ ኖህ፥ ካብ መርከብ ዝወፁ፥ ሴም፥ ካም፥ ያፌት እዮም። (ካም ከዓ ኣቦ ከነዓን እዩ።) እዞም ሰለስተ ደቂ ኖህ እዮም፤ ካባታቶም ድማ ኣብ ኵላ ምድሪ ተኸፋፈሉ።

ኖህ ድማ ናይ ምድሪ ሰብኣይ ኮይኑ፥ ኣታኽልቲ ወይኒ ዝተኸለ ቐዳማይ ንሱ እዩ። ካብ ወይኑ ድማ ሰተየ፥ ሰኺሩ ኸዓ ኣብ ውሽጢ ድንኳኑ ተቐሊዑ ደቀሰ። ካም፥ ኣቦ ከነዓን፥ ኣቦኡ ጥራሑ ምስ ረአየ፥ ነቶም ኣብ ደገ ዝነበሩ ክልተ ኣሕዋቱ ነገሮም። ሴምን ያፌትን ድማ ክዳን ወሲዶም፥ ኣብ ክልቲኦም ማእገሮም ገይሮም፥ ንድሕሪት እናኸዱ ሕፍረት ኣቦኦም ከደኑ፤ ገፆም ንድሕሪት ስለ ዝነበረ ድማ ሕፍረት ኣቦኦም ኣይረኣዩን። ኖህ ድማ ካብ ወይኑ ምስ ተበራበረ፥ እቲ ንእሽተይ ወዱ ዝገበሮ ምስ ፈለጠ፥ ከምዙይ ድማ በለ፦ “ከነዓን ርጉም ይኹን! ኣብ ኣሕዋቱ ኣዝዩ ዝተዋረደ ባርያ ክኸውን እዩ።”

ከምዙይ ድማ በለ፦ “ኣቦ ሴም ቡሩኽ ይኹን፤ ከነዓን ድማ ባርያ ሴም ይኹን። ኣቦና ንግዝኣት ያፌት የስፍሖ፤ ያፌት ድማ ኣብ ድንኳናት ሴም ይንበር፥ ከነዓንውን ባርያ ሴም ይኹን።”

ድሕሪ ማይ ጥፍኣት ድማ ኖህ ንሰለስተ ሚእትን ሓምሳን ዓመት ብህይወት ነበረ። ኵሉ ዘመን ህይወት ኖህ ትሽዓተ ሚእትን ሓምሳን ዓመት ኮነ፤ ሽዑ ድማ ሞተ።