Seneibü Bouei Dawid chem yeitida

Hiramei Dawid la chem che dangkei, hoba haoeibü chempen chingkei, hoba Filistiabüei onang naangkubü Choba lamla loukei. Dawidei shaang seneibü Bou to nyibou phekei; nyibou hao to jongaikei, hoba nyiboubüa balsam bu nyu thüka ditbü meimeila laukei.

Chapter 14.

Hobaje Tair Choba Hiramei Dawid la chem che dangla shanga, hao jungto ngühlang künbü shuong, cedar bu, laangeibü mistri shuong, hoba mistri shuong hautikei. Hobaje Bouei hao to Israel pendou thüka Choba kümkei, aishanga haoeibü mütli Israel shanga haoeibü Sangle khuto yaangtikei dogo, Dawidei hibü ngekkei.

Hobaje Dawidei Jerusalema yak aei ngakei; hoba tokei Dawid la bousushou yaksa shousi aei bukkukei. Hobaje habü ho Jerusalema hao la bukkubü shousi shuong nyen ki: Shammua, Shobab, Nathan, hoba Solomon, Ibhar, Elishua, Elifelet, Noga, Nefeg, Jafia, Elishama, Beeliada, hoba Elifelet.

Seneibü Bouei Filistiabü shoueitida

Hobaje ladang Filistiabüei Dawid Israel pendou thüka Choba onang naangkukei dogo ditkei, haoen pendou Dawid lapla angkei; hoba Dawidei kho ditkei hoba haoen khulimbo haukei. Tou Filistiabü louan Refaim pholia shikei.

Hobaje Dawidei Bou to phekei, “Ngo Filistiabü khulimbo anglabü lo? Nyi haoen ngo ika khümbo kulabü lo?” Kheijinei Bouei hao to laukei, “Angashi, hoba ngei haoen kaibü ika khümbo kulabü.”

Haoen Baal Perazim to angkei hoba Dawidei haoen khünei thükkei, hoba Dawidei laukei, “Yungsen nujung lotbü phatko Bouei ngeibü dangbou shuong kü ikei shoueitia.” Hibü haoenei kho kaonyek to Baal Perazim dogo nyenkei. ^a Hobaje Filistiabüei haoeneibü mühghaü shuong khünei apyokei, hoba Dawidei ngühkhüm kukei, hoba khübü juokkei.

Kheijinei Filistiabü nyibou pholia shikei.

Hobaje Dawidei nyibou Bou to phekei, hoba Bouei laukei, “No haoeneibü phaito aangjan, haoen naphei danko kaijeashi, hoba haoen to balsam bunyu thedang aeto hauashi, Balsam bunyu thüka meimeibü ngüh ditlaje, kheijinei lason to hauashi, aishanga kaibü Bouei ka thedanga Filistiabü shuong haitila hauan kilabü.”

Hobaje Dawidei Bouei hao la sakkubü tegü kümbei, hoba Filistiabü sepai tan Gibeon ka Gezer sühko haitikei. Hobaje Dawideibü nyenhang kaonyek pendou ae aakei, hoba Bouei phang pendou la Dawid to hatko kümbei.