Ithumwui Avāna Davidwui Shim Sākā
Hiramna Davidli wungshim sāmi, awui shimkhur ngasāka, kala Philistinenaobingna thao kaneomi awunga kathar chili phāda rāhaowa. Kanikha Davidna Ishavāli kharalak eina hānga; kanikhala mathut mihaowa, kala kakhanewuili thingrong tungli mi kazatkhon kashā tangda ngaranglu da hānga.
14 1Tyrewui awunga Hiramna Davidwui vang shim sākā khavai, Davidli paomebing, cedarthing, ngalung mistribing kala thing mistribing eina ngasoda chihovai. 2Ithumwui Avāna ali Israelwuitungli awunga sāngasakhaira da Davidna theikhui; kaja awui mi Israelwui vang awui wungram mai kāngasakhaira.
3Kala Davidna Jerusalemli preiva̱ chungmeida khuida, naomayara kala naongalāva̱ kachungkha pharāsanghaowa. 4Jerusalemli ali kapharā naobingwui aming chi hina: Shammu-a, Shobab, Nathan, kala Solomon, 5Ibhar, Elishu-a, Elpelet, 6Nogah, Nepheg, Japhia, 7Elishama, Beeliada, kala Eliphelet.
Ithumwui Avāna Philistinenaobingli Khaimda
8Philistinenaobingna Davidli Israel saikora tungli awunga thao neomida sanghaira da kashā eina, athum saikorana Davidli phāvai; kala Davidna shāhaoda athumli ngararkida thānvai. 9Chitharan Philistinenaobingna rāhaida Rephaim tampākli rai sāhaowa.
10Kala Davidna ithumwui Avāli ngahāna, "Philistinenaobingli angararrala? Kala athumli iwui pāngli horsangmirakhala?" Chieina ithumwui Avāna ali hānga, "Kaulu, kala athumli ina nawui pāngli horsangmira."
11Athum Baal-perazimli kāhaowa; chili Davidna athumli yuihaowa. Davidna hānga, "Ithumwui Avāna iwui yangkashebingli ipāng eina tara̱ kaphong thāda khaimihaira." Chiwui vang eina athumna apam chili Baal-perazim da hoi. a a v11 Baal-perazim kaji "khaimda kaphā Proho Vare" da khalatna. 12Kala Philistinenaobingna chili athumwui varebing hormiserhaowa, kala Davidna kaso mihaida mei eina riktāhaowa.
13Kala Philistinenaobingna latluida tampākli rai sāhaowa.
14Kala Davidna ithumwui Avāli latluida ngahāna, kala ithumwui Avāna hānga, "Athumwui thili mavālu. Athumli kuimareida, balsam thing pamli mai ngarei ngarokta athumli vālu. 15Balsam thing tungli mi kazatkhon nathumna kashā eina, rai khavā ngatha̱phoklu; kaja nathumwui Avāna Philistinewui raimibingli sāthat khavai nathumli rida zatkaphokna."
16Davidna ithumwui Avāwui kakaso athishurda sai, kala athumna Philistinewui raimibingli Gibeon eina thuida Gezer vāshungda sākazammihaowa. 17Kala Davidwui sākashap ngalei saikorali ngayaohaowa, kala ithumwui Avāna miyur saikorawuitungli Davidli khangachee tāshung ngasaka.
