1 Kronika 14

14 ¹Hiramu ọba Tire rán àwọn ìránṣẹ́ sí Dafidi, pẹ̀lú àwọn igi kedari, àwọn akọ́lé òkúta, àti àwọn gbẹ́nàgbẹ́nà, láti kọ́ ilé fún un. ²Dafidi mọ̀ pé Baba wa ti fi òun jẹ ọba lórí Israẹli, nítorí a gbé ìjọba rẹ̀ ga fún nítorí àwọn ènìyàn rẹ̀ Israẹli.

³Dafidi sì tún fẹ́ àwọn aya mìíràn ní Jerusalẹmu, ó sì bí àwọn ọmọkùnrin àti àwọn ọmọbìnrin mìíràn. ⁴Wọ̀nyí ni orúkọ àwọn ọmọ tí a bí fún un ní Jerusalẹmu: Ṣammua, Ṣobabu, Natani, àti Solomoni, ⁵Ibhari, Eliṣua, Elipeleti, ⁶Noga, Nefegi, Jafia, ⁷Eliṣama, Beeliada, àti Elifeleti.

Baba Wa Ya Lu Àwọn Filistini

⁸Nígbà tí àwọn Filistini gbọ́ pé a ti fi òróró yan Dafidi ní ọba lórí gbogbo Israẹli, gbogbo wọn gòkè lọ láti wá Dafidi. Dafidi gbọ́, ó sì jáde lọ láti dojúkọ wọ́n. ⁹Àwọn Filistini sì ti wá, wọ́n sì kọlu Àfonífojì Refaimu.

¹⁰Dafidi béèrè lọ́wọ́ Baba wa pé, “Ṣé kí n gòkè lọ kọlu àwọn Filistini? Ṣé ẹ ó fi wọ́n lé mi lọ́wọ́?” Baba wa sì sọ fún un pé, “Gòkè lọ, èmi yóò sì fi wọ́n lé ọ lọ́wọ́.”

¹¹Wọ́n sì gòkè lọ sí Baali-perasimu; Dafidi sì kọlù wọ́n níbẹ̀. Dafidi wí pé, “Baba wa ti ya lu àwọn ọ̀tá mi láti ọwọ́ mi bí ìkún omi tí ń ya lọ.” Nítorí náà wọ́n pe orúkọ ibẹ̀ náà ní Baali-perasimu. ^a a v11 Baali-perasimu túmọ̀ sí “Olúwa tí ń ya lu.” ¹²Àwọn Filistini sì fi àwọn òrìṣà wọn sílẹ̀ níbẹ̀, Dafidi sì pàṣẹ, a sì fi wọ́n jóná.

¹³Lẹ́ẹ̀kan sí i àwọn Filistini kọlu àfonífojì náà.

¹⁴Dafidi tún béèrè lọ́wọ́ Baba wa, Baba wa sì wí pé, “Má ṣe gòkè lọ lé wọn. Yí wọn ká, kí o sì kọlù wọ́n ní ọ̀kánkán àwọn igi baljamu. ¹⁵Nígbà tí o bá gbọ́ ìró ìrìn ní orí àwọn igi baljamu, nígbà náà ni kí o jáde lọ sí ogun—nítorí Baba rẹ ti jáde lọ ṣáájú rẹ láti kọlu ọmọ ogun àwọn Filistini.”

¹⁶Dafidi sì ṣe gẹ́gẹ́ bí Baba wa ti pa á láṣẹ fún un, wọ́n sì kọlu ọmọ ogun àwọn Filistini láti Gibeoni títí dé Geseri. ¹⁷Òkìkí Dafidi sì tàn ká gbogbo ilẹ̀ náà, Baba wa sì mú kí gbogbo àwọn orílẹ̀-èdè bẹ̀rù rẹ̀.